ئاسیاسێڵ پانۆرامای سلێمانی تەواو كرد

هەواڵ / کوردستان :: 10/08/2019‌ :: 4043‌ جار بینراوە

تاگ :: سلێمانی

دواڕۆژ


كۆمپانیای ئاسیاسێڵ پڕۆژەی پانۆرامای سلێمانی تەواو كرد كە لەكێبڕكێیەكی سۆشیال میدیادا ئەركەكەی درایە دوو هونەرمەندی وێنەكێش.

عەبدوڵا حەسەن بەڕێوەبەری گشتی راگەیاندن و پەیوەندییەكانی كۆمپانیای ئاسیاسێڵ بەدواڕۆژی راگەیاند "پڕۆژەكە سیمایەكی جوانی بەشاری سلێمانی بەخشیوە، جگە لەوەش وێنە کۆنەکانی ئەو دیوارە زۆر جوان بوون، بەڵام چەند ساڵێک بوو کۆن بووبوون و بۆیاخەکەیان ھەڵوەری بوون و وێنەی پیاوە مەزنەکانی گەلەکەمان دیار نەمابوون".

ئەوەشی وت: "وەك تیمی میدیا و پەیوەندییەکان لە ئاسیاسێڵ بیرمان لەوە کردەوە کە بە تابلۆی نوێ و بیرۆكەی نوێ دیوارەکە نۆژەن بکەینەوە."
راشیگەیاند "بیرۆکەی کارەکەیان کرد بە مۆدێلی کێبڕکێ و لە فەیسبووک ئاشکرایانکردووە ھەتا ھونەرمەندان پرۆژەی ھونەری خۆیان پێشکەش بکەن و کێبڕکێ بکەن لەسەر خەڵاتەکەو نازناوە ھونەرییەکەی، بەڵام بەو مەرجانەی کە شارەوانی سلێمانی و ئاسیاسێڵ دایان دەنێن کە زیاتر وەک مەرجی ئەندازیاری و مەرجی ئاکاری خۆیان دەبینیەوە".

بۆ ئەو پانۆرامایە 18 پرۆژە و پێشنیاری ھونەری ئامادەكران، بە دەنگدان لەلایەن لیژنەیەكی ٦ کەسی بە زۆرینەی دەنگ پرۆژەی «پانۆرامای سلێمانی» ھەڵبژێردرا کە گێڕانەوەی چیرۆکی شارە لە دروستبوونیەوە لە سەر دەستی ئیبراھیم پاشای بابان تا رۆژگاری ئەمڕۆ و هەریەك لە هونەرمەندان رەئوف حەسەن و سەلیم عەزیز ئەركەكەیان پێبەخشرا كە تابلۆی پێشووتریش ھەر ئەم دوو ھونەرمەندە نەخشاندبوویان.

ئا: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە