فەرماندەیەکی پێشمەرگە: بوونی داعش لە قەرەچوغ بووەتە ئەمری واقیع

هەواڵ / چاوپێکەوتن :: پێش 3 هەفتە ‌ :: 480‌ جار بینراوە
غازی فەیسەڵ

دواڕۆژ، هانا چۆمانی 

فەرماندەیەکى پێشمەرگە دەڵێت: "هاوشێوەی ساڵانی رابوردوو بوونی داعش لە قەرەچوغ ئەمری واقیعە، غازی فەیسەل سیان، فەرماندەی پێشمەرگە لە سنوورى قەرەچوغ و کارگێڕی مەڵبەندی سێی هەولێری یەکێتی نیشتیمانی کوردستان لە چاوپێکەوتنێکی دواڕۆژدا دەشڵێت: مانەوەی داعش هۆکارەکەی سیاسییە ئامانجیش لێى سەرقاڵکردنى هەندێک هێز و دروستکردنى نائارامییە.

دواڕۆژ: رووبەری ئەو ناوچەیە چەندە کە داعش وجود و چالاکی تیادا هەیە؟
غازی فەیسەڵ:
داعش لە سنووری دەشتی قەراج و ناو چیای قەرەچوغ و بناری چیای قەرەچوغ بەدرێژایی 60 کیلۆمەتر وجودی هەیە و چالاکی و بونیان هەیە، بەجۆرێک لە گوندی گڕاوی سیانان تا دەگات بە سەر زێی گەیارە و کۆی گوندەکانی سنووری چیای قەرەچوغ و بەشێک لە گوندەکانی سنووری ناحیەی سەرگەڕان و دیوی کەندێناوە هەموو ئەوانە بەدرێژایی سنورەکە داعش وجودی هەیە و چالاکی دەکات.

دواڕۆژ: لە سنووری مەخمور و بناری چیای قەرەچوغ چەند گوند لەژێر مەترسیدان؟
غازی فەیسەڵ:
ئەو گوندانەی هەڕەشە و مەترسیان لەسەرە لەلایەن چەکدارانی داعش 73 گوندە، کە 30 گوندیان چۆڵکراون و ئەوانەشی کە ماون هێزە عێراقیەکان کە فیرقەی 14ى سوپاى عێراق پارێزگاری دەکات و ئەمنیەت لەدەستی ئەوان دایە، ئەو گوندانەن کە دەکەونە سنووری ناحیەی قەراج لە چیای قەرەچوغ، چونکە لە چیاکە نزیکن. گوندەکانی (چوارگۆمان، بەردەسپی، عەلیەرەش و قەڵاتە سۆران) لەژێر مەترسین، خەڵک ناتوانێت بگەڕێتەوە بە بەردەوامی و ئەگەر ئەو فیرقەیەی سوپای عێراق لەوێ نەمێنێت، کەس ناتوانێت لەو ناوچانەش بمێنیتەوە، بۆیە ئێستا هاوشێوەی ساڵانی رابوردوو بوونی داعش لەو ناوچانە ئەمری واقیعە.

دواڕۆژ: بەنزیکەی دەزانن چەند چەکداری داعش لەو ناوچانەدا هەیە؟
غازی فەیسەڵ:
مەزەندە دەکەین بە درێژایی ئەو 60 کیلۆمەترە زیاتر لە هەزار چەکداری داعش هەبێت، ئەوەش بەگوێرەی هاتووچۆ و بارەگاکانیان کە لەئێمەوە دیارن و زۆرجار لە گوندەکانمانەوە سەیریان دەکەین، بەشێوەی پۆل پۆل لە چیای قەرەچوغ دەردەکەون و 20 بۆ 25 چەکداری داعش تا 5 بۆ 10 چەکدار بەیەکەوە دەردەکەون، زۆرترین چەکداریان لە ئەشکەوتێکە بەرامبەر بە گوندی عەلی رەش لە بناری چیای قەرەچو‌غ کە نزیکەی 200 چەکدار دەبن.

دواڕۆژ: هۆکاری بوونی ئەو چەکدارانە و مانەوەیان چیە؟
غازی فەیسەڵ:
لەدوای لێکەوتەکانی ریفراندۆم و 16ى ئۆکتۆبەری 2017 بۆشاییەکی ئەمنی گەورە لەنێوان هێزە عێراقیەکان و وەزارەتی پێشمەرگە دروستبووە، بەهۆیەوە ژمارەیەک گوند و ناوچە هەیە نە هێزە عێراقیەکان و نە پێشمەرگە ناڕۆن بەلایدا، داعشیش ئەو دەرفەتەی قۆستۆتەوە.

دواڕۆژ: هیچ بەڵێنێک یان هەوڵێک هەبووە بۆ ئەوەی لەو سنوورە ئۆپراسیۆن دژی داعش ئەنجامبدرێت؟
غازی فەیسەڵ:
بەڵێ چەندینجار بەڵێن دراوە، دەیان کۆبونەوەش لە بەغدا و هەولێر، تەنانەت قەزای مەخموریش کراوە کە ئۆپراسیۆن لە چیای قەرەچوغ ئەنجامبدرێت، بەسەرپەرشتی هێزەکانی هاوپەیمانان و هەماهەنگی هێزە عێراقیەکان و هێزەکانی پێشمەرگە، بەڵام نەگەیشتونەتە رێککەوتن، تائێستا هیچ ئۆپراسیۆنێکی فراوانی هەماهەنگی ئەنجامنەدراوە، بۆیە ئێستا تەنانەت خەڵکیش گومانیان هەیە لەوەی بۆ رێککەوتن نیە یان ئۆپەراسیۆن نیە لەکاتێکدا لە بەغدا وەزیر و وەزارەت و سەرۆک ئەرکانی سوپایان هەیە، بەڵام لەسەر ئۆپراسیۆنێک دژى داعش رێکناکەون؟! ئەوە پرسیاری هەموو خەڵکی ناوچەکەیە.

دواڕۆژ: قسەیەک هەیە گوایە ناوچەکە لەژێر دەستی حکومەتی عێراقە و دەبێت ئەوان بیپارێزن، کامانەن ئەو هێزانە؟
غازی فەیسەڵ:
بێگومان ئەو هێزە عێراقیانە تا توانیوویانە ناوچەکەیان پاراستووە، سەرەتا فیرقەی (3)ی پۆلیسی ئیتحادی لەسەر سنوورەکە بوون، ماوەی نزیکەی ساڵ و نیوێک مانەوە، ئێستاش ماوەی نزیکەی 10 مانگە فیرقەی (14)ى سوپاى عێراق هاتۆتە ئەو ناوچانە کە شوێنی فیرقەی سێی پۆلیسی ئیتحادیی بوو، ئەمنیەتی تەواو دەپارێزن، ئەو هێزانە بەهیچ جۆرێک جیاوازی ناکەن لەنێوان عەرەب و کورد و تورک.

دواڕۆژ: پێکدادان یان رووبەروبوونەوە یان هێرشی داعش هەبووە لەو ناوچانە؟
غازی فەیسەڵ:
بێگومان، بەردەوام هەیە، ئێمە هەم خۆمان بەرگری دەکەین لەگەڵ خەڵک و هەمیش بنکە و بارەگامان داناوە، چەندینجار پێکدادانی چەکداری لەنێوان داعش و ئێمە و ژمارەیەک جوتیاری گوندەکانی شەعەل و سێبیران و گەزوەشان روویداوە و ئێستا ژمارەیەک گوندی تر لە سنووری کەندێناوە جێگای مەترسین و ترسێکی زۆر هەیە، ئەگەر بێت و یەک رۆژ هێزە عێراقیەکان لەوێ نەمێنن بێگومان داعش ئەو ناوچانە کۆنترۆڵ دەکات.

دواڕۆژ: دەتوانین بڵێین مانەوەی داعش لەو ناوچەیە شتێکی سیاسیە و دەستکردە؟
غازی فەیسەڵ:
بێگومان مانەوەکەی هۆکاری سیاسیە بەر لەوەی سەربازی داعش یا خۆرسک بێت، ئامانجیش سەرقاڵکردنى هەندێک هێز و دروستکردنى نائارامیە، ئەوەی زیاتر کاریگەری دروستکردوە لەسەر مانەوەیان بوونی هێزی پارچە پارچە و حیزبییە  بەهۆی بوونی ململانێی سیاسی و حیزبی و بەرژەوەندی تایبەتی یا حیزبی لە ناسەقامگیری ناوچەکە.

دواڕۆژ: مەبەستت ناکۆکی نێوان هەرێم و بەغدایە یان ناکۆکی نێوان حیزبە کوردیەکان کە چەکداریان هەیە؟
غازی فەیسەڵ:
بێگومان ناکۆکی و کێشەکانی نێوان یەکێتی و پارتی و حیزبەکانی تریش و ناکۆکی نێوان هەرێم و بەغداش. کێشەی ناوخۆیی هەرێم و کێشەی ناو هێزەکانی پێشمەرگە بەتایبەت یەکەی 70 و 80ى پێشمەرگە رێخۆشکەرە بۆ مانەوەی داعش، ئەگەرنا ئەو بۆشاییە ئەمنیە دروستنەدەبوو، نەیدەتوانی بمێنێتەوە.

دواڕۆژ: زۆرجار باس لە بوونی هێزەکانی هاوپەیمانان دەکرێت ئەوان ئەرکیان چیە؟
غازی فەیسەڵ:
هێزەکانی هاوپەیمانان جگە لەوە بۆردوومانی بنکە و بارەگاکانی داعش دەکەن لە سنوورى چیای قەرەچوغ، هاوکات رۆڵی گرنگیان هەیە لەو سنوورە، بەردەوام فڕۆکە چاودێری سنورەکە دەکات و بە ئاسمانی ناوچەکەدا دەسوڕێنەوە، هەرکات مەفرەزە یان ئۆتۆمبێلی داعش بینن ئەوا راستەوخۆ فرۆکە بۆردومانیان دەکات، جگە لەوەی ئێستا هێزێکی زەمینی هاوپەیمانان هاتۆتە ناوچەکە و تۆپی دورهاوێژیان پێیە و لەڕێیەوە بنکەکانی داعش بۆردومان دەکەن.

پێداچونەوە: شیروان شەریف

بڵاوکردنەوە: ئارام غەفور



created by Avesta Group and powered by Microsoft Azure