هەڵەبجە؛ هەڵمەتێكی نوێی دەربڕینی ناڕەزایی بەڕێوەدەچێت

هەواڵ / کوردستان :: 04/08/2019‌ :: 293‌ جار بینراوە

دواڕۆژ، رێبین حەسەن

گروپی شەقامی هەڵەبجە دژی کەمی خزمەتگوزاری و خراپبوونی شەقامەکانی شارەکە، ناوی بەرپرسان لە شوێنی شەقامە خراپەکان دەنوسن، ئەوەش بۆ ئەوەی هانیان بدەن نۆژەنیان بکەنەوە.


نەوشیروان محەمەد، سەرپەرشتیاری گرووپی شەقامی هەڵەبجە (ئه‌مڕۆ یه‌كشه‌ممه‌ 4ى ئابى 2019) بە دواڕۆژی راگەیاند: دوای پێشنیاری ئەندامێكی گرووپەكەمان بۆ ئەوەی ناوی بەرپرسان لەو شوێنانە دابنێین كە خراپبوون، ئێمەش پەسەندمان كرد و لەگەڕەكی كانی عاشقانەوە دەستمان پێكرد.

وتیشی: "ئەم هەڵمەتە كاریگەری دەخاتەسەر ناخی ئەو بەرپرسانەی ناویان دەنووسرێت، بۆ ئەوەی بتوانین فشاری زیاتریان لەسەر بكەین تا بێن بە دەم كێشەكانمانەوە".

لەوبارەیەوە، كوێستان ئەکرەم، سەرۆكی شارەوانی هەڵەبجە بە دواڕۆژی وت: "نەك تەنیا ئەو كۆڵانەی كە هەڵمەتەكەی تێداكراوە، بەڵكو چەندان كۆڵانی تریش هەن كە تێكچوون و هاووڵاتیانیان بێزاركردووە، لەگەڵ ئەوەی زۆربەی شەقام و كۆڵانەكان قیر و كۆنكرێت كراون، بەڵام بەپێی تێپەڕینی كات پێویستیان بە چاككردنەوە هەیە".

روونیشیكردەوە: وەكو شارەوانی هەڵەبجە بودجەیەكی باشمان لەبەردەستدا نییە تا بتوانین نۆژەنی ئەو شوێنانە بكەین، كە لە سەرووی خۆمانەوە بودجەمان بۆ تەرخان نەكرێت ئێمەش ناتوانین خزمەت بكەین و بودجەی شارەوانی هەڵەبجە تەنیا پێنج ملیۆن دینارە، لەبەرئەوە نەمانتوانیوە وەك پێویست خزمەتی هاووڵاتیان بكەین و نزیكەی ملیۆنێك دۆلارمان پێویستە تا رێگاوبانەكانی هەڵەبجە و دەوروبەری و رێگا گەشتیارییەكان چاك بكەین.

پ: ن.ر
بڵاوكردنه‌وه‌: شیروان شه‌ریف



  • ڕۆژ
  • هەفتە
  • مانگ
created by Avesta Group and powered by Microsoft Azure