ساڵانە بە بڕی 813 ملیار دینار 900 جۆر جگەرە هاوردەی هەرێم دەكرێت

هەواڵ / ڕاپۆرت :: 16/08/2019‌ :: 301‌ جار بینراوە

دواڕۆژ، راپۆرتی سەنگین خۆشناو


زیاتر لەمانگێکە نرخی جگەرەی تورکی گرانبووە، بەجۆرێک هەر کارتۆنێک جگەرەی تورکی زیاتر لە 300 دۆلار بەرزبووەتەوە، هەر پارچەیەكی مالیبۆرۆی تورکی لە 30 هەزار دینارەوە بۆ 40 هەزار دینار بەرزبووەتەوە.

 

 زیاتر لە 200 قاچاخچی بەڕێگەی قاچاخ جگەرەی تورکی هاوردەی بازاڕەکانی هەرێمی کوردستان دەکەن، هەر قاچاخچییەک هەفتەی دوو تا سێ جار جگەرە هاوردە دەکەن.
لە هەر بارێکی جگەرەدا قاچاخچی دوو تا سێ کارتۆن هاوردە دەکات و هەر کارتۆنێکیش جگەرە 50 پارچە جگەرەی تێدایە.

 

عەدنان بامەندی، زیاتر لە 25 ساڵە بازرگانی جگەرەیە بۆ دواڕۆژ دەڵێت: "بەهۆی دابەزینی بەهای دراو، نرخی جگەرە لە تورکیا گرانبووە، بۆیە لێرەش گران بووە".

 

عەدنان بامەندی، دەشڵێت: "جگەرەی مالیبۆرۆ و وینستۆن و پەرلەمان و چەند جۆرێکی دیکەی تورکی لە تورکیاوە هاوردە دەکرێن، سەرەڕای ئەوەی هەمان ئەو جۆرە جگەرانە لە ئەوروپاشەوە هاوردە دەکرێن، بەڵام ئەوان گرانترن لە تورکی، بۆیە خواست لەسەر جگەرەی تورکی زۆرترە".

 

بەبەراورد بەساڵی رابوردوو، ئەمساڵ هاوردەکردنی جگەرەی تورکی کەمبووەتەوە، چونكە حکومەتی تورکیا سنوورەکانی توند کردووە و رێگری دەکات لە قاچاخچییەکان.

 

سامی سەمیر، ناوی خوازراوی قاچاخچییەکی کوردی باکوورە کە جگەرەی تورکی هاوردەی هەرێم دەکات بۆ دواڕۆژ دەڵێت: "ئێمەش بەهەمان سەختیی کۆڵبەرەکانی ئێران جگەرە هاوردە دەکەین، چونکە چەندینجار رووبەڕووی مەترسی بوینەتەوە و جەندرمەی تورک تەقەیان لێکردووین".

 

سامی سەمیر، دەشڵێت: "هەموو هەفتەیەک سێ جار هەر جاری 5 کارتۆن جگەرەم دەهێنا بۆ کوردستان، بەڵام ئێستا هەفتەی جارێک دێم، چونکە چەندینجار بارەكانمان دەستی بەسەردا گیراوە".

 

ئەو قاچاخچییەی جگەرە دەشڵێت: "تا بەهای لیرە باش بوو، قازانجی ئێمەش باشتر بوو، بەڵام ئێستا سوودی ئەم كارە زۆر کەمبووەتەوە".

 

مەردان سەعید، خاوەنی فرۆشگەیە لە شاری سلێمانی بۆ دواڕۆژ دەڵێت: "هەفتەیەکە نرخی جگەرەی تورکی بەرزبووەتەوە، بەبەراورد بە مانگی رابوردوو هەر پارچەیەك 8 بۆ 10 هەزاری چووەتە سەر، بەجۆرێک پارچەی پاکەتی مالیبۆرۆ لە 30 هەزار دینارەوە بەرزووەتەوە بۆ 38 بۆ 40 هەزار دینار".

 

مەردان سەعید، دەشڵێت: "بەهۆی گرانبوونی نرخەکەی، خواست لەسەر جگەرەی تورکی کەمبووەتەوە، زۆربەی کڕیارەکانم جگەرەکانیان گۆڕیوە و زۆرترین خواستیش لەسەر جگەرەی رووسییە، چونکە نرخی هەرزانە".

 

مەردان سەعید، باس لە جیاوازی نرخی جگەرەکان دەکات و دەڵێت: "پێشتر پاکەتێکی مالیبۆرۆ 3 هەزار دینار بوو، بەڵام ئێستا بووەتە 4 هەزار، بەڵام جگەرەی ئیسی بە 1000 دینارە چەند جۆرێکی تری جگەرەی رووسی هەن کە 500 دیناریشی تێدایە، بۆیە ئێستا کەمتر جگەرەی تورکی دەفرۆشین، پێش ئەوەی نرخی بەرزبێتەوە رۆژانە زیاتر لە 5 پارچەم دەفرۆشت، ئێستا 2 پارچەش نافرۆشم.

 

لەهەرێمی کوردستان لە هەردوو پارێزگای هەولێر و سلێمانی کارگەی جگەرە هەبوون کە سەر بە حکومەت بوون و تا ئێستاش زۆربەی کرێکارەکانی مووچە وەردەگرن، بەڵام کارگەکان پەکیان کەوت و حکومەتیش لێی خەمسارد بوو، شارەزایەکی ئابوریش دەڵێت ئەگەر کارگەکان بکەونەوە کار هەم گرینگی بە چاندنی توتن دەدرێت و هەم ئەو پارەیەی دەچێتە دەرەوە، لەناوخۆ خەرجدەکرێت.

 

گەیلان قادر، شارەزای ئابوری بۆ دواڕۆژ دەڵێت: "وڵاتانی دونیا ئەوەندەی گرنگی بە بەرهەمی خۆماڵی دەدەن، هێندە بەرهەمی هاوردە گرنگ نییە لایان".

 

ئەو شارەزایە دەشڵێت: "بەکارخستنەوەی کارگەی جگەرە وادەکات هەم کرێکاری زۆر کاریان دەستبکەوێت و هەم ئەو پارەیەی بۆ کڕینی جگەرە دەچێتە دەرەوە، لەناوخۆ خەرجدەکرێت".

 

گەیلان قادر، باس لەوەشدەکات "زۆربەی جووتیاران تەنیا گەنم و بەرووبوومی دیکە دەچێنن، بەڵام ئەگەر ئەو کارگانە و کارگەی دیکەش دروستبکرێن، جووتیار روو لە چاندنی توتن دەکات".

 

بەپێی ژمارەی ئەو قاچاخچییانەی جگەرە هاوردە دەکەن کە ژمارەیان 200 قاچاخچییە، هەر قاچاخچییەک ساڵانە نزیكەی 144 کارتۆن جگەرە هاوردە دەکات، بەوپێەش ساڵانە بەنزیكەیی 28 هەزار و 800 کارتۆن جگەرە لە تورکیاوە هاوردەی کوردستان دەکرێن.

 

ساڵانە بە بڕی 813  ملیار دینار جگەرە هاوردەی هەرێمی کوردستان كراوە، بەشێكی بەرچاوی ئەو جگەرەیه‌ کە نزیکەی 900 جۆر دەبن، لەنێو بازاڕدان. 

 

پێداچوونەوە: ئارام غەفور

بڵاوکردنەوە: ن.ر

 



created by Avesta Group and powered by Microsoft Azure