باوكێك و دوو كوڕی پێکەوە گیانیان له‌ده‌ستدا

هەواڵ / کوردستان :: 15/08/2019‌ :: 9050‌ جار بینراوە

دواڕۆژ، بەختیار شەریف

لەگوندێکی ناحیەی قادرکەرەم-ی سەر بە قەزای چەمچەماڵ، دوو کوڕ و باوکێک لەکاتی مەلەکردندا خنکان.


سەرچاوەیەک لەسنوری ناحیه‌ی قادركه‌ره‌م ئەمڕۆ (پێنجشەممە ۱٥ی ئاب) بەدواڕۆژی راگەیاند "باوكێك و دوو كوڕی كە خەڵكی گوندی باوایی-ن، بەمەبەستی مەلەكردن چوونەتە گوندی نەورۆز و داربەسەرەی سەر بە ناحیەی قادركەرەم و بەوهۆیەوە خنكاون".

عەمید لوقمان حەسەن بەڕێوەبەری بەرگری شارستانی چەمچەماڵ هەواڵەکەی بۆ دواڕۆژ پشتڕاستکردەوە و وتی: "لەرووداوێکی خنکاندا لەگوندی نەورۆز و داربەسەرە ئاگادارکراینەوە، تا گەیشتنی تیمی (غەواص)، خۆیان تەرمەکانیان دەرهێنابوو".

وتیشی: "باوكەكە ناوی جەمال ئەحمەده‌و كوڕەكانیشی ناویان (ئەحمەد و محەمەد)ـە لە كاتژمێر 3ی پاشنیوەڕۆ تووشی ئەو رووداوە بوون و لە ئێستاشدا تەرمەكانیان لە نەخۆشخانەی دادی كەركوكە".

پێداچوونه‌وه‌و بڵاوكردنه‌وه‌: ئیحسانی مه‌لا فوئاد



created by Avesta Group and powered by Microsoft Azure