فڕەنسا خۆی بۆ گەرمایەكی بێ وێنە ئامادە دەكات

هەواڵ / جیهان :: 23/07/2019‌ :: 3362‌ جار بینراوە

تاگ :: جیهان

دواڕۆژ

دانیشتوانی پاریسی پایتەختی فڕەنسا خۆیان ئامادە دەكەن بۆ ڕووبەڕووبوونەوەی گەرمبوونی شارەكەیان بە ئاستێكی وا كە لە مێژوودا وێنەی نەبووە.

 

ئەم خۆئامادەکردنەی فڕەنسییەکان لە كاتێكدایە كە شەپۆلێكی تازەی گەرما باكوری ئەوروپای گرتووەتەوە، (ئەمڕۆ 23ی تەمموزی 2019) پلەی گەرما لە پاریسدا 30 پلەی سەدی تێپەڕاند، بەڵام پێشبینی دەكرێت ڕۆژی پێنجشەممەی داهاتوو 40 پلەی سەدی تێپەڕ بكات و ئەو ئاستە تێبپەڕێنێت كە ساڵی 1947 تۆماركراوە.

 

سەنتەرەكانی كەشناسی پێشبینی دەكەن ئەم دۆخە چەند رۆژێك بەردەوام بێت و باكوری فڕەنسا و چەند ناوچەیەك لە هۆڵەندا و بەلجیكا و لۆكسمبۆرگ بگرێتەوە كە بۆ یەكەمجار پلەی گەرما تیایاندا بگاتە 40 پلە.

 

ئەم شەپۆلەی ئێستا دووەمین شەپۆلە پاش ئەو شەپۆلە گەرمایەی كە كەمتر لە مانگێك لەمەوبەر، واتە لە كۆتایی مانگی حوزەیراندا ئەوروپای گرتەوە و مەسەلەی گەرمبوونی زەوی هێنایەوە بەر باس.

 

گەرماكەی ئەمساڵی ئەوروپا زیان دەگەیەنێت بە بەرهەمە كشتوكاڵییەكانی وەك پەتاتە و ترێ.

 

نووسینگەی كەشناسی فڕەنسی دەڵێت: پێشبینی دەكرێت رۆژی پێنجشەممەی داهاتوو گەرمترین رۆژی فڕەنسا بێت لە مێژوودا، كە رەنگە لە پاریسدا بگاتە 42 پلەی سەدی.

 

ئەم گەرمایە ئەڵمانیاشی گرتووەتەوە و بووەتە بۆی وشكبوونی رووبارەكان و ئاگرکەوتنەوە لە دارستانەكاندا لەگەڵ ئەوەشدا جوتیاران پێشبینی وەرزێكی زۆر خراپی بەرهەمە كشتوكاڵییەكان دەكەن.

 

پێداچونەوە: ئەڤین



created by Avesta Group and powered by Microsoft Azure