وەرگرتنی منداڵان لەباخچەی ساوایان دەست پێدەكات

هەواڵ / کوردستانی :: 17/08/2019‌ :: 501‌ جار بینراوە

تاگ :: پەروەردە

دواڕۆژ، پشتیوان جەمال

باخچەكانی منداڵانی سلێمانی دەست بەوەرگرتنی منداڵان دەكەن، بەرپرسێكی پەروەردەش دەڵێت: "بەپێی پێوەری جیهانی، دەبوایە بەقەد قۆناغی بنەڕەتی، باخچەی منداڵانیش هەبوایە".


بەكر محەمەد، بەڕێوەبەری پەروەردەی رۆژئاوای سلێمانی ئەمڕۆ شەممە 17ی ئابی 2019 بەدواڕۆژی راگەیاند: لەناوەڕاستی ئەم مانگەوە دەستكراوە بەوەرگرتنی منداڵ بۆ باخچەی منداڵان، وەرگرتنیش لە باخچە ئەگەر بەپێوەری جیهانی بێت پێویستە بەقەد قۆناغی بنەڕەتی، باخچەی منداڵانیش هەبێت، بەڵام بەداخەوە لەكوردستان ئەو ژمارە زۆرەی باخچە نییە.

لە سنووری پەروەردەی رۆژئاوا 38 باخچەی منداڵان و لە سنووری پەروەردەی رۆژئاواش نزیكەی 16 باخچە هەیە، لەكاتێكدا تەنیا لەسنووری پەروەردەی رۆژئاوادا 138 قوتابخانە هەیە.

بەكر محەمەد روونیكردەوە: بەهۆی ژمارەی كەمی باخچەوە، باخچەكان مولزەم نین بە وەرگرتنی هەموو منداڵێك، بەڵكو بەپێی ناوچەی جوگرافی و ژمارەی دانیشتووان، منداڵان لەباخچەكان وەردەگیرێن.

ناوبراو وتی :"سیستمی باخچە دوو قۆناغە، یەكێكیان بۆ چوار ساڵ و ئەوەی دیكەش پێنج ساڵن، زۆربەی باخچەكان بەهۆی كەمی باخچەوە منداڵانی پێنج ساڵ وەردەگرن، وەرگرتنی چوار ساڵ لەبەر رەچاوگرتنی دایكیانە كە فەرمانبەر و مامۆستان، بەڵام لەحاڵەتی ئاسایی و بوونی باخچەدا دەبێت منداڵا دوو ساڵ لەباخچەدا بن".

جێی ئاماژەیە لەهەندێك باخچەی منداڵان لەشاری سلێمانی ئاگاداری بڵاوكراوەتەوە كە لەسبەینێ 18ی ئابەوە تۆماركردنی منداڵان دەست پێدەكات.

پ: ک. س

بڵاوکردنەوە: ئیحسانی مەلا فوئاد



created by Avesta Group and powered by Microsoft Azure