پارەی گەنمی جوتیارانی پارێزگایەك و دوو قەزا خەرج كرا

هەواڵ / ئابوری :: 30/08/2019‌ :: 218‌ جار بینراوە

دواڕۆژ، عەلی حەمە سەعید


بەڕێوەبەری سایلۆی سەیدسادق ئاشكرایكرد، بەبڕی یەك ملیار و 600 ملیۆن دینار چەكی پارەی گەنمی سەرجەم جوتیارانی سنووری پارێزگای هەڵەبجە و قەزای سەیدسادق و شارەزووریان بەدەست گەیشتووە.
 

بەختیار عیزەت، بەڕێوەبەری سایلۆی سەیدسادق بە دواڕۆژی راگەیاند "دوای ئەوەی جووتیارانی پارێزگای هەڵەبجە و شارەزوور و سەیدسادق و بەرزنجە بەشێك لە بەرووبوومی گەنمی ئەمساڵیان رادەستی سایلۆی سەیدسادق كرد، بۆ جاری دووەم چەكی پارەی گەنمەكانیان گەیشتە سایلۆی سەیدسادق و دەستمانكردووە بەدابەشكردنی چەكەكان كە بڕی پارەكانیان یەك ملیار و 600 ملیۆن دینارە و بەمجۆرەش سەرجەم ئەو جووتیارانەی كە ئەمساڵ گەنمیان رادەستكردین، پارەكانیان وەرگرت.
 
ئاماژەی بەوەشكرد، سەرجەم ئەو جووتیارانەی لەم قۆناغەدا چەكی پارەی گەنم وەردەگرن ژمارەیان 225 جوتیارە و لە هەفتەی داهاتووەوە دەتوانن لە بانكی سەیدسادق بڕی پارەكانیان وەربگرن.

بەوتەی بەختیار عیزەت، لەمساڵدا بڕی 21 هەزار تۆن گەنمی جووتیارانی سنووری پارێزگای هەڵەبجە و سەیدسادق و شارەزووریان وەرگرتووە لەكاتێكدا سایلۆكەیان توانای وەرگرتنی 40 هەزار تۆن گەنمی هەیە.
 
بەڕێوەبەری سایلۆی سەیدسادق ئەوەشی خستەڕوو، لە ئێستادا بڕی 30 ملیار دینار پارەی گەنمی ساڵانی 2014 و 2015 و 2016 ی جووتیارانی سنوورەكە لای حكومەتی عێراقی ماوەتەوە هەرچەندە بڕیار بوو كە ئەو بڕە پارەیەشمان بۆ خەرجبكرێت، بەڵام تائێستا بەفەرمی هیچ وادەیەك دیاری نەكراوە بۆ خەرجكردنی ئەو بڕە پارەیە. 

پێداچوونەوە: ئارام غەفور 

ب: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure