دهۆك: هه‌مبه‌ر كێمییا ئاڤێ وه‌لاتییان خڕڤه‌بوونه‌ك رێكخست

هەواڵ / کوردستان :: 5 رۆژ پێش ئێستا‌ :: 171‌ جار بینراوە

دواڕۆژ، بورهان یه‌حیا


ل كۆمه‌لگه‌ها دۆمیز نێزیك سه‌نته‌رێ باژێڕێ دهۆك خه‌لكى وه‌كو نه‌رازیبوونه‌ك هه‌مبه‌ر نه‌بوونا خزمه‌تگوزارییا ئاڤا ڤه‌خوارنێ خۆنیشاندانه‌ك رێكخست و رێكا سه‌ره‌كى گرت.


ته‌حسین موئه‌یه‌د ئێك ژ ئاكنجیێن كۆمه‌لگه‌ها دۆمیزه‌ و به‌شدارى ڤێ خڕڤه‌بوونێ بوویه‌ (ئه‌ڤرۆ سێشه‌مب 13 ئاب 2019 ) بۆ دواڕۆژ دیاركر" نێزیكى دوو مه‌هانه‌ ب دروستاهى ئاڤ بۆ تاخێ مه‌ نه‌هاتییه‌ و ئه‌گه‌ر جاره‌كێ هاتبیت ژى هند لاوازه‌ كو ناگه‌هیته‌ تانكان و چ مفا تێدا نینه‌ و چه‌ندین جاران ژى داخواز ژ لایه‌نێن په‌یوه‌ندیدار هاتییه‌كرن ڤێ كێشه‌یێ چاره‌سه‌ر بكه‌ن لێ هه‌تا نوكه‌ بێ مفا بوویه‌".


به‌شداربوویێن خڕڤه‌بوونێ رێیا سه‌ره‌كى ناڤبه‌را دهۆك بۆ ناحیا فه‌یدیێ و باژێڕێ مووسل گرتییه‌ و هاتنوچۆنا ترومبێلان نه‌مایه‌.


ئه‌ڤ وه‌لاتییه‌ زێده‌تر خویاكر" تانكه‌رێن ئاڤێ ل نێزیك كۆمه‌لگه‌هێ ب به‌رده‌وامى ئاڤێ ڤه‌دگوهێزن و نوزانین بۆ كیڤه‌ دبه‌ن، ماده‌م ئاڤ هه‌یه‌ بلا بده‌نه‌ مه‌ ژى چونكو دوور نابینین زارۆیێن مه‌ تووشى نه‌خۆشیێن ڤه‌گر ببن و كێشه‌ مه‌زنتر لێ بهێت".


ته‌حسین موئه‌یه‌د خویاكر" هه‌تا كێشه‌یا ئاڤێ نه‌هێته‌ چاره‌سه‌ركرن دێ به‌رده‌وام بین سه‌ر خڕڤه‌بوونێن خۆ و داخواز دكه‌ین پارێزگار بخۆ بهێته‌ سه‌ر هێلێ و ڤى كێشه‌ى چاره‌سه‌ر بكه‌ت".


ل چه‌ندین تاخێن دى ژى ل باژێڕێ دهۆك كێشه‌یا كێمییا ئاڤێ هه‌یه‌ وه‌كو تاخێن ره‌زا و كۆمه‌لگه‌ها مسێریكێ و ب گۆره‌ى پێزانینان ل پڕۆژه‌یێ سه‌ره‌كیێ ئاڤێ ل دهۆك چه‌ندین كارێن نووژه‌نكرنێ دهێنه‌كرن و ژبه‌ر ڤێ چه‌ندێ كێشه‌یا كێمییا ئاڤێ ل رۆژانێن جه‌ژنێ په‌یدا بوویه‌.

بڵاوکردنەوە: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure