بەردەوامی هاتنی گەشتیاران دەرگای هۆتێلە داخراوەکانی کردەوە

هەواڵ / ئابوری :: 30/08/2019‌ :: 330‌ جار بینراوە

دواڕۆژ، راپۆرتی سەنگین خۆشناو

گەرمای هاوین وایکردووە لە شەش مانگی یەكەمی ئەمساڵدا ملیۆنێك و 700 هەزار گەشتیار روو لە هەرێمی كوردستان بکەن، ئەمەش وایکردووە سەرجەم ئەو هۆتێل و مۆتێلانەی داخرابوون جارێکی دیکە بکرێنەوە، لەداهاتوویەکی نزیکیشدا چەندین هۆتێلی براندی جیهانی لە کوردستان دەکرێنەوە.


بەپێی ئامارەکانی دەستەی گەشتوگوزاری هەرێم لە ساڵی 2013 دوو ملیۆن و 952 هەزار گەشتیار روویان لە هەرێمی كوردستان كردووە، بەڵام شەڕی داعش و قەیرانی دارایی هاتنی گەشتیارانی کەمکردەوە، بەجۆرێك هاتنی گەشتیاران لە ساڵی 2014 بەراورد بە 2013 بەڕێژەی 48% كەمی كرد، ساڵی 2015 رێژەكە بەرزبووەوە بۆ 73.6%.

دوای نەمانی شەڕ و باشتربوونی دۆخی دارایی هەرێمی کوردستان جارێکی دیکە کەرتی گەشتیاری هەرێمی کوردستان بوژایەوە بەجۆرێک ساڵی رابوردوو 3 ملیۆن و 57 هەزار گەشتیار روویان لە هەرێمی كوردستان كرد.

مەولەوی جەبار، سەرۆکی دەستەی گەشتوگوزاری هەرێمی کوردستان بۆ دواڕۆژ دەڵێت: "لە شەش مانگی یەكەمی ئەمساڵدا زیاتر لە یەك ملیۆن و 700 هەزار گەشتیار روویان لە هەرێمی كوردستان كردووە، بە بەراورد بە شەش مانگی یەكەمی ساڵی رابوردوو ژمارەی گەشتیاران  لەسەدا 23% زیادیکردووە و پێشبینی ژمارەیەکی زۆر زیاتر دەکەین".

دەستەی ئاماری هەرێم بە هاوكاریی دەستەی گەشتوگوزار و كۆمەڵەی میوانخانە و چێشتخانەكانی هەرێمی كوردستان لە كۆتایی ساڵی 2017 رووپێوییەكی مەیدانی بۆ هاتنی گەشتیاران و خەرجی و مانەوەیان لە نێوان ساڵانی 2013 بۆ 2016 كردبوو.

لە رووپێوییەكەدا دەركەوت لە ساڵی 2016 كۆی ژمارەی میوان لە یەكە گەشتیارییەكان 1.237.438 میوان بووە، ئەمەش لەچاو ژمارەی میوان لە ساڵی 2013 بەڕێژەی 56.8% كەمیكردبوو. هەروەها ژمارەی شەوانی مانەوەی میوان لە یەكە گەشتیارییەكان لە ساڵی 2016دا  3.739.022 شەو بووە، بە بەراورد بە شەوانی مانەوەی میوان لە ساڵی 2013 بەڕێژەی 43% دابەزیبوو. بەو هۆیەشەوە داهاتی كەرتی گەشتیاری 37.6% كەمیكردبوو.

بەپێی رووپێوییەكە، لە ساڵی 2016 لە كۆی 1,128 یەكەی گەشتیاری تەنیا 636 یەكەی گەشتیاری لەكاردابوون، 339 یەكەی گەشتیاری كاریان نەكردووە یان داخراون، 101 یەكەی گەشتیاریش شوێنەكەیان كراوەتە شتی دیكە.

ئەو 339 یەكە گەشتیارییەی لە ساڵی 2016 كاریان نەكردووە یان داخراون 159 یان لە هەولێر، 110 لە سلێمانی و 69 یان لە دهۆك بوون، لەناویاندا شەش هۆتێلی 5 ئەستێرەیی و هەشت هۆتێلی 4 ئەستێرەیی هەبوون.

مەولەوی جەبار، دەشڵێت: "بەهۆی قەیرانی دارایی و شەڕی داعش زۆربەی هۆتێلەکان کاریان کەمبوو و داخران، بەڵام ئێستا ئەوەندە گەشتیار زیادیکردووە هەموو هۆتێلە داخراوەکان کراونەتەوە، لەداهاتوودا چەندین هۆتێلی براندی جیهانیش لە شارەکانی کوردستان دەکرێنەوە".

بەپێی ئاماری دەستەی گەشتوگوزار، ئێستا 1075 شوێنی مانەوەی گەشتیاران هەن لە هەرێم كە بریتین لە 625 هۆتێل، 370 مۆتێل، 80 گوندی گەشتیاری، ئەمە جگە لە نزیكەی 800 رێستۆرانت و كافتریای گەشتیاری و سەدان كەپری گەشتیاری لە ناوچە گەشتیارییەكان.

شوکر عەزیز، جێگری سەرۆكی لقی هەولێری كۆمەڵەی میوانخانە و چێشتخانەكانی هەرێمی كوردستان بەدواڕۆژی راگەیاند: لە ساڵانی رابوردوودا بەهۆی كەمبوونەوەی گەشتیار خاوەن هۆتێلەكان تووشی زیانی گەورە بوون، ژمارەیەكی زۆر هۆتێل و مۆتێل داخران، تەنانەت 23 هۆتێل بە فەرمی مۆڵەتەكانیان هەڵوەشاندەوە و ئەندامێتیان لەلای ئێمە هەڵپەسارد كە هۆتێلی 5 ئەستێرە و 4 ئەستێرەیان تێدابوو.

وتیشی: "بەهۆی باشبوونی بارودۆخی گەشتیاری، ئەم هۆتێلانەی كە پێشتر داخرابوون ئێستا دووبارە كراونەتەوە، بە گشتی سەرجەم ئەو گەشتیارانەی لەڕێگەی گروپەكانەوە دێن 3 تاوەكو 4 شەو دەمێننەوە، ئەو گەشتیارانەشی بە ئۆتۆمبێلی خۆیان دێن، نزیكەی 50%یان لە هۆتێلەكان دەمێننەوە".

بەهۆی كێبڕكێی هۆتێلەكان بۆ راكێشانی سەرنجی گروپە گەشتیارییەكان، نرخی مانەوە لە هۆتێلەكانی كوردستان زۆر كەمبووەتەوە.

شوکر عەزیز دەڵێت: "نرخی شەوی مانەوە بەتایبەت بۆ گروپە گەشتیارییەكان زۆر دابەزیوە، لە حەوت هەزارەوە دەستپێدەكات تا دەگاتە 20 هەزار دینار، ئەو نرخەش زۆر كەمە".

هۆتێلی وایت گاردینیا، سێ‌ ساڵ لەمەوبەر بەهۆی كەمیی میوانەوە داخرا، بەڵام دوو مانگ لەمەوبەر جارێكی دیكە لەلایەن سەرمایەدارێکی لوبنانییەوە كرایەوە.

تۆنی حارس، بەڕێوەبەری گشتیی رێستۆرانت و هۆتێلی وایت گاردینیا لە شاری هەولێر كە پێشتر ئیدارەی دوو هۆتێلی دیكەی لە هەولێر كردووە، بۆ دواڕۆژ دەڵێت: "باشبوونی باری ئابووری و ئاسایشی هەرێمی كوردستان و زیادبوونی ژمارەی گەشتیاران، وای لێكردین جارێكی دیكە بۆ وەبەرهێنان لە كەرتی گەشتیاری بگەڕێینەوە هەولێر".

تۆنی پێیوایە ئەگەر ستافی هۆتێلەكان بەشێوەیەكی دروست مامەڵە لەگەڵ زەوقی گەشتیاری عەرەب بكەن و خزمەتگوزارییەكانیان باش بێت، هیچ هۆتێلێك ژوورەكانی چۆڵ نابێت.

نرخی مانەوەی گەشتیاران لە هۆتێل و مۆتێلەکان لە شارێک بۆ شارێکی دیکە جیاوازە، بەوتەی گەشتیاران و رێبەرەکانیان نرخی مانەوە لە سلێمانی گرانترە لەچاو هەولێر.

هاوشێوەی هەولێر، ئەو هوتێلانەی پێشتر لە سلێمانی داخرابوون ئێستا كراونەتەوە و جمەیان دێت لە گەشتیار. مەحمود تۆفیق، سەرۆكی لقی سلێمانی كۆمەڵەی میوانخانە و چێشتخانەكانی هەرێمی كوردستان، بۆ دواڕۆژی روونکردەوە: ماوەی دوو ساڵە بەهۆی زیادبوونی ژمارەی گەشتیار بارودۆخی هۆتێلەكانی سلێمانی زۆر باش بووە، زۆربەی ئەو هۆتێلانەی پێشتر داخرابوون، كراونەتەوە.

وتیشی: "نرخی مانەوەی شەوێكی میوان لە هۆتێلەكانی سلێمانی بۆ گروپە گەشتیارییەكان لە 15 هەزار دینار كەمتر نییە. بەگوێرەی ئەستێرە و خزمەتگوزارییەكانیش نرخەكە بەرزدەبێتەوە تاوەكو 25 هەزار، نرخی مانەوە لە هۆتێلی 3 ئەستێرە و 4 ئەستێرەش لە 50 هەزار دینار كەمتر نییە".

پ: ن.ر



  • ڕۆژ
  • هەفتە
  • مانگ
created by Avesta Group and powered by Microsoft Azure