دواین زانیاری له‌باره‌ى رووداوه‌كانی داقوق

هەواڵ / کوردستان :: 25/07/2019‌ :: 222‌ جار بینراوە

دواڕۆژ، عیماد جەباری

شەوی رابوردوو بەهۆی چەند رووداوێکی ئەمنییەوە لەسنوری قەزای داقوق هه‌شت  شەهیدو چوار برینداری لێکەوتەوە.


سەرەتای رووداوەکان هاوانبارانکردنی گوندی دارای ناوچەی حەفتەغاربوو کە بەهۆیەوە هاووڵاتییەک شەهیدو سێی دیکەش برینداربوون.

محەمەد ئیبراهیم ئەنجومەنی گوندی دارا بەدواڕۆژی وت: "پێنج گولـلە هاوەن کەوتووەتە نێو گوندی دارا و یەکێکیان بەر خانووی هاووڵاتییەک کەوتووەو بەهۆیەوە ژنێک شەهیدبووەو مێرده‌كه‌ی و دوو منداڵیشی برینداربوون".

وتیشی: "ژنەکە ناوی فەوزیە عەبدوڵایەو تەمەن 66 ساڵه‌، دوای ماوەیەک مانەوە لەنەخۆشخانەی داقوق، بەهۆی سەختی برینەکەیەوە گیانی لەدەستدا".

لەدوای رووداوەکەش لەلایەن ژمارەیەک چەکداری نەناسراوەوە دەستڕێژی گولـلە لەئۆتۆمبێلی هاووڵاتییەک کراوەو حه‌وت ئەندامی خێزانەکە بوونەتە قوربانیی.

محەمەد ئیبراهیم رایگەیاند کە هاووڵاتی محەمەد جەعاتە به‌ ره‌گه‌ز عەرەب كه‌ دەیان ساڵە دانیشتووی ناوچەی حەفتەغاری کوردنشینە، لەگەڵ شه‌ش لەئەندامانی خێزانەکەی شەهیدبوون و بەتەنیا منداڵێکی تەمەن دوو ساڵ بەبرینداری رزگاری بووە.

لەکاتی گەیاندنی شەهیدو بریندارەکانیش بۆ نێو نەخۆشخانەی داقوق، دەمەقاڵە کەوتووەتە نێوان ئەفسەرێکی پۆلیسی نەهێشتنی تاوانی داقوق و هێزەکانی پۆلیسی ئیتیحادییەوە کە بەهۆیەوە پۆلیسێکی ئەو هێزە تەقەی لەئەفسەرەکە کردوەو کوشتوویه‌تی.

سەرچاوەیەک لەپۆلیسی داقوق بەدواڕۆژی راگەیاند، ملازم محەمەد قاسم ئەفسەری نەهێشتنی تاوانی نووسینگەی داقوق بەسەختی برینداربوو و لەکاتی گواستنەوەی بۆ نەخۆشخانەی ئازادی شاری کەرکوک گیانی لەدەستدا.

وتیشی: "کەسوکاری ئەفسەرەکە کە لەپێکهاتەی تورکمانن، بۆ ماوەیەک رێگەی کەرکوک بەغدایان داخست و داوایانکرد هێزه‌کانی پۆلیسی ئیتیحادی لەقەزاکە بچنە دەرەوە".

لەو بارەیەوە ئازاد رۆستەم لێپرسراوی کۆمیتەی داقوقی یەکێتی بەدواڕۆژی راگەیاند: لەدوای رووداوی کوشتنی ئەفسەرەکە، پۆلیسەکەی ئیتیحادی هەڵاتووە بەرەو شوێنێکی نادیار.

پێداچوونه‌وه‌و بڵاوكردنه‌وه‌: ئیحسانی مه‌لا فوئاد



created by Avesta Group and powered by Microsoft Azure