غه‌زال ره‌شۆ: تركیا ناخوازیت ئێزدى ڤه‌گه‌رن شنگال

هەواڵ / چاوپێکەوتن :: پێش 4 هەفتە ‌ :: 216‌ جار بینراوە

دواڕۆژ، دهۆك

غه‌زال ره‌شۆ، هه‌ڤسه‌رۆكا مه‌جلسا خوه‌سه‌ریا شنگال، د چاڤدیتنه‌كا دواڕۆژدا راگه‌هاند: تركیا ناخوازیت ئێزدى ڤه‌گه‌رن شنگال و ب رێیا حكومه‌تێن هه‌رێما كوردستانێ و ئیراقێ گڤاشتنان د ئێخیته‌ سه‌ر ئێزدیێن ل شنگال.


دواڕۆژ: بۆچى هه‌تا نوكه‌ ڤه‌گه‌ریانا ئێزدییان بۆ شنگال كێمه‌ و ژمارا وان نه‌گه‌هشتییه‌ 50 هزار كه‌سان؟

غه‌زال ره‌شۆ: گه‌له‌ك ئه‌گه‌ر ‌هه‌نه‌؛ خزمه‌تگۆزارى ل شنگال نینن، وه‌ك؛ قوتابخانه‌ و نه‌خوه‌شخانه‌یان، ئه‌ڤه‌ ئه‌گه‌ره‌كێ سه‌ره‌كییه‌ كو ئێزدى نه‌شێن ڤه‌گه‌رن شنگال، چو ده‌زگه‌هێن حكومه‌تێن ئیراقێ و هه‌رێما كوردستانێ ژى ب فه‌رمى رێڤه‌به‌ریێن خوه‌‌ نه‌ڤه‌‌كرینه‌ و خزمه‌تگۆزارییان پێشكێشى وه‌لاتیێن شنگال ناكه‌ن.

دواڕۆژ: ئه‌رێ ئێزدى بووینه‌ قۆربانى ناكۆكیێن حكومه‌تێن هه‌رێما كوردستانێ و ئیراقێ؟

غه‌زال ره‌شۆ: به‌لێ، چنكو حكومه‌تا هه‌رێما كوردستانێ و حكومه‌تا ئیراقێ لسه‌ر چو مژارێن گرێدایى خزمه‌تكرنا شنگال نه‌پێكهاتینه‌، هه‌تا نوكه‌ نه‌شییاینه‌ گوندێن شنگال ژ مینان و ته‌قه‌مه‌نییان پاقژكه‌ن و گه‌له‌ك ئێزدیێن شنگال ژبه‌ر‌ مه‌ترسیێن ته‌قینا بۆمبه‌یان نه‌شێن قه‌ستا گوندێن خوه‌ بكه‌ن.

دواڕۆژ: گه‌له‌ك ئاواره‌یێن ئێزدى ل كه‌مپێن هه‌رێما كوردستانێ دمینن، ئه‌رێ مه‌جلسا رێڤه‌به‌ریا خوه‌سه‌ریا شنگال ئاگه‌هـ ژ ره‌وشا وان هه‌یه‌؟

غه‌زال ره‌شۆ: مه‌جلسا رێڤه‌به‌ریا خوه‌سه‌ر ژ ره‌وشا وان ئاواره‌یان ئاگه‌هداره‌، گه‌له‌ك ژوان ئاواره‌ییان ژ به‌ر نه‌بوونا ده‌لیڤه‌یێن كارى و نه‌بوونا قوتابخانه‌یان ل شنگال، نه‌شێن ژ وان كه‌مپان ده‌ركه‌ڤن و بهێن شنگال، له‌ورا ئه‌و پارتیێن وان كه‌مپان رێڤه‌دبه‌ن وان ئێزدییان وه‌ك دیلان د ده‌ستێن خوه‌ دا دبینن.

دواڕۆژ: تا نوكه‌، زێده‌تر ژ سێ هزار ئێزدى یێن داعش ره‌ڤاندبوون، چاره‌نڤیسێ وان نه‌دیاره‌، هه‌ولدانێن وه‌ بۆ دیتنا وان ئێزدییان چنه‌؟

غه‌زال ره‌شۆ: بۆ دیتنا وان ئێزدییان یێن داعش ره‌ڤاندین هه‌ولدانێن مه‌ به‌رده‌وامن، ل شنگال و رۆژئاڤایێ كوردستانێ، مه‌ دوو كۆمیته‌ پێكئیناینه‌ كو تایبه‌تن بۆ لێگه‌ریان و رزگاركرنا ئێزدیێن كه‌ڤتبوون ده‌ستێن داعش، تا نوكه‌ ب ده‌هان كچ و ژن و زاڕۆیێن ئێزدى مه‌ ژ ده‌ستێن داعش رزگاركرینه‌ و گه‌هاندینه‌ كه‌سوكارێن وان و ئه‌ڤ هه‌ولدانێن مه‌ دێ به‌رده‌وامبن.

دواڕۆژ: ئه‌رێ هێزه‌ك یان پارتییه‌ك هه‌یه‌ كو ب زانه‌بوون ناهێلیت ئێزدى ڤه‌گه‌رن شنگال؟

غه‌زال ره‌شۆ: به‌لێ، چه‌ند هێزه‌ك و پارتى هه‌نه‌ ناخوازن ئێزدى ڤه‌گه‌رن شنگال، چنكو ل شنگال ئێزدى بووینه‌ خۆدان ئیراده‌، ئه‌و هێز ناخوازن ئێزدى خودان ئیراده‌بن، ئه‌و دخوزان ئێزدى هه‌موو ده‌مان كۆێلێن وان بن و نه‌شێن خوه‌ برێڤه‌به‌ن، له‌ورا هه‌موو كاران دكه‌ن ئێزدى ژ كه‌مپێن وان نه‌ده‌ركه‌ڤن، چنكو ئه‌گه‌ر ئێزدى ل شنگال ئازادبوون دێ دووڤچۆنا وان كه‌سان كه‌ن یێن شنگال راده‌ستى داعش كرین و دێ وان سزاده‌ن.

دواڕۆژ: گه‌له‌ك كه‌س دبێژن ئێزدى ژ به‌ر گه‌ریلایێن پارتییا كاركه‌رێن كوردستان (په‌كه‌كه)‌  ناڤه‌گه‌رن شنگال، ئه‌رێ گه‌ریلا ل شنگال ماینه‌؟

غه‌زال ره‌شۆ: چو گه‌ریلایێن پارتییا كاركه‌رێن كوردستان (په‌كه‌كه‌) ل شنگال نه‌ماینه‌، هێزێن ئێزدییان، یێن نوكه‌ ل شنگال-ن وه‌ك هێزێن یه‌كینه‌یێن به‌رخوه‌دانا شنگال و یه‌كینه‌یێن ژنێن شنگال و هێزێن ئاسایشا ئێزدیخانێ، كچ و كورێن ئێزدیێن شنگال-ن، ئه‌و ملله‌تێ خوه‌ و شنگال دپارێزن، ئه‌م رایا گشتى پشتراستدكه‌ین چو گه‌ریلایێن (په‌كه‌كه‌) ل شنگال نه‌ماینه‌.

دواڕۆژ: بۆچى حكومه‌تا ئیراقێ وه‌ك پێدڤى هاریكاریا ئاڤه‌دانكرنا شنگال نه‌كریه‌؟

غه‌زال ره‌شۆ: ئیراق وه‌لاته‌كێ بێ سیاده‌یه‌، به‌غدا خۆدانا بڕیارا خوه‌ نینه‌، وه‌ك حكومه‌تا هه‌رێما كوردستانێ، حكومه‌تا ئیراقێ ژى ل ژێر گڤاشتنێن تركیا چو خزمه‌تان پێشكێشى ئێزدیێن شنگال ناكه‌ت، له‌ورا مه‌ باوه‌رى ب حكومه‌تا ئیراقێ و هه‌رێما كوردستانێ نه‌مایه‌ كو ئه‌و هاریكاریا ئێزدییان بكه‌ن.

دواڕۆژ: مه‌ره‌ما ته‌ ئه‌وه‌ تركیا روول د نه‌ئاڤا‌كرنا شنگال دا هه‌یه؟

غه‌زال ره‌شۆ: بێگۆمان به‌لێ، چنكو تركیا ناكۆكى و كه‌ربوكینه‌كا مه‌زن دگه‌ل ئێزدییان هه‌یه‌، دژایه‌تییا تركیا بۆ ئێزدییان دیرۆكییه‌، نوكه‌ ژى، وه‌لاتێ تركیا باش دزانیت ئێزدى ل شنگال به‌ر ب خوه‌سه‌ریێ و ئیداره‌كا نوو و خۆدان ئیراده‌ دچن، له‌ورا تركیا ڤێ ئیرادێ قبۆل ناكه‌ت و ناخوازیت ئێزدى ڤه‌گه‌رن شنگال و ب رێیا حكومه‌تێن هه‌رێما كوردستانێ و ئیراقێ گڤاشتنان د ئێخیته‌ سه‌ر ئێزدیێن ل شنگال.

پ: چ.ع

بڵاوكردنه‌وه‌:هـ.ق

 



  • ڕۆژ
  • هەفتە
  • مانگ
created by Avesta Group and powered by Microsoft Azure