ناكۆكى ده‌كه‌وێته‌ نێوان زه‌رده‌شتییه‌كانى كوردستان

هەواڵ / کوردستان :: پێش 4 هەفتە ‌ :: 1813‌ جار بینراوە

تاگ :: كوردستانى

دواڕۆژ، پشتیوان جەمال

زەردەشتییانی كوردستان لەسەر "جەژنێكیان" بوونەتە دوو بەشەوە، بەشێكیان دەڵێن: "سبەی ئەو جەژنە دەكەنەوە"، بەشەكەی دیكەشیان رەتیدەكەنەوە ئەو جەژنە لە ئاینەكەیاندا بوونی هەبێت.

ناوەندی زەردەشتیانی كوردستان كە لەلایەن لوقمانی حاجی كەریم ناسراو بە (پیر لوقمان) سەرپەرشتی دەكرێت بڕیاریان داوە سبەی 24ی ئابی 2019 لە ناوچەی قسقاپان لەسنوری پارێزگای سلێمانی "جەژنی پەیمان" ئەنجام بدەن، بەڵام نوێنەری زەردەشتییان لە وەزارەتی ئەوقاف دەڵێت: "هیچ جەژنێكیان نییە به‌و ناوه‌".

ئاوات حیسامەدین، نوێنەری زەردەشتییان لە وەزارەتی ئەوقاف و كاروباری ئاینی حكومەتی هەرێمی كوردستان ئەمڕۆ 23ی ئابی 2019 بە دواڕۆژی راگەیاند:  "من ئەندامی بۆردی زەردەشتییانی جیهانم، سەر بەهۆی زەردەشتییانی كوردستانم لە ویلایەتی كالیفۆرنیا، بەهیچ شێوەیەك لە رۆژمێری زەردەشتیدا جەژنی پەیمان نییە، ئەم جەژنە لەلایەن ئەو كەسە بەناوی (لوقمانی حاجی كەریم) دروستكراوە".

لە بەرامبەردا لوقمانی حاجی كەریم ناسراو بە (پیر لوقمان)، سەرۆكی ناوەندی زەردەشتییانی كوردستان لە لێدوانێكدا بۆ دواڕۆژ ئەو قسانەی ئاوات حیسامەدینی رەتكردەوە و رایگەیاند: "سبەی جەژنی پەیمانە و ئەم جەژنە پەیوەندی بەقسەی ئاوات حیسامەدینەوە نییە، بەڵكو ئەوان زەردەشتین و خەڵكانێكی ئاینین، هیچ پەیوەندیشیان بەلێدوانی ئەوەوە نییە، بۆیە ئازادە هەر شتێك دەڵێت".

پ: ئا.ح



  • ڕۆژ
  • هەفتە
  • مانگ
created by Avesta Group and powered by Microsoft Azure