"ئەشكەوتەكان بەرەو وێرانەیی دەڕۆن"

هەواڵ / که‌لتور :: پێش 2 هەفتە ‌ :: 154‌ جار بینراوە

دواڕۆژ، راپۆرتی پشتیوان جەمال

گروپێكی فۆتۆگرافی بەنیازن سەرجەم ئەشكەوتەكانی كوردستان بەئەرشیف بكەن، بەڵام لەدەسپێكی هەنگاوەكان تەواو نائومێد بوون لەفەرامۆشكردنی ئەشكەوتەكان و كار گەیشتۆتە ئەوەی بڵێن "بەرەو وێرانەیی دەڕۆن".


گروپی فۆتۆگرافی گەڵا لە 100 كەس پێكهاتوون 50یان لەكوردستان و 50ی دیكەشیان لەدەرەوەی وڵاتن، ئەم گروپە هەر مانگێك سەردانی ناوچەیەكی كوردستان دەكەن، سەرەتا ناوچەكە پاك دەكەنەوە و پاشان دەست بەئەرشیفكردنی ئەشكەوتەكان دەكەن.

ناسیح عەلی خەیات، ئەندامی گروپی فۆتۆگرافەرانی گەڵا بەدواڕۆژی راگەیاند "تائێستا زیاتر لە 20 ئەشكەوتی سنوری پارێزگای سلێمانی گەڕاون و بەداخە بۆ لەنێوچوونی هێواشی ئەشكەوتەكان و بەبەڵگەشەوە باسیان دەكات، بۆ نموونە لەناوچەی چەمی رێزان سەردانی ئەشكەوتی( دوو كونان، سەحرا، بەچكە شێران)یان كردووە و دركیان بەوەكردووە ئەشكەوتەكان خەریكە بەرەو وێرانەیی و كاولبوون دەڕۆن.

ناوبراو روونیكردەوە، لەكاتێكدا ئەشكەوتی دووكونان لەسەردەمی شۆڕشی ئەیلول بارەگای دەنگی كوردستان بووە، هەروەها ئەشكەوتی كونەبا لەشارۆچكەی دەربەندیخان جوانترین ئەشكەوتە لەنەخش و نیگار، بەڵام بەداخەوە بەرەو وێرانەیی تەواو دەڕوات.

ئەو گروپە لەكاتی ئەرشیفكردنی وێنەی ئەشكەوتەكان ناوی كەسانی رۆژهەڵاتی كوردستانیان بەرچاو كەوتووە، ناسیح وتی "حكومەتی هەرێم بێ ئاگایە لەوەی خەڵكانێك لەئێرانەوە دێن و لەگەڵ خەڵكانی خۆمان بەدوای شوێنەواردا دەگەڕێن و هەڵیان دەكەنن، تەنانەت ناوی كەسە ئێرانییەكانیش لەنێو دیواری ئەشكەوتەكان نووسراون".

گروپی گەڵا بۆ ئەرشیفكردنی ئەشكەوتەكان، سەرەتا لەهەر ناوچەیەك مۆڵەتی لایەنی پەیوەندیدار وەردەگرن، ناسیح داوای لەبەرپرسانی ناوچەكان كرد لەكاتی بەسەركردنەوەی ئەشكەوتەكان لەو پڕۆژەیەدا هاوكاریان بن تا دواتر وێنەی وێرانبوونی ئەشكەوتەكان نیشانی بەرپرسان بدەن كە ئەگەر فریای ئەشكەوتەكان نەكەون بەرەو وێرانەیی زیاتر دەڕۆن.

لەو بارەیەوە كەمال رەشید، بەڕێوەبەری شوێنەواری سلێمانی بەدواڕۆژی راگەیاند:  بۆ پاراستنی ئەشكەوتەكان ئەوەی پەیوەندی بەئەوانەوە هەبێت وەك نەخشەكان و كۆكردنەوەی زانیاری لەسەر لایەنی شوێنەوارییان پاراستویانن.

ناسیح عەلی خەیات، داوای لەبەڕێوەبەرایەتی گەشت و گوزاریش كرد هەر ئەشكەوتێك بدرێنە سەرمایەدارەكان بۆ ئەوەی بیكەنە شوێنی گەشتیاری و هەمان كات كەسانی دەستڕەنگینیش بتوانن ئیشەكانیانی تێدا نمایش بكەن.

ئارام شوانی، بەڕێوەبەری راگەیاندنی بەڕێوەبەرایەتی گشتی گەشت و گوزاری سلێمانی بۆ دواڕۆژی روونكردەوە: ئەوان ماركێتینیان بۆ ئەشكەوتەكان كردووە و رێگەیان بۆ گەیاندن و پاركیان بۆ دروستكردوون و لەرێبەری ئەلكترۆنیشدا گرنگیان پێداون.

شوانی ئاماژەی بەوەكرد: بۆ پڕۆژەی گەشتیاری لەئەشكەوتەكان ئەوان زۆریان پێ باشە، بەڵام سەرمایەداران نایەنە پێشەوە، تەنانەت بۆ شوێنەواری هەزار مێرد چەندینجار بانگەوازیان كردووە و ئامادەش بوون زۆرترین هاوكاری ئەو كەسانە بكەن كە پڕۆژەی تێدا بكەن، بەڵام كەس ئامادەیی دەرنەبڕیوە.

پێداچونەوە: پەری

ب: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure