كاریگەری تۆڕە كۆمەڵایەتیەكان لەسەر خەمۆكی

هەواڵ / زانست :: پێش 3 هەفتە ‌ :: 252‌ جار بینراوە

تاگ :: زانست

دواڕۆژ


ئەو قسەیە زۆر ڕاستە كە دەڵێت "دونیا ئێستا گوندێكی بچكۆلەیە"، چونكە هەر یەكێك لە ئێمە دەتوانێت شاشەیەكی بچكۆلە بگرێت بە دەستیەوە و نەخشەكە بكاتەوە و دوورترین دوورگە ببینێت بەوپەڕی ووردەكارییەوە.

هەرچیت دەوێت بۆت جێبەجێ دەبێت دەتوانیت گوێ لەو گۆرانییە بگریت كە بیرەوەریەكت لەگەڵیدا هەیە، تەماشای ئەو ئەڵقەیە بكەیت كە دوێنێ شەو فریای نەكەوتیت بیبینیت، دەرفەتت دەداتێ كتێب بە خۆڕایی بخوێنیتەوە، بلیتی فڕۆكە ببڕیت و ژووری ئەو ئوتێلە بۆ خۆت داوا بكەیت كە لە ئەسینا بەسەر فڵانە شوێندا دەڕوانێت.

دەتوانیت كاتژمێرێكی ئەلیكترۆنی بكەیتە دەست و ترپەكانی دڵت بژمێریت، پێت بڵێن ئەمڕۆ چەند هەنگاو ڕۆیشتیوی وادەی مەشق و وەرزشەكانت بیربخاتەوە بە بێ ئەوەی خۆت داوای لێ بكەیت.

زەمەن وای لێهاتووە كە دەتوانێت بە هەموو شتێكی دوورەوە بتبەستێتەوە، پەیوەندیت بۆ دروست بكات لەگەڵ هەركەسێك بتەوێت.

دیارە لایەنێكی گەورەی ئەم جیهانە جاڵجاڵۆكەیە تۆڕە كۆمەڵایەتیەكانن كە ڕۆڵێكی گرنگیان هەیە لەسەر ئەم گوندە جیهانیە، كاریگەری تۆڕە كۆمەڵایەتیەكان هێندە گەورە و گرنگە كە پێویستی بە چەندین توێژینەوە و كاردانەوە و زانیاری و لێكدانەوە و بەراوردكاری هەیە، لایەنێك پشتگیری لە سودەكانی ئەم تۆڕە كۆمەڵایەتیانە دەكات و پێی وایە قازانجەكان گەورەتر و گرنگترن لە ژیان و نەرێنیەكان ، لە بەرامبەردا كەسانێك هەن تۆڕە كۆمەڵایەتیەكان بە نەرێنی دەزانن و پێیان وایە كاردەكاتە سەر باری تەندروستی و ئەقڵی نەوەیەك لە گەنجانی دنیا كەواتە ئایا ئەو پێگە و ماڵپەڕانەی كە بۆ پەیوەندی و تێكەڵاوی دامەزرێنراون هۆكارێكن بۆ تەنیایی و گۆشەگیری و زیادبوونی حاڵەتەكانی خەمۆكی.

هەندێك لە زاناكان دەڵێن: ئێمە نازانین ئایا فەیسبووك كۆمەڵگای كردووەتە نەخۆشخانەیەكی گەورەی دەروونی یاخود پێشتر ئێمە لەو نەخۆشخانەیەدا بووین، بەڵام فەیسبووك تەنیا هەر ئاشكرای كردووە.

تازەترین توێژینەوە كە ئەنجامەكەی لە گۆڤاری دەروونناسی تاك و كۆمەڵگادا بڵاوكراوەتەوە پشتگیری لەو بۆچوونە دەكات كە دەڵێت" بەكارهێنانی ڕۆژانەی تۆڕە كۆمەڵایەتیەكان، لە دوور مەودادا كاریگەری ئاشكرایان دەبێت لەسەر باری ئەقڵی و دەروونی مرۆڤ".

توێژینەوەكە دەریخستووە: بەكارهێنانی تۆڕە كۆمەڵایەتیەكان بە ڕادەیەكی كەمتر لە ئاسایی دەبێتە هۆی كەمبوونەوەیەكی بەرچاو لە ڕێژەی خەمۆكی و هەستكردن بە تەنیایی. 

توێژینەوەیەكی هاوشێوەی ساڵی ڕابردوو دەریخستووە كە كەمكردنەوەی تەنیا یەك كاتژمێری ڕۆژانە لە بەكارهێنانی تۆڕە كۆمەڵایەتیەكان بێزاری و خەمۆكی بە ڕادەیەكی زۆر دادەبەزێنێت.

 

لە بەرامبەردا هەندێك توێژەری دیكە دەڵێن: ئەو مەترسیانەی كە ئێمە هەستیان پێ دەكەین سەبارەت بە بەكارهێنانی مۆبایلە زیرەكەكان و تۆڕە كۆمەڵایەتیەكان مەرج نییە ڕاست دەرچن، سەبارەت بە خەمۆكی و پەیوەندیەكانی بە بەكارهێنانی تۆڕە كۆمەڵایەتیەكانەوە.

 

چەندین توێژینەوە ئاماژە بۆ ئەوە دەكەن: كە ڕاستیەكەی ئەوەیە كەسانی خەمۆك زیاتر هەست بە ئارامی دەكەن، كاتێك پەنا دەبەن بۆ تۆڕە كۆمەڵایەتیەكان واتە خەمۆكی هۆكاری بەكارهێنانی تۆڕە كۆمەڵایەتیەكانە نەك بە پێچەوانەوە.

لە دنیایی پەیوەندیە كۆمەڵایەتیەكاندا ئێمە بوینەتە كاڵا و ڕازیبووین بەوەی كە ژیان و كار و گەشت و پەیوەندیەكانمان ئاشكرا و زانراو بن لەسەر تۆڕە كۆمەڵایەتیەكان و تەنانەت بۆ كەسانی نەناسراویش وە ئەو كاڵایەمان كە وەكو پێویست سەرسامی و لایك وەرناگرێت. هەوڵدەدەیت بیشاریتەوە یاخود بیسڕیتەوە تەنانەت ئەگەر ناوەڕۆكەكەشیمان زۆر بەدڵ بێت.

كەواتە پێگەكانی تۆڕە كۆمەڵایەتیەكان هەتا دێت پەیوەندییان بەرزتر دەبێت لە دڵەڕاوكێ و نەخۆشی خەمۆكیەوە، چونكە تۆڕە كۆمەڵایەتیەكان دەبنە هۆی دروستبوونی گوشاری جۆراوجۆر لەسەر ئەوەی كە هەوڵدەدات ببێتە جوانترین وێنە و گرنگترین دەستكەوت و چركەسات و ڕووداو.

بوونی مرۆڤ و ژیان و چالاكیەكانی بە كاڵایەكی تۆڕە كۆمەڵایەتیەكان دەبێتە هۆی دابەزینی متمانەی مرۆڤ بە خۆی هەروەها تۆڕە كۆمەڵایەتیەكان وا لە مرۆڤ دەكەن ئارەزوویان ئەوە بێت هەمیشە لە پەیوەندیدا بێت نەبادا ڕووداوێك یان پەیوەندیەكی كە لە كیسی بچێت. ئەم جگە لەوەی كە بەكارهێنانی تۆڕە كۆمەڵایەتیەكان زۆرجار دەبێتە ئەزمونێكی ترسناك.

 

ئامارەكان پێمان دەڵێن: لە %40ی بەكارهێنەرانی تۆڕە كۆمەڵایەتییەكان بێزاركراون و تووشی ناڕەحەتی و توڕەبوون و تەنانەت گێچەڵ پێكردنیش بوون.

كەم نین ئەو ڕووداوی خۆكوشتنانەی كە بەهۆی بڵاوكردنەوەی وێنە و زانیاری لە تۆڕە كۆمەڵایەتیەكاندا ڕوویانداوە بەردوامبوونی ئەو بەشداریكردنە نەخوازراوانە و ئەو بێزاركردن و گێچەڵ پێكردنانە ووردە ووردە كەڵەكە دەبن و دەبنە مایەی دروستبوونی چەندین كێشەی دەروونی .

كاتێك كە پۆستێك یان بابەتێك لە تۆڕە كۆمەڵایەتیەكاندا دەبێتە مایەیی سەرسامی و دڵخۆشی كەسێك، هەستێكت لا دروست دەبێت كە دەرەنجامی ڕژانی هۆرمۆنی دۆپامینە كە پێی دەگوترێت هۆرمۆنی دڵخۆشی وات لێ دەكات سەیری ئەو لایك و كۆمێنتە خۆشانە بكەیت تا زیاتر هەستی خۆشی و چێژ وەرگرتنت لە لا دروست ببێت لەگەڵیدا هەست بكەیت بە بەرزبوونەوەی بایەخە كۆمەڵایەتیەكەت . سەرەنجام وات لێ دێت بكەویتە بارێكی دەروونی واوە كە هەموو حەز و بایەخێكت چڕ ببێتە لە بەدواداچوونی هەڵوێستی هاوڕێكان و ژمارەی لایك و پەسەنكردنەكانی دیكە و دەترسیت مەسەلەیەك یان قسەیەكت بەسەردا تێبپەڕێت ئەمانەش هەموویان هۆكاری دروستبوونی دڵەڕاوكێ و خەمۆكین.

كەس ناتوانێت بڵێت تۆڕە كۆمەڵایەتیەكان پێویست و كاریگەرنین لە ژیانماندا ئەم تۆڕە كۆمەڵایەتیانە كەرەستەی هاوچەرخن بۆ پەیوەندی كردن و ژیانی كۆمەڵایەتی هاوچەرخ، بەڵام لایەنە تاریكەكەی ئەم دەستكەوتە تەكنەلۆجییە تەنیا مرۆڤ خۆیەتی، واتە ئەو مرۆڤانەی كە بڕیارین داوە كەرەستەكە بە هەڵە بەكاربهێنن. واتە خراپ بەكارهێنانی ئامێرەكە سەرچاوەی كێشەكەیە نەك خودی تۆڕە كۆمەڵایەتیەكان .

شارەزایانی بواری دەروونناسی هاوچەرخ دەڵێن: بۆ بەكارهێنانی تۆڕە كۆمەڵایەتیەكان بە شێوەیەكی ئەرێنی پێویستە تێبگەین كە كێشەكە لە بەكارهێنەردایە نەك لە خودی ئامێرەكە هەروەها پێویستە زۆر بە شوێن كاردانەوەی نوسین و وێنەكانمان نەكەوین و ئەگەر هەستت كرد كەسێك دەبێتە هۆی كەمبوونەوەی متمانەت بە خۆت بلۆكی بكە و لە هەمان كاتدا هەوڵبدە خۆت نەبیتە سەرچاوەی بێزاركردن و سوكایەتیكردن بە هیچ كەسێك، چونكە هەرگیز ئەوە مەسەلەیەكی سروشتی نیە مرۆڤ بە شكاندنی كەسێكی دیكە هەست بە دڵخۆشی  بكات.

سەرچاوە : ماڵپەڕی ئەلمەیدان 
ئامادەكردن و وەرگێڕانی : دواڕۆژ



  • ڕۆژ
  • هەفتە
  • مانگ
created by Avesta Group and powered by Microsoft Azure