دواڕۆژ، دهۆك
وه‌لاتیێن دهۆك یێن بۆ مه‌ره‌مێن گه‌شتییاری ل رۆژێن جه‌ژنا قۆربانی سه‌ره‌دانا تركیا كربوون، دوو رۆژه ڤه‌دگه‌رن، لی ل ده‌رگه‌هێ ئیبراهیم خه‌لیل نێزیكی 8 ده‌مژمێران ل سرایێ دمینن.
ئاراز ره‌شید، وه‌لاتیێ دهۆك لسه‌ر سنوورێ ئیبراهیم ل ئالیێ تركیا بۆ دواڕۆژ گۆت:"نێزیكی 8 ده‌مژمێران، ئه‌ز دگه‌ل خێزانا خوه دسرایێ دایه تا ڤه‌گه‌رم دهۆك، چنكو رێڤه‌به‌رییا ده‌رگه‌هێ ئیبراهیم خه‌لیل ل ئالیێ تركیا، گه‌شتییاران گه‌له‌ك گیرۆ دكه‌ن".
ناڤبۆری دازانین:"ئه‌ڤرۆ 17-ێ ته‌باخێ، سرا ترۆمبێلێن وان گه‌شتییارێن ژ تركیا ڤه‌دگه‌ریان ل ئالیێ سلۆپییا نێزیكی 2 كیلومه‌تران درێژ بوویه".
ژێده‌ره‌كی ل ده‌رگه‌هێ ئیبراهیم خه‌لیل ل ئالیێ كوردستانێ بۆ دواڕۆژ گۆت:"دوو رۆژه، وه‌لاتیێن دهۆك پێكڤه ژ تركیا ڤه‌دگه‌رن، له‌ورا گه‌له‌ك قه‌ره‌بالغ درووستكریه، ل ئالیێ كوردستانێ ئه‌وا دشییاندابوو ب ره‌نگه‌كێ گه‌له‌ك بله‌ز هاریكاریا ڤه‌گه‌ریانا گه‌شتییاران هاتیه‌كرن".
لدووڤ ئامارێن رێڤه‌به‌ریا ده‌رگه‌هێ ئیبراهیم خه‌لیل ل رۆژێن به‌ری جه‌ژنێ ئاشكه‌راكرین، نێزیكی 80 هزار وه‌لاتیێن دهۆك بۆ مه‌ره‌مێن گه‌شتییاری قه‌ستا وه‌لاتێ تركیا كربوون.
پ: ک. س