به‌ریه‌ككه‌وتنى به‌هاكان.. میسر وه‌ك نموونه‌

هەواڵ / ڕاپۆرت :: 25/07/2019‌ :: 153‌ جار بینراوە

دواڕۆژ

له‌ ماوه‌ى رابوردوودا میسر زنجیره‌یه‌ك رووداوى ناخۆش و سه‌رنجراكێشى واى به‌خۆوه‌ بینى كه‌ ده‌نگدانه‌وه‌یه‌كى گه‌وره‌ى له‌ راى گشتیدا دروستكرد و زۆر نامۆ بوون به‌ كۆمه‌ڵگاى میسرى كه‌ كۆمه‌ڵگایه‌كى خۆپارێز و باوه‌ڕداره‌. به‌شى زۆرى رووداوه‌كان په‌یوه‌ندییان هه‌یه‌ به‌ سێكسه‌وه‌. 


له‌ وڵاتى میسردا مه‌سه‌له‌ى سێكس یه‌كێكه‌ له‌ مه‌سه‌له‌ حه‌رامه‌كان: قبوڵناكرێت به‌ ئاشكرا باسبكرێت و ته‌نیا له‌ڕێى هاوسه‌رگیرییه‌وه‌ مرۆڤ ده‌توانێت سێكسى ده‌ستكه‌وێت به‌جۆرێك كه‌ له‌ڕووى كۆمه‌ڵایه‌تى و سیاسییه‌وه‌ قبوڵكرابێت.

ئه‌مه‌ له‌كاتێكدایه‌ كه‌ كۆمه‌ڵگاى میسرى كراوه‌ته‌وه‌ به‌ڕووى جیهاندا له‌ڕێى ئینته‌رنێت و تۆڕه‌ كۆمه‌ڵایه‌تییه‌كانه‌وه‌، ئه‌و جیهانه‌ى كه‌ ئێستا زۆربه‌ى وڵاته‌كانى به‌جۆرێك مامه‌ڵه‌ له‌گه‌ڵ سێكسدا ده‌كات وه‌ك یه‌كێك له‌ پێداویستییه‌ بنه‌ڕه‌تییه‌كان له‌ بناغه‌ى هه‌ڕه‌مى پێویسته‌ مرۆڤایه‌تییه‌كاندا.

له‌م كه‌شوهه‌وایه‌دا میسرییه‌كان وه‌ك زۆرێك له‌ وڵاته‌ موسوڵمانه‌كان ئێستا دوو هێز رایان ده‌كێشێت، هێزى دابونه‌ریت كه‌ پرینسیپه‌ بنه‌ڕه‌تییه‌كانى چه‌ندان سه‌ده‌یه‌ داڕێژراون و له‌ بارودۆخێكدا هاتوونه‌ته‌ ئاراوه‌ ته‌واو جیاواز له‌ بارودۆخى ئێستا. هێزه‌كه‌ى تریش ئه‌و واقیعه‌یه‌ كه‌ له‌ كه‌لتورێكى كراوه‌تر و پراگماتیزه‌تر به‌سه‌ریدا زاڵه‌ له‌ مه‌سه‌له‌ى مامه‌ڵه‌كردن له‌گه‌ڵ كێشه‌ و پێویستیه‌ بنه‌ڕه‌تییه‌كانى مرۆڤدا. ئه‌م راكێش راكێشه‌ ئێستا پرسیارێكى هێناوه‌ته‌ ئاراوه‌ كه‌ ئایا میسرییه‌كان له‌ڕووى سێكسییه‌وه‌ به‌دبه‌ختن. ئایا وه‌كو پێویست رێگاى گرتووه‌ته‌به‌ر بۆ شێركردنى ئه‌م پێویستییه‌ سروشتییه‌ كه‌ پێشتر له‌ كۆمه‌ڵگاى میسردا ده‌گمه‌ن و ناوازه‌بوون وه‌ك زیناكردن له‌گه‌ڵ كه‌سانى مه‌حره‌مدا، یان ده‌ستدرێژى كردن له‌ناو خێزان و ده‌ره‌وه‌ى خێزاندا یان گێچه‌ڵ كردن یان زیاده‌ڕه‌وى كردن له‌ بینینى ماڵپه‌ڕه‌ سێكسییه‌كاندا یان گۆڕینه‌وه‌ى ژنه‌كان یان ده‌ستدرێژى سێكسى بۆسه‌ر منداڵ یان هاوڕه‌گه‌زبازى؟

به‌ریه‌ككه‌وتنى به‌هاكان
پسپۆڕانى بوارى كۆمه‌ڵناسى ده‌ڵێن به‌ڵێ میسرییه‌كان له‌ڕووى سێكسییه‌وه‌ به‌ش خوراون له‌ بارودۆخێكدا كه‌ ئه‌و وڵاته‌ و هه‌موو ناوچه‌ى خۆرهه‌ڵاتى ناوه‌ڕاست به‌ گۆڕانكارى و هه‌ژانى كۆمه‌ڵایه‌تى گه‌وره‌دا تێده‌په‌ڕن. ئه‌م گۆڕانكارییانه‌ پێش به‌هارى عه‌ره‌بى هاتوونه‌ته‌ ئاراوه‌ و رووداوه‌كانى به‌هارى عه‌ره‌بى قووڵتر و به‌رفراوانترى كردن.

گۆڕانكارییه‌كان كه‌ روو ده‌ده‌ن به‌ر دیوارێكى به‌هێز ده‌كه‌ون كه‌ پێى وایه‌ میسر هێشتا  گه‌لێكى خۆپارێز و موسڵمانه‌. ئه‌مه‌ راست نییه‌، چونكه‌ ئه‌گه‌ر وردبینه‌وه‌ ده‌بینین میسر دووهه‌م وڵاته‌ له‌ جیهاندا كه‌ سه‌ردانى ماڵپه‌ڕه‌ سێكسییه‌كان ده‌كات و له‌دواى ئه‌فغانستانیش دووهه‌مین وڵاته‌ كه‌ گێچه‌ڵى سێكسى تیایدا به‌ربڵاوه‌، كه‌واته‌ واقع شتێكه‌و له‌خۆ روانینه‌كه‌ش شتێكى تره‌. دیاره‌ راگه‌یاندن رۆڵێكى گرنگى هه‌یه‌ له‌ گه‌وره‌كردنى رووداوه‌كاندا. كۆمه‌ڵناسه‌كان ده‌ڵێن له‌ كۆمه‌ڵگاى ئه‌مڕۆى وڵاتانى خۆرهه‌ڵاتى ناوه‌ڕاستدا هه‌موو شتێك له‌رزۆكه‌، كه‌سایه‌تییه‌كان و به‌هاكان و مه‌سه‌له‌كانى دیكه‌ش. جگه‌ له‌وه‌ش ئێستا بارودۆخێك هاتووه‌ته‌ پێشه‌وه‌ كه‌ ئێمه‌ چیتر له‌ به‌هاكانماندا یه‌كگرتوو نین.

جیاوازى نێوان ئێمه‌ و خۆرئاوا له‌وه‌دایه‌ كه‌ ئه‌وان به‌ راشكاوى باسى كێشه‌كه‌ ده‌كه‌ن و ده‌ست ده‌كه‌ن به‌ چاره‌سه‌رى به‌ڵام كه‌لتوورى ئێمه‌ كه‌لتوورى شاردنه‌وه‌ و نكۆڵیكردنه‌ له‌ كێشه‌كان بۆیه‌ كه‌ڵه‌كه‌ ده‌بن. كۆمه‌ڵگاى ئێستا به‌ده‌ست ئه‌وه‌وه‌ ده‌ناڵێنێت كه‌ به‌ها كۆنه‌كان به‌ر به‌ها تازه‌كان ده‌كه‌وێت و به‌ها كۆنه‌كان شێوازى نوێ وه‌رده‌گرن به‌ڵام ئه‌مه‌ هیچ له‌ مه‌سه‌له‌كه‌ ناگۆڕێت. سه‌رده‌مى من جیاوازه‌ له‌ سه‌رده‌مى باوك و باپیرم بۆیه‌ ئه‌و به‌هایانه‌ى كه‌ له‌ زه‌مانى ئه‌واندا حوكمیان كردووه‌ ره‌نگه‌ بۆ سه‌رده‌مى ئێمه‌ نه‌گونجێت.

له‌ كۆتایى حه‌فتاكانه‌وه‌ توندڕه‌وى به‌ پله‌ى جۆراوجۆر له‌ وڵاتانى ناوچه‌كه‌دا له‌ په‌ره‌سه‌ندندان، شانبه‌شانى ئه‌مه‌ش گه‌نده‌ڵیى و دیارده‌ دزێوه‌كانى تر. پێوه‌ره‌كان بوون به‌ دووفاقیى و ناته‌واو. كۆمه‌ڵگاى میسریى به‌ رواڵه‌ت ئیمانداره‌، كۆمه‌ڵگاى حیجاب و په‌چه‌ و ریشى درێژه‌ كه‌چى له‌ولاوه‌ چیرۆكى سه‌یر سه‌یر ده‌بیستیت سه‌باره‌ت به‌ گۆڕینه‌وه‌ى هاوسه‌ره‌كان و گێچه‌ڵى سێكسیى و ده‌ستدرێژیكردنه‌ سه‌ر منداڵ.

تاقه‌ رێگه‌ى رێپێدراو له‌ڕووى كۆمه‌ڵایه‌تی و یاساییه‌وه‌ بۆ ئه‌نجامدانى سێكس ته‌نیا هاوسه‌رگیرییه‌. ئه‌مه‌ ئێستا چه‌ندین كێشه‌ى هاتووه‌ته‌ رێ. خه‌رجییه‌كى زۆرى ده‌وێت له‌ بارودۆخێكى ئابووریى زۆر دژواردا بۆیه‌ ژماره‌ى قه‌یره‌ كچه‌كان له‌ ئاستێكى نائاسایى به‌رزبوونه‌ته‌وه‌، شه‌ڕ و ناخۆشیش له‌نێوان خێزانه‌كاندا له‌ قۆناغى گواستنه‌وه‌ و دواتریشدا زیاتر و زیاتر ده‌بن ئه‌مه‌ جگه‌ له‌و كێشه‌ و قه‌یرانانه‌ى كه‌ له‌ ساڵه‌كانى سه‌ره‌تاى هاوسه‌رگیریدا له‌نێوان ژن و مێرداندا ده‌ته‌قنه‌وه‌.

ئاماره‌كان ده‌ڵێن: رێژه‌ى ته‌ڵاق گه‌یشتووه‌ته‌ ده‌وروبه‌رى 50%. هۆكارى 80%ى ئه‌م ته‌ڵاقدانانه‌ش كێشه‌ سێكسییه‌كانه‌. سه‌رقاڵى پیاو و پیاڕانه‌گه‌یشتن به‌ ژنه‌كه‌ى یاخود به‌ پێچه‌وانه‌وه‌ تواناى زۆرى پیاو زیاتر له‌وه‌ى كه‌ ژنه‌كه‌ى به‌رگه‌ى بگرێت 30%ى هۆكاره‌كانى ته‌ڵاقن.

كۆمه‌ڵناسان ده‌ڵێن: خه‌ڵكى وڵاتانى دواكه‌وتوو تێڕوانینێكى هه‌ڵه‌یان بۆ په‌یوه‌ندى سێكسى هه‌یه‌. پیاو وا سه‌یرى سێكس ده‌كات كه‌ غه‌ریزه‌یه‌كه‌ و پێویسته‌ تێر بكرێت، به‌ڵام ژن پێى وایه‌ سێكس رێگایه‌كه‌ بۆ ده‌ربڕینى خۆشه‌ویستى بۆ مێرده‌كه‌ى. بۆیه‌ ئه‌گه‌ر ناكۆكییه‌ك هه‌بێت له‌نێوان ژن و مێرده‌كه‌دا، پیاوه‌كه‌ گوێ ناداتێ و ده‌یه‌وێت زۆر ئاسایى غه‌ریزه‌كه‌ى تێر بكات به‌ڵام به‌لاى ژنه‌وه‌ ئه‌مه‌ كارێكى سه‌خته‌.

هۆكارێكى دیكه‌ مه‌سه‌له‌ى په‌روه‌رده‌یه‌، زۆربه‌ى ژنان ئێستاش وا راهاتوون كه‌ داخوازیى و ئاره‌زووه‌كانیان بشارنه‌وه‌. شه‌رم و خه‌جاڵه‌تى كێشان خه‌سڵه‌تێكى زاڵه‌ به‌سه‌ر ژناندا به‌ڵام ئێستا له‌گه‌ڵ گه‌شه‌كردنى ژیاندا ئافره‌تان كراوه‌تر بوون و زانیارى و تێگه‌یشتنیان زیاتر بووه‌. به‌ڵام هه‌ندێك له‌و زانیارییانه‌ى كه‌ پێیان ده‌گه‌ن زانیارى هه‌ڵه‌ن چونكه‌ له‌ڕێى ئینته‌رنێت و هاوڕێكانیانه‌وه‌ ئه‌و زانیارییانه‌یان ده‌ستده‌كه‌وێت. باوكان و دایكان له‌م رووه‌وه‌ هیچ قسه‌یه‌ك بۆ كچ و كوڕه‌كانیان ناكه‌ن.

پسپۆڕانى په‌یوه‌ندییه‌ هاوسه‌رگیرییه‌كان ده‌ڵێن سێكس وه‌ك هه‌موو غه‌ریزه‌یه‌كى تر پێویسته‌ بۆ به‌رده‌وامبوونى ژیان به‌ڵام به‌لاى مرۆڤه‌وه‌ ته‌نیا هه‌ر بۆ ئه‌وه‌ نییه‌ به‌ڵكو بۆ چێژوه‌رگرتنیشه‌.

سه‌رچاوه‌: رۆژنامه‌ى ئه‌لنه‌هارى لوبنانى

بڵاوكردنه‌وه‌:هـ.ق



created by Avesta Group and powered by Microsoft Azure