حه‌سه‌ن سلێڤانه‌یى: ل دھۆکێ چ دەزگەھێن تایبەت ب وەرگێرانێ نینن

هەواڵ / چاوپێکەوتن :: 27/07/2019‌ :: 340‌ جار بینراوە
حەسەن سلێڤانی:

دواڕۆژ، چافپێکەفتن: رەڤەند گوھەرزی

"قەیرانا دارایی ماڵ ل ئێکەتیامە خەراب کر".. ئەڤە گۆتنێن حه‌سه‌ن سلێڤانه‌یى سەرۆکێ ئێکەتیا نڤیسەرێن کورد تایێ دھۆکێ-یە، د چافپێکەفتنەکا دواڕۆژ دا دبێژیت:"مەخابن ل ساڵا ٢٠١٤ ھەتا ئەڤرۆ ب ئێکجاری چ دەرگەھێن پشتەڤانیێ و ھاریکاریێ نەماینە". گۆت:"ئەگەر مەیدانا رەوشەنبیری لاواز بیت چەند دەستکەفتێن مە ھەین ل بەربایینە".

دواڕۆژ: بۆچی ھەتا نوکە کونگرێ حەفتێ یێ ئێکەتیا نڤیسەرێن کورد تایێ دھۆکێ نەھاتیە بەستن؟
حه‌سه‌ن سلێڤانه‌یى:
ئێکەتیا نڤیسەرێن کورد مەلبەندێ گشتی یێ ھەی، مەلبەندێ گشتی کونگرێ خوە ئەنجامددەت، کو ل تەموزا ٢٠١٠ کونگرێ خوەیێ ھەشتی ل سلێمانیێ گرێدابوو، ب پشکداریا دھۆک، ھەولێر، سلێمانی و کەرکوکێ مەلبەندەکێ گشتی بۆ ھاتە ھەلبژارتن، ل ساڵا ٢٠١٤ کونگرێ نەھێ گرێدەت دیڤدا ل پارێزگەھێن کوردستانێ کونفرانسێن خوە یێن نافخۆی بکەن، لێ ھاتنا داعش ئەگەرەکێ سەرەکی بوو کو نەھاتە گرێدان، نوکە ھندەک زانیاری ھەنە کو مەلبەندی گشتی بەلکی بشێت ئەڤ ساڵە کونگرێ خوەیێ نەھێ گرێدەت.

دواڕۆژ: مەرجێن ئەندابوونێ ل ئێکەتیا نڤیسەران چنە؟
حەسەن سلێڤانەی: ل دیف رێنمایێن کونگرێ ئێکەتیا نڤیسەرێن کورد یێ ھەشتێ ساڵا ٢٠١٠ خالا سەرەکی ئەوە نڤیسەری دوو بەرھەمێن چاپکری ب زمانێ کوردی  ل دەزگەھەکێ سەنگا خۆ ھەی چاپکربیت دبوارێن ئەدەبیاتدا ب تایبەت، ھەلبسەت، چیرۆک، رومان و ڤەکولینێن رەخنەی و دەقێن شانویێ، دھەماندەمدا ئاکنجیێ ھەرێمێ بیت، ئەڤە مەرجێن سەرەکینە، پشتی کونگرێ ھەشتێ مە ل دھۆکێ کومەکا ئەندامێن نوی یێت وەرگتی و ژمارا وان ژی نزیکی ٣٠ نڤیسەران دبیت.

دواڕۆژ، دھێتە گوتن ژمارا ئەندامێن ئێکەتیا نڤیسەرێن کورد تایێ دھۆکێ زۆرن، ئایا ئەڤ گوتنە راستە و ئەو رێژەیە ھەمی نڤیسەرن؟
حەسەن سلێڤانەی: دەمێ مەرجێن ئەندامەتیێ ژی بگرن، ئەم نەچارین قەبۆل بکەین و قەبۆلکرنا ئێکی ژلایێ مەیە و دھێتە رەوانەکرن بۆ مەڵبەندێ گشتی داوی بڕیار یاوانایە.

دواڕۆژ: پشتی دروستبوونا قەیرانا دارایی ل ھەرێما کوردستانێ وێ یەکێ چ باندۆر کرە سەر بزاڤ و چالاکیێن ھەوە؟ 
حەسەن سلێڤانەی: قەیرانا دارایی ماڵ ل ئێکەتیا مە خەرابکر، باندۆرەکا گەلەک یا خەراب ھەبی، چونکی ئێکەتیا نڤیسەرێن کورد لقێ دھۆکێ چەند پرۆژەیێن مەزن ھەبین، ئێک ژوانا ژوەشانا ئێکەتیا نڤیسەرێن کورد چاپکرنا پەرتۆکا بی، ٣٠١ پەرتۆک بۆ ئەندامێن خوە و ھندەک نڤیسەرێن دی ژباکور و رۆژاڤا و رۆژھەڵات و دەرڤەی کوردستانێ مەچاپکرن، لێ مەخابن ل ساڵا ٢٠١٤ ھەتا ئەڤرۆ ب ئێکجاری چ دەرگەھێن پشتەڤانیێ و ھاریکاریێ، نەتەنێ بۆ ئێکەتیا نڤیسەرێن کورد لقێ دھۆکێ، بەلکی بۆ مەلبەندێ گشتی و ھەولێرێ و سلێمانی و کەرکوکێ نەمایە، ئەڤە تشتەکێ خەرابە و زرارێ دگەھینیتە مەیدانا رەوشەنبیریا کوردی. ئەم ھیڤیدارین حکومەتا نوێ چاڤەکێ ل ڤی بابەتی بخشینیت و ئەو ھاریکاریا بەرێ کو حکومەتا ھەرێمی دھنارت ڤەگەرینیتەڤە، چونکی ئەگەر مەیدانا رەوشەنبیری لاواز بیت چەند دەستکەفتێن مە ھەین ل بەربایینە، ب تەنێ ب رەوشەنبیریێ تۆ دشێی مروڤێ خوە ئاڤا بکەی.

دواڕۆژ: ل ساڵا ٢٠١٤ ھەتا نوکە چەند پەرتۆک ھەوە ل دھۆکێ چاپکرن؟
حەسەن سلێڤانەی: مە چ پەرتۆک چاپ نەکرینە، چونکی چ ھاریکاری بوومە ناھێت ژحکومەتا ھەرێما کوردستانێ و ژبەر ھندێ وەکو ئێکەتیا نڤیسەرێن کورد مە نەشیایە چ پەرتۆکان چاپ بکەین و مە ئەو پرۆژە یێ راوەستاندی، مەخابن بەرەف مرنێ ڤەچوو.

دواڕۆژ: ل دھۆکێ وەرگێران دچ ئاستەکێدایە؟
حەسەن سلێڤانەی: لڤینەکا وەرگێرانێ یاھەی، لێ نەل وی ئاستیە کو مروڤ حەز بکەت یا لاوازە، مە ل دھۆکێ چ دەزگەھێن تایبەت ب کارێ وەرگێرانێ رابن ب فەرمی نینن، بۆ نموونە مە خانا وەرگێرانێ نینە، سلێمانیی و ھەولێرێ یێن ھەین و گرێدای وەزارەتا رەوشەنبیری نە، لێ مەخابن دھۆکێ ژێ بێ بەھرە، ئەڤە ژی ئێک ژئەرکێن وەزارەتا رەوشەنبیری یانوی بیت کو خانا وەرگێرانێ وەک پارێزگەھێن دیتر ل دھۆکێ ژی ھەبیت، ھاریکاریە باش ھەبیت ئەو کەسێن شارەزا ل وەرگێرانێدا لێ ببن خودان ئەو بزاڤا وەرگێرانێ ئەو ھەی بزاڤەکا کەسوکی-یە، چەند نڤیسەرەک پێ رادبن، دوی بیاڤیدا من یێ کارکری، دوارێ ھەلبەستێ و چیرۆکێدا من چەند پەرتۆک وەرگێراینە سەر زمانێ عەرەبی.

دواڕۆژ: ھەوە ئەندامێن ژن ھەنە ل ئێکەتیا نڤیسەرێن کورد تایێ دھۆکێ، ژن شیاینە دڤی بیاڤیدا بێھنە پێش؟
حەسەن سلێڤانەی: بەلێ مەیێن ھەیی لێ مەخابن رێژەیەکا کێمە، نزیکی١٤ ئەندامێن ژن مە ل ئێکەتیا نڤیسەرێن کورد ھەنە ل دھۆکێ، ھەر ئێک بزاڤەکێ دوارێ خودا دکەت.

دواڕۆژ: پەیوەندیێن ھەوە دگەل نڤیسەرێن پارچێن دی یێن کوردستانێ دچاوانە؟
حەسەن سلێڤانەی: ساڵێن پێشیێ پەیوەندیێن مە گەلەک دخورت بین، ب تایبەت مە ڤیستەڤاڵا دھۆک یا رەوشەنبیری ھەبی ل ٢٠٠٥ مە دەستپێکر یا دووێ ٢٠٠٦ و یا سیێ ٢٠١٠ و یا چوارێ ٢٠١٦ ھەر جارەکێ ٤٠ بۆ٥٠ نڤیسەرێن باکور و رۆژھەڵات و رۆژاڤا و ئەورۆپا دھاتنە ڤەخواندن بۆ باژێرێ خوە ل دھۆکێ و پشکداری دڤیستەڤاڵا مەدا دکرن و بەرھەمێن خوە پێشکێش دکرن، ئەو دبی پێنگاڤەک کو ئەم ئێک و دوو ببینین و ناسکرنەکا بەفرەھـ چێ ببیت، ب تایبەت بۆ نڤیسەرێن مەزن ل سوڤیەتا بەرێ و کازاخستانێ و ئەرمینیا ھەبین پتریا وان ھاتنە ڤەخواندن بۆ دھۆکێ، گەلەک ژوان ژی ساڵ رۆژێن وان مە ساخکرن ب رەنگەکێ بەرفرەھـ، ڤێ یەکی وەدکر کو مەیدا رەوشەنبیری دوەرارێدا بیت و رۆیێ گەشێ باژێرێ دھۆکێ ڤەگوھێزین بۆ خەلکێ دی، چونکی حکومەتا ھەرێما کوردستانێ ھاریکایەکا دارایی یا باش بۆ ئێکەتیا مە ب رەنگەکێ فەرمی و ب رێیا وەزارەتا دارایی تەرخان کربی، مەدشیا وان کاران بکەین و مە دیدارا نەورۆز یا ھەلبەستێ ژی ھەبی.

دواڕۆژ: تە چ گوتنەک ھەیە بۆ نڤیسەرێن گەنج و ئەوێن دخوزان ببنە ئەندامێن ھەوە؟
حەسەن سلێڤانەی: تەنێ ئەز دشێم بێژم، ئێکەم جار بۆ خوە و بۆ ھەر خویندەڤان و نڤیسەرەکێ حەش مەیدانا ئەدەبی دکەت تەنێ بخوینینت، بخوینیت و بخوینینت، خویندن تشتەکێ گەلەکێ گرنگە، ئەو دشێت مروڤی ئاڤا کەت.

پ: ل. م



created by Avesta Group and powered by Microsoft Azure