په‌ڕله‌مانتاره‌ك: پێدڤییه‌ وه‌زاره‌تا داد بهایێ مامه‌له‌یێن دادگه‌هێ كێم بكه‌ت

هەواڵ / کوردستان :: 25/08/2019‌ :: 138‌ جار بینراوە

تاگ :: دهۆك داد

دواڕۆژ، بورهان یه‌حیا

پشتى كارێ برێڤه‌برنا مامه‌له‌یێن وه‌لاتییان ل دادگه‌ها دهۆك (عه‌ریزه‌) كه‌ڤتییه‌ ده‌ستێ كۆمپانییه‌كێ و بها ژ 3000 دیناران بوویه‌ 29000 دینار په‌ڕله‌مانتاره‌كا دهۆك راگه‌هاند دادگه‌ها دهۆك یێ نه‌رازییه‌ و دێ داخواز ژ وه‌زاره‌تا داد هێته‌كرن بهایێ عه‌ریزه‌یان كێم بكه‌ت.


ژیان زێره‌یى، په‌ڕ‌له‌مانتار ژ پارێزگه‌ها دهۆك (ئه‌ڤرۆ ئێكشه‌مب 25 ئاب 2019) بۆ دواڕۆژ دیاركر: "چه‌ند رۆژه‌كن كۆمپانییه‌كا كه‌رتێ تایبه‌ت ب كارێ برێڤه‌برنا كارێ عه‌ریزچیان ل دادگه‌ها دهۆك رابووى كو مۆله‌تا خۆ ژ وه‌زاره‌تا داد وه‌رگرتییه‌ هه‌ر چه‌ند سیسته‌م ئه‌لكترۆنییه‌ و خه‌لكى پێخۆشه‌ لێ گازنده‌یا هه‌موو وه‌لاتییان و هه‌تا سه‌رۆكاتییا دادگه‌هێ و پارێزه‌ران ل سه‌ر بهایێ وان عه‌ریزه‌یانه‌ كو پێشتر 3000 دینار بوون و نوكه‌ گه‌هشتینه‌ 25000 هه‌تا 29000 دیناران".

دیاركر: "ئه‌ڤێ كۆمپانیێ مۆله‌تا كارى ژ وه‌زاره‌تا داد وه‌رگرتییه‌ و دانان و كاركرنا وان بێى ئاگه‌هدارییا دادگه‌ها دهۆك بوویه‌ و هه‌موو پارێزه‌ره‌ و كارگێرى و سه‌رۆكاتییا دادگه‌هێ گازنده‌ ژ بهایێ زۆر یێ چێكرنا مامه‌له‌یێن وه‌لاتییان هه‌بوو و داخواز دكرن پێداچۆنه‌كێ تێدا بكه‌ن".

ژیان زێوه‌یى خویاكر: "وه‌كو په‌ڕله‌مانتار دێ راپۆرته‌كێ تێروته‌سه‌ل ل سه‌ر ڤى بابه‌تى به‌رهه‌ڤ كه‌ین و پێشكێشى سه‌رۆكاتییا په‌رله‌مانێ كوردستانێ كه‌ین بۆ هندێ بۆ وه‌زاره‌تا داد بهنێریت داكو پێداچۆنه‌كێ د بهایێ وان دا بكه‌ت چونكو ب راستى زۆره‌ و ل دووڤ ره‌وشا دارایى یا خه‌لكى نینه‌".

چه‌ند رۆژن كۆمپانییه‌كا كه‌رتێ تایبه‌ت ب كارێ برێڤه‌برنا مامه‌له‌یێن وه‌لاتییان ل سه‌رۆكاتییا دادگه‌ها دهۆك رابوویه‌ و هه‌ر چه‌ند سیسته‌م ئه‌لكترۆنییه‌ و رۆتین كێم بوویه‌ لێ گازنده‌یێ وه‌لاتییان و هه‌تا دادگه‌ها دهۆك ژ بهایێ زۆر یێ چێكرنا ڤان مامه‌له‌یانه‌.

 

بڵاوکردنەوە: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure