ده‌ست ب چاره‌سه‌رییا ده‌روونى بۆ ژن و زارۆیێن ئێزدى هاته‌كرن

هەواڵ / کوردستانی :: پێش 2 هەفتە ‌ :: 157‌ جار بینراوە

دواڕۆژ، بورهان یه‌حیا

رێكخراوا رۆژا شنگال بۆ مافێ مرۆڤى ده‌ست ب چاره‌سه‌رییا ده‌روونى بۆ 12 زارۆ و ژنێن ئێزدى یێن رزگاربوویێن ده‌ستێ داعش كرییه‌.

ریساله‌ شه‌ڕكانى، سه‌رۆكا رێكخراوا رۆژا شنگال بۆ مافێ مرۆڤ ئه‌ڤرۆ ئێكشه‌مب 1 ئیلۆل، بۆ دواڕۆژ دیاركر: "وه‌كو قۆناغا ئێكێ ژ چاره‌سه‌رییا ده‌روونى بۆ رزگاربوویێن ده‌ستێ داعش رێكخراوێ ب هه‌ماهه‌نگى دگه‌ل نۆژداره‌كێ تایبه‌تمه‌ند ب نه‌خۆشیێن ده‌روونى ده‌ست ب چاره‌سه‌رییا ده‌روونى بۆ 6 زارۆیێن رزگاربوویى ژ هه‌ر دوو ره‌گه‌زان و دیسا 6 ژنێن رزگاربوویى ژى كرییه‌ و دێ پرۆسه‌ به‌رده‌وام بیت".

گۆتژى: "به‌شه‌ك ژ ڤان زارۆیان هێشتا هزرا داعش د سه‌ڕێ وان دا مایه‌ و توندره‌ون و هه‌تا كاریگه‌ریێ ل سه‌ر زارۆیێن ره‌خودۆرێن خۆ ژى دكه‌ن له‌وا نۆژدارێ ده‌روونى دێ ب به‌رده‌وامى دگه‌ل وان روونیت و هه‌موو بزاڤان كه‌ت داكو ئه‌و هزرا توندره‌و د سه‌رێ وان دا ده‌ربێخن و دگه‌ل هندێ ژى ئه‌و بارێ گرانێ ده‌روونى یێن وه‌ختێ شه‌ڕى تووشى وان بوویه‌ سڤكتر لێ بكه‌ت، داكو بشێن دووباره‌ ب شێوه‌یه‌كێ ئاسایى ڤه‌گه‌رنه‌ ناڤ جڤاكى".

ریساله‌ شه‌ڕكانى دیاركر ژى: "ئه‌و 6 ژنێن هاتینه‌ ژێگرتن ژى ژیێ وان ژ 40 سالیێ بۆ خوارێ یه‌ و ئه‌وژى تووشى تێكچۆنێن ده‌روونى بووینه‌ و به‌شك ژ وان دێ ل دوو مه‌هان چاره‌سه‌ر بن و دوور نینه‌ به‌شه‌ك چاره‌سه‌رییا وان 2 سالان ژى ڤه‌كێشیت".

پ: ئا.ح



  • ڕۆژ
  • هەفتە
  • مانگ
created by Avesta Group and powered by Microsoft Azure