وێنە: دۆزینەوەی پەرستگایەكی سیخەكان لە كوەیت هەرا دەنێتەوە

هەواڵ / جیهان :: 19/08/2019‌ :: 154‌ جار بینراوە

دواڕۆژ


دۆزینەوەی پەرستگایەكی سیخەكان لە ناوچەیەكی كوەیت و بڵاوكردنەوەی هەواڵ و وێنەكانی لە رۆژنامەی (ئەلڕەئی)ی كوەیتی-دا، دەنگدانەوەیەكی زۆری لەو وڵاتەدا دروستكردووە و هەر لە رۆشنبیران و پەرلەمانتارانەوە هەتا خەڵكی ئاسایی قسەی لەسەر دەكەن.


رۆژنامەكە نووسیویەتی"ئەو پەرستگایە 9 ساڵە لە ناوچەیەكی كشتوكاڵیدا دروستكراوە و هەزاران هاووڵاتیی سیخ-ی هندی كە لە كۆمپانیایەكدا لەو ناوچەیە كاریان كردووە و ئێستایش كاردەكەن، سرووتە ئایینیەكانی خۆیانیان تێدا ئەنجامداوە و وەك پەرستگایەك بەكاریانهێناوە".

پەرستگاكە ناوی (Sulaibiya Gurdwara Sikh Temple)ە و بەئاشكرا لەسەر نەخشەی ئەلیكترۆنیی (گوگڵ ماپس) و (گوگڵ ئێرس) دەردەكەوێت. 

بەگوێرەی سەرچاوەكان، نزیكەی 800 هەزار هاووڵایتی هندیی ئایین جیاجیا لە كوەیتدا هەن و لەو ژمارەیەیش 12 هەزاریان سیخ-ن. ئێستا مەترسیی ئەوە هەیە حكومەت هەمان رەفتار لەگەڵ ئەم پەرستگایەدا بكات كە پێش نزیكەی 18 ساڵ لەگەڵ پەرستگایەكی دیكەی سیخەكاندا كردی و رووخاندی.

پەرلەمانتارێكی كوەیتی پێیوایە ئەوانەی داوای داخستنی پەرستگاكە دەكەن (جاهل)ن و كۆتوبەند بۆ ئازادیی پەیڕەوكردنی ئایینەكان دروست دەكەن و دەڵێت:"لێ‌ گەڕێ‌ چی دەپەرستێت با بیپەرستێت".
لە بەرامبەردا پەرلەمانتارێكی تر پێیوایە كردنەوەی ئەو پەرستگایە پێچەوانەی یاساكانی دەوڵەتی كوەیت و دژی (دینی حەنیفی ئیسلام)ە.

 پارێزەرێكیش رای وایە كە دروستكردنی پەرستگاكە پێچەوانەی یاسایە و دەبێت ئەوانەی دەستیان هەیە لەو كارەدا سزا بدرێن. 

نووسەر و ئەكادیمیستێكیش دەڵێت: "بەڵێ‌ سیخەكان بۆیان هەیە پەرستگای خۆیان لە كوەیتدا هەبێت.. ئێوە لە وڵاتی خۆیانەوە هێناوتانن بۆ كاركردن و ئێستا نایەڵن سادەترین مافی خۆیان پەیڕەو بكەن؟ شتێكی سەیر و نامۆیە!!".

هەرچی لایەنی حكومەتی هندستان-یشە، لەزاری بەرپرسێكی باڵیۆزخانەكەیەوە لە كوەیت، بێئاگایی خۆی راگەیاندووە و دەڵێت"هیچ زانیارییەكمان لەسەر ئەوە نییە كە سیخەكان هیچ پەرستگایەكیان لە كوەیت-دا هەبێت".

ئامادەكردن: لوقمان محەمەد رەشید
پ: ک. س



created by Avesta Group and powered by Microsoft Azure