ژنەكەی زەواهیری كێیە كە ئێستا لەپاكستان بەندە

هەواڵ / جیهان :: 25/08/2019‌ :: 199‌ جار بینراوە

تاگ :: جیهان

دواڕۆژ


هاوسەرەكەی ئەیمەن زەواهیری كەسی یەكەمی ئێستای رێكخراوی قاعیدە، خەڵكی میسرە و ژنی دووەمی ئەو سەركردەیەی قاعیدەیە، كە وا بڵاوكراوەتەوە لە پاكستان بەند بێت.

هاوسەرەكەی ئەیمەن زەواهیری ناوی ئەمیمە حەسەن-ە و رەگەزنامەی میسریی هەیە و ژنی دووەمی ئەو سەركردە باڵایەی قاعیدەیە كە دوای بن لادن بووەتە كەسی یەكەمی رێكخراوەكە.

ئەمیمە حەسەن لەپارێزگای سعێد لەدایكبووە و سەر بە خانەوادەیەكە كە هەمیشە بەشداریی جەنگ بوون هاوشان لەگەڵ رێكخراوە توندڕەوەكاندا.

ئەمیمە پێشتر هاوسەری تارق ئەنوەر بووە كە سەركردەیەكی دیاری رێكخراوی جیهادی ئیسلامی بوو، بەرپرسی ئۆپراسیۆنە تایبەتەكان بووە، ساڵی 2001 لەئەفغانستان كوژرا و دواتر زەواهیری مارەی كردەوە.

ئەمیمە حەسەن بە ئوم خالید ناسرابوو، لەساڵی 1988ەوە لەگەڵ تاریقی هاوسەری سەفەریان كردووە بۆ ئەفغانستان و ساڵی 2002 بەبێوەژنیی لەلایەن زەواهیرییەوە مارە كراوەتەوە.

ئەركی ئەمیمە ناردنی نامە و نووسراوی هاندان بووە بۆ هاوتاكانی لە رێكخراوەكە و هەوادارانی قاعیدە، تیایدا هانی داون تا پشتیوانی رێكخراوی قاعیدە بكەن و پیتاك و ئابوونە بنێرن و یارمەتی خانەوادەی برینداران بدەن و گەر بۆیان كرا بێنە ناو رێكخراوەكەوە تا چەك هەڵبگرن.

ئەیمەن زەواهیری هاوسەری زۆر بووە و ژمارەیەكی بەرچاوی ئەو ژنانەی مارە كردووەتەوە كە هاوسەرەكانیان لەشەڕدا كوژراون و لەژێر ناونیشانی "چاكەی هاوسەری موجاهیدەكان" ئەو كارەی كردووە.

باوكی هاوسەرەكەی زەواهیری ناوی (حەسەن ئەحمەد)ە و تۆمەتبار بوو بە پرسی گەڕاوەكانی ئەلبانیا، دوو برای هەبوو كە لە گروپی ئیسلامیی چەكدار ئەندام بوو، یەكێكیان ناوی شەریف حەسەن بووە كە ساڵی 1992 دوای گەڕانەوەی لە ئەفغانستان، لەسێدارەدرا.

ئا: ئارام غەفور 

بڵاوکردنەوە: ئیحسانی مەلا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure