بكۆژێ گه‌نجێ سێمێلێ هاته‌ ده‌سته‌سه‌ركرن

هەواڵ / کوردستان :: 26/07/2019‌ :: 224‌ جار بینراوە

دواڕۆژ، بورهان یه‌حیا

رێڤه‌به‌رییا پۆلیسێن پارێزگه‌ها دهۆك راگه‌هاند؛ بكۆژێ گه‌نجێ 35 سالى یێ ئاكنجیێ ده‌ڤه‌ردارییا سێمێل هاتیه‌ گرتن و دناڤبه‌را وان دا كێشه‌یه‌كا جڤاكى هه‌بوویه‌. 


هێمن سلێمان به‌رپرسێ راگه‌هاندنا رێڤه‌به‌رییا پۆلیسێن پارێزگه‌ها دهۆك بۆ دواڕۆژ دیاركر" ل رۆژا 23 ته‌مووز 2019 پۆلیسێن سێمێل ژلایێ وه‌لاتى عه‌لى سالح هاتنه‌ ئاگه‌هداركرن كو كۆڕێ وان یێ 35 سالى بۆ ده‌مێ رۆژه‌كێ یه‌ ژ مال ده‌ركه‌ڤتییه‌ و چ پێزانین سه‌ر نینن و داخوازا هاریكارییا ژلایێ پۆلیسان هاتییه‌كرن و ئێكسه‌ر پۆلیسان ده‌ست ب كۆمكرنا پێزانینان كرن و دووڤچۆنا بابه‌تى هاتییه‌كرن و پشتى دوو رۆژان ته‌رمێ ڤى گه‌نجى ل ئاقارێ گوندێ جێمجڤانی سه‌ر ب سێمێلێ هاته‌ دیتن".

دیاركر" ژلایێ پۆلیسان ڤه‌ ته‌رمێ ڤى كه‌سى بۆ نۆژدارییا داد هاته‌ فرێكرن بۆ زانینا ئه‌گه‌رێن دروست یێن مرنا وى و د راپۆرتا نۆژدارى دا دیاربوو كو ئه‌و كه‌س هاتییه‌ كوشتن و دووڤدا ته‌رمێ وى هاتییه‌ سۆتن و ئێكسه‌ر تیمه‌كێ تایبه‌ت یێ پۆلیسان بۆ ده‌ستنیشانكرنا بكۆژى هاته‌ پێكئینان".

هێمن سلێمان خویاكر" پشتى دووڤچۆنا پۆلیسان و كۆمكرنا پێزانینان تۆمه‌تبارێ كوشتنا ڤى گه‌نجى هاته‌ ده‌سته‌سه‌ركرن كو ئاكنجیێ سێمێلێ یه‌ و ژیێ وى ژى 49 سالن و د ڤه‌كۆلینێن ده‌ستپێكى دا دانپێدان ب ئه‌نجام دانا ڤى تاوانى كرینه‌ كو ژبه‌ر كێشه‌یه‌كا جڤاكى بوویه‌ و ب گۆره‌ى قانوونا 406 یاسا سزا ئیراقى هاتییه‌ زیندانكرن هه‌تا دادگه‌هـ بڕیارا دووماهیێ سه‌ر بده‌ت".



created by Avesta Group and powered by Microsoft Azure