نهێنییەكی بەهاوڕێكەی دا بەڵام پەلكێشی كاری لەشفرۆشیی كرد

هەواڵ / عێراق :: 22/07/2019‌ :: 16179‌ جار بینراوە

دواڕۆژ


ئەمەل ماوەی 14 ساڵە لەشی دەفرۆشێت، ئەو دەڵێت: "شەیدای كوڕێكی بیست ساڵان بووم، لەماڵی كچە هاوڕێیەكی خۆم رۆژانە ژووانم لەگەڵی دەبەست كە نهێنی پارێزم بوو، بەڵام هاوڕێكەم بێ وەفا دەرچوو".

لەدرێژەی گێڕانەوەی نەهامەتییەكانی ئەمەل دەڵێت: "خۆشەویستەكەم بەڵێنی پێدابووم داخوازیم بكات، بەڵام دوودڵ بوو، هاوڕێ كچەكەم ئامۆژگاری كردم كە لەگەڵ پیاوێك سەرجێیی بكەم، منیش بەقسەم كرد تا سەرنجی خۆشەویستەكەم رابكێشێت، بەڵام پێچەوانەكەی روویدا و بۆ هەتا هەتایە وازی لێهێنام".

دەشڵێت: "لەو رۆژەوە بوومەتە كۆیلەی ئەو هاوڕێ كچەم و لەترسی ئاشكرا نەكردنی نهێنییەكەم لای بنەماڵەكەم، ناچار رۆژانە كاری لەشفرۆشیی دەكەم".

یەكێكی دیكە لەو قوربانییانەی لەشفرۆشی لەعێراق، وەرقای تەمەن 33 ساڵە، ئەو دەڵێت: "بۆ بژێوی ژیانی خۆی و دایكی و دابینكردنی كرێی مانگانەی خانووەكەیان، لەیانەیەكی شەوانەی بەغدا كاری لەشفرۆشیی دەكات".

وەرقا باسی كارەكەی دەكات و دەڵێت: "بەهیچ جۆرێك بەخواستی خۆم نەبووە، ژیانی قورس وای لێكردووم ئەو كارەبكەم و هاوتاكانیشم هەمان هۆكاریان هەیە كە بەناچاری ئەو كارەیان هەڵبژاردووە".

وەرقا دەڵێت: "خاوەن یانەكە شەوانە بەكرێیەك كە لە 50 هەزار دینارەوە دەستپێدەكات، دەمانداتە دەست لەشكڕەكان و رۆژی دواتر دەگەڕێینەوە سەر كارەكەی خۆمان و بەو شێوەیە بەردەوامیی هەیە".

شروق ژنێكی دیكەیە و تەمەنی 40 ساڵە لەساڵی 2006ەوە هاوسەرەكەی كوژراوە و بۆ بەخێوكردنی 4 منداڵەكەی، پەیوەندی لەگەڵ فیتەرێك دەبەستێت و پاش ئەوەی دووگیان دەبێت لێی، ئەویش جێیدێڵێت.

شروق دەڵێت: "بۆ ئەوەی كۆرپەكەی ناو سكم فڕێبدەم، چوومە لای گروپێكی ژنانی لەشفرۆش و ئەوان لەبەرامبەر ئەو كارەدا داوای پارەیەكی زۆریان كرد، بەناچاریی بۆ ئەوەی كۆرپەكەم لەبار ببەم، چوومە پاڵیان و كاری لەشفرۆشیم كرد".

ئینتیسار ژنێكی تەمەن 44 ساڵە، دەڵێت بەپێی پێویست ئەو كارە دەكەم، وەك خۆی دەڵێت: "هەر كاتێك پێویستم بەپارە بێت، دەچمە لای هاوڕێیەكم كە ئارایشتگەی هەیە و لەپشتی دوكانەكەیەوە باخێكی هەیە و ژوورێك و گەرماوێكی تێدایە، راستەوخۆ كەسێكم بۆ بانگدەكات و بەرامبەر بە 50 هەزار دینار سێكسی لەگەڵ دەكەم، دواتر پارەكە بەش دەكەین لەناو خۆماندا".

بەپێی یاسای قەڵاچۆكردنی لەشفرۆشیی، ژمارە 8ی ساڵی 1988 لەماددەی 4دا هاتووە: "گەر كەسێك ساغ بووەوە بەسەریدا كە كاری لەشفرۆشیی كردووە، دەبرێتە یەكێك لەچاكسازییەكان و ماوەیەك كە لە 2 مانگ كەمتر نییە و لە دوو ساڵ زیاتر نەبێت، دەمێنێتەوە تا بەخۆیدا بچێتەوە و وەك كەسێكی باش بچێتەوە ناو كۆمەڵگە".

ئا: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure