ئێسكەپەیكەری یەكێك لە گەورە ژەنراڵەكانی ناپلیۆن دۆزرایەوە

هەواڵ / جیهان :: 22/07/2019‌ :: 294‌ جار بینراوە

تاگ :: جیهان

دواڕۆژ


تیمێك لە زاناكانی ئاسەوار، ئێسكەپەیكەرێكیان لە (كۆنە سەنگەر)ێكی شاری سمۆلینسك-ی روسیا دۆزییەوە و پێدەچێت ئێسكوپروسكی یەكێك لە بەناوبانگترین ژەنراڵەكانی ناپلیۆن بۆناپارت بێت و لەكاتی هێرشەكانی سەر ناوچەكانی ئەورپا لە ساڵی 1812دا كوژرابێت.

زانا روسی و فرەنسییەكان دەڵێن"ئەوەی دۆزراوەتەوە ئێسكە پەیكەری ژەنراڵ (ئیتیان غۆدان دو لا ساپلۆنیێر)ە كە لە میانەی هێرشەكانی سوپای ناپلیۆن بۆ سەر روسیا كوژراوە".

ئەوەی زاناكان لەم راگەیاندنەیاندا پشتی پێدەبەستن چەند بەڵگەیەكە لەوانە: ژەنراڵە فرەنسییەكە لەو جەنگەدا قاچی چەپی پەڕیوە و قاچەكەی تریشی بە سەختی بریندار بووە، ئەم ئێسكەپەیكەرەیش قاچێكی پێوە نییە و قاچەكەی تریشی دیارە كە زیانی زۆری بەركەوتووە. هەروەها لەو جۆرە سەنگەرانەیشدا دۆزراوەتەوە كە ژەنراڵە گەورەكانی سوپاكەی ناپلیۆن-یان تێدا نێژراوە، ئەمە بێجكە لەوەی هەندێك پارچەی ئەو گولـلەتۆپانەیش دۆزراونەتەوە كە لەو جەنگەدا بەكارهێنراوە. 

ئێستا نموونەی ئێسكوپروسكە دۆزراوەكە لە تاقیگەكاندایە بۆ ئەوەی پشكنینی (DNA)ی بۆ بكرێت.

ژەنراڵ غۆدان كە ناوی لەسەر (كەوانەی سەركەوتن) لە پاریس نووسراوە، كەسێكی دیاری سوپاكەی ناپلیۆن بووە و رێزێكی زۆری هەبووە و بە یەكێك لە نزیكترین ژەنراڵەكانی نزیك لە ناپلیۆن دانراوە.

هێرشەكەی ساڵی 1812ی ناپلیۆن بۆناپارت بۆ سەر روسیا كە نزیكەی 680 هەزار سەرباز بەشداریی تێداكرد، بەخاڵی وەرچەرخان لە هەژموونی ناپلیۆن دادەنرێت چونكە شكستێكی گەورەی بەسەردا هات و سوپای روسیا هەتا شاری پاریس پاشەكشەی بە ناپلیۆن و هێزەكەی كرد و لە عەرشی دەسەڵات هێنایە خوارەوە.

بەپێی سەرچاوە مێژووییەكان، لەو دژە هێرشەدا ژمارەی سەربازە كوژراو و بریندارەكانی روسیا لە شەش هەزار كەس تێپەڕی بەڵام كۆتایی بەدەسەڵاتی ناپلیۆن و ئیمپراتۆریەتەكەی هێنا.

ئامادەكردن: لوقمان محەمەد رەشید 



  • ڕۆژ
  • هەفتە
  • مانگ
created by Avesta Group and powered by Microsoft Azure