نوێترین زانیاری لەسەر تۆمەتباری كوشتنی كارمەندی بەنزینخانەكەی چەمچەماڵ

هەواڵ / کوردستان :: 19/08/2019‌ :: 2008‌ جار بینراوە

دواڕۆژ، پشتیوان جەمال

پۆلیسی سلێمانی رایگه‌یاند: تۆمەتباری كوشتنی كارمەندی بەنزینخانەكەی چەمچەماڵ دانی بەوەدا ناوە کە هیچ كێشەیەكی لەگه‌ڵ كوژراوەكەدا نەبووە و یەكتریشیان نەناسیوە، خۆشی ماوەی دوو مانگە لەشاری چەمچەماڵ دەژیت.


نەقیب سەركەوت ئەحمەد، بەڕێوەبەری راگەیاندن و پەیوەندییەكانی پۆلیسی سلێمانی ئەمڕۆ 19ی ئابی 2019 لە كۆنگرەیەكی رۆژنامەوانیدا رایگەیاند: دوای پڕكردنی بەنزین، كارمەندی وێستگەیه‌كی به‌نزین له‌ چه‌مچه‌ماڵ داوای پارەی لە بكوژەکە كردووە، بكوژه‌كه‌ش نكۆڵی دەكات كە پارەی پێبدات، بۆیە شتێك لەنێوان دروست دەبێت، بەوەی بكوژ دەیەوێت پارە نەدات و كوژراویش دەیەوێت پارەی لێبسەنێت.

ناوبراو وتیشی: "وەك لە گرتە ڤیدیۆییەكەدا دیارە لەناكاو تۆمەتبار دەمانچە دەردەهێنێت و فیشەك بە كارمەندەكەوە دەنێت، پاشان كارمەندەكە دەیەوێت لەدەستی هەڵبێت و بڕوات، بەڵام تۆمەتبار دەڕواتە ئیدارەی وێستگەكەوە و فیشەكی پێوەدەنێت و پارەی دەستی كارمەندەكە دەرده‌هێنێت و دەڕوات".

نەقیب سەركەوت ئاماژەی بەوەشكرد: هێزە ئەمنییەكان كاتژمێر 4ی بەیانی تۆمەتباره‌كه‌یان دەستگیركردووە، پشكنین بۆ ئەو ماڵەش ئەنجامدرا كە تێیدا مابووەوه‌ و دەستگیرا بەسەر دەمانچەیەكی جۆری تۆكاریف لەگەڵ ماتۆڕسكیلەكەیدا.

بەرپرسەكەی پۆلیس وتیشی: "تۆمەتبار دانی بەتاوانەكەدا ناوە كە ماوەی مانگێكه‌ لە قەزای چەمچەماڵە و خۆی خەڵكی شارۆچكەیەكی دیكەیە و ماڵێكی خزمێكی لەو قه‌زایه‌یه‌، هەروەها چەند جارێك چووه‌تە ئەو وێستگەیە و ئێوارەی دوێنێش زانیویەتی وێستگەكە چۆڵە و هەر ئەو كارمەندەی لێیە، ئه‌و كاره‌ی ئه‌نجامداوه‌".

باسی له‌وه‌شكرد: دەمانچەكه‌ی لە قەزای كەلار بە 800 دۆلار كڕیوە و دوو مانگە پێیەتی، پێشتریش لەسەر تاوانی شەڕكردن دەستگیركراوە و پێشینەی هەیە.

سەبارەت بەوەی پێشتر بكوژ و كوژراو هیچ كێشەیەكیان نەبووە، نەقیب سەركەوت وتی "نەخێر كێشەیان نەبووە و یەكتریشیان نەناسیوە، ئەو شەوە زانیویەتی چۆڵە ئەو تاوانەی كردووە".

پێداچوونه‌وه‌: ئیحسانی مه‌لا فوئاد

 



created by Avesta Group and powered by Microsoft Azure