گۆرستانه‌كا مه‌زن بۆ شه‌هیدێن گوندێ كوچۆ دهێته‌ چێكرن

هەواڵ / کوردستان :: 08/08/2019‌ :: 165‌ جار بینراوە
كار ل سه‌ر چێكرنا وێ ده‌ستپێكرییه‌

تاگ :: شەنگال

دواڕۆژ، بورهان یه‌حیا

ئاكنجیێن گوندێ كوچۆ یێن ئێزدییان ل ده‌ڤه‌ردارییا شنگال بڕیاردایه‌ گۆرستانه‌كێ مه‌زن بۆ شه‌هیدێن گوندى یێن سه‌ر ده‌ستێ داعش چێكه‌ن و بۆ قۆناغا ئێكێ دێ ته‌رمێ 550 كه‌س لێ هێنه‌ ڤه‌شارتن.


مه‌حما خه‌لیل، ده‌ڤه‌ردارێ به‌رێ یێ شنگال (ئه‌ڤرۆ پێنجشه‌مب 8 ئاب 2019) بۆ دواڕۆژ دیاركر: "پێشتر بۆچۆنه‌ك هه‌بوویه‌ كو هه‌موو شه‌هیدێن شنگال ل جهه‌كى بهێنه‌ ڤه‌شارتن لێ ئێكده‌نگییا ئێزدییان سه‌ر ڤى بابه‌تى دروست نه‌بوو له‌وا ئێزدیێن گوندێ كۆچۆ بڕیار داینه‌ شه‌هیدێن خۆ ل گۆرستانه‌كا مه‌زن ل ناڤ گوندى ڤه‌شێرن و نوكه‌ كار ل سه‌ر چێكرنا وێ ده‌ستپێكرییه‌ و بۆ قۆناغا ئێكێ دێ 550 ته‌رم لێ هێنه‌ ڤه‌شارتن".

دیاركر: "به‌شه‌كێ مه‌زن ژ ڤان ته‌رمان نوكه‌ ل به‌غدانه‌ داكو پشكنینا دى ئێن ئه‌ى بۆ بهێته‌كرن پشتى كو ژلایێ تیمێن بسپۆر و ب چاڤدێرییه‌كا نێڤده‌وله‌تى گۆڕێن ب كۆم یێن گوندى هاتنه‌ هه‌لدان و پشتى ده‌ركه‌ڤتنا ئه‌نجامان دێ ل هه‌ولێر راده‌ستى كه‌سوكارێن وان هێنه‌كرن و دووڤدا ل كوچۆ هێنه‌ ڤه‌شارتن".

وه‌زاره‌تا كاروبارێن شه‌هید و ئه‌نفالكریێن هه‌رێم و ئیراقێ و ل ژێڕ چاڤدێرییا رێكخراوا نه‌ته‌وه‌یێن ئێكگرتى و ب رێیا تیمێن بسپۆر ده‌ست ب قۆناغا سیێ ژ هه‌لدانا گۆرێن ب كۆم یێن ئێزدییان ب تایبه‌ت ل گوندێ كۆچۆ كرییه‌. 

بڵاوكردنه‌وه‌: شیروان شه‌ریف



created by Avesta Group and powered by Microsoft Azure