چیرۆكى محه‌مه‌د كه‌ "له‌ خه‌ودا زڕبراكه‌ى ته‌قه‌ى لێكرد و كوشتى"

هەواڵ / ڕاپۆرت :: 19/07/2019‌ :: 19327‌ جار بینراوە
محەمەد نەجمەدین

تاگ :: ڕاپۆرت

دواڕۆژ، عیماد جەباری

محەمەد لەنێو خەودا دەبێت كاتێك لەلایەن زڕبراكەیەوە تەقەی لێدەكرێت، ئەگەرچی فریای ئیفادە ناكەوێت بۆ پۆلیس، بەڵام داوا لە باوك و دایكی دەكات سكاڵا لەسەر براكەی تۆمارنەكەن، چونكە منداڵەكانی وردن.


محەمەد نەجمەدینى تەمەن 22 ساڵ، ئەو گەنجەیە كە بەهۆی كێشەیەكی كۆمەڵایەتی نێو خێزانەكەی لەلایەن زڕبراكەیەوە كوژرا.

روداوەكە (بەیانی رۆژی چوارشەممە 17ی تەمووزی 2019) رویداوە كاتێك (ك) بەتوڕەییەوە دەگاتە ماڵی دایكی لەگەڕەكی شۆریجەی شاری كەركوك كە هێشتا ( محەمەد )ی زڕبرای كە خەودابووە، دەستبەجێ تەقەی لێدەكات و فیشەكێك دەنێت به‌ پشتییه‌وە و له‌ سنگییه‌وە دەردەچێت. 

(ئ.ن) خزمی نزیكی قوربانیەكەیە لەبارەی رووداوەكەوە بە دواڕۆژی وت: "محەمەد لەسەر بابەتێك لەگەڵ براژنەكەی بووەتە دەمەقاڵەیان كە بەهۆیەوە (ك) زڕبرا گەورەكەی توڕەبووە و هاتووەتە ماڵی دایكی و تەقەی لە محەمەد كردووە كە هێشتا لەخەودا بووە،  دواتریش هەڵاتووە".

وتیشی: "بەردەوام كێشە لەنێو ئەو ماڵەدا هەبووە، محەمەد كوڕێكی بزێو و سه‌ركه‌شبوو بوو بۆیە هەموو كات باوك و دایكی داوایان لە (ك) دەكرد رێنمایی بكات".

ئه‌وه‌شى خسته‌ڕوو: "پێشتریش جارێك هەر بەهۆی گلەیی و گازندەی باوك و دایكیه‌وە، (ك) تەقەی لە محەمەد كردووە، قاچی شكاندووە دواتر كێشەكەی نێوانیان چارەسەركراوە".

محەمەد لەدوای برینداربوونی دەگوێزرێتەوە بۆ نەخۆشخانەی ئازادی شاری كەركوك و بەهۆی سەختی برینەكەیەوە گیان لەدەستدەدات.

بەوتەی (م.ئ) یەكێكی دیكە لەخزمەكان كە هاوكات هاوڕێیشی بووە بۆ دواڕۆژ وتی: " محەمەد بەهۆی سەختی برینەكەیەوە نەیتوانی ئیفادە بۆ پۆلیس بدات، بەڵام داوای لە باوك و دایكی كرد سكاڵا تۆمارنەكەن بۆ ئەوەی براكەی نەچێتە زیندانەوە، چونكە هێشتا منداڵەكانی وردن".

محەمەد و برایەکی دیکەی، لەگەڵ دوو براکەی دیکەی کە یەکێکیان تۆمه‌تباره‌ بە کوشتنی محەمەد، باوکیان جیاوازە، چونکە دایکیان دوو جار هاوسەرگیری کردووە.

فەرهاد مەحمود، بەڕێوەبەری بنكەی پۆلیسی ئازادی بە دواڕۆژی وت: "دۆسییەی تاوانەكەمان رەوانەی دادگای كەركوك كردووە، بەڵام بەهۆی گیان لەدەستدانی قوربانیەكە و هەڵاتنی تاوانبارەكە نەمانتوانیووە چۆنێتی رووداوەكە بزانین".

وتیشی: "تاوانبارەكە كە براكەیەتی هەڵاتووە و بەپێی زانیاریەكانمان كەركوكی بەرەو سلێمانی بەجێهێشتووە و لێكۆڵینەوەكان بەردەوامن".

پ: ئا.ح



  • ڕۆژ
  • هەفتە
  • مانگ
created by Avesta Group and powered by Microsoft Azure