كچێن دهۆك به‌رێ خوه ‌داینه‌ كرێكاریێ

هەواڵ / ئابوری :: 12/08/2019‌ :: 295‌ جار بینراوە

دواڕۆژ، دهۆك

كچێن باژارێ دهۆك، رۆژ لدووڤ رۆژێ زێده‌تر به‌رێ خوه‌ ده‌نه‌ كرێكارییا كۆمپانییان و بازاران و نوكه‌، نێزیكى 400 ئه‌ندامێن سه‌ندیكا كرێكارێن كوردستانێ ل دهۆك‌ كچن.


به‌فرین مه‌هدى، كاسبكار ل مۆله‌كا دهۆك بۆ دواڕۆژ گۆت: "ئه‌ڤ ساله‌، من ده‌ست بكارى كریه‌ چنكو دوو ساله‌، من خواندنا زانكۆیێ ب دوماهك هینایه‌ و ل چو ده‌زگه‌هێن حكومه‌تێ نه‌هاتم دامه‌زراندن".

لدۆر هه‌مان مژارێ رێناس مسته‌فا، ئابوریناس، بۆ دواڕۆژ گۆت:"كاركرنا كچان دناڤ بازاران دا دێ بیته‌ ئه‌گه‌ر كو ده‌ستێ كار یێ كچان ل هه‌موو جهان زێده‌تر لێبهێت ئه‌ڤه‌ژى دێ بیته‌ ئه‌گه‌ر ئابورێ خێزانێ بهێز ببیت".

ناڤبۆرى دازانين:"كرێكاریا كچان بۆ جڤاكێ دهۆك و ئابورێ خێزانێ گه‌له‌ك باشه‌، چنكو خێزانێن دهۆك ژ گه‌له‌ك ئه‌ندامان پێكدهێن، له‌ورا كاركرنا ره‌گه‌زێ نێر بتنێ بۆشاییا ئابۆرى دخێزاندا تژى ناكه‌ن، له‌ورا گرنگه‌ كچ كرێكاریێ د هه‌موو بواراندا بكه‌ن".

لدووڤ ئامارێن سه‌ندیكا كرێكارێن كوردستان-دهۆك، رۆژ لدووڤ رۆژێ ژماره‌یا كچێن كرێكار ل دهۆك زێده‌تره دبیت.

كیڤى بامه‌رنى، سه‌رۆكێ پشكا سه‌ندیكا ئاڤاكرنێ ل دهۆك بۆ دواڕۆژ گۆت: "نوكه،‌ ژمارا ئه‌ندامێن وان یێن كرێكارێن ره‌گه‌زێ مێ ل دهۆك، گه‌هشتییه‌ نێزیكى 400 كرێكاران كو پتریا وان ل بازاران و جهێن بازرگانى و گه‌شتییارى كاردكه‌ن".

بامه‌رنى خوه‌یاكر: "چێبوونا قه‌یرانا ئابورى و لاوازبوونا نه‌ریتێن جڤاكى كو كار بتنێ بۆ ره‌گه‌زێ نێر دزانى، ئه‌گه‌رێن سه‌ره‌كینه‌ كو كچان ب ره‌نگه‌كێ به‌رچاڤ به‌رێ خوه‌ داینه‌ كرێكاریێ".

ژبلى كچێن دهۆك، گه‌له‌ك ژ كرێكارێن ل سه‌نته‌رێن بازرگانى و جهێن جۆدا كار دكه‌ن كچێن په‌نابه‌ر و ئاواره‌یێن رۆژئاڤایێ كورستانێ و شنگال ژى هه‌نه‌.

 

پ: چ.ع



created by Avesta Group and powered by Microsoft Azure