بۆچوونەكان لەبارەی ناسنامەی ئەنجامدەری هێرشەكەی هەولێر جیاوازن

هەواڵ / کوردستان :: 20/07/2019‌ :: 5013‌ جار بینراوە

دواڕۆژ

(پاشنیوەڕۆی رۆژی 17ی تەمموزی 2019) رووبەڕووبوونەوەیەکی چەکداری لەناو رێستۆرانتێکی شاری هەولێر روویدا و بەهۆیەوە جێگری سەرکونسڵی تورکیا کوژرا و ژمارەیەکی دیکەش بوونە قوربانی.

هەر لەدوای رووداوەکە دیار دەنیز، بەرپرسی راگەیاندن و چاپەمەنی هێزەکانی پاراستنی گەل (هه‌په‌گه‌) باڵی سەربازی پارتى كرێكارانى كوردستان بە دواڕۆژی راگەیاند "کە پەکەکە ئاگاداری ئەو هێرشەی هەولێر نەبووە و پەیوەندیشی بەو بابەتەوە نییە".

هاوکات محەمەد عەباسی، شارەزا لە کاروباری تورکیا بە ماڵپەڕی (ناس)ی راگەیاندووە: پەکەکە خۆی بەدوور دەگرێت کە رایبگەیەنێت ئەو بەرپرسیاری هێرشەکەی هەولێر بووە، چونکە دەزانێت ئەگەر دەربکەوێت پەکەکە بەرپرسیاری هێرشەکە بووە، هەولێر زیاتر لەگەڵ بەغدا و ئەنقەرە هاریکاری دەکات بۆ دەرپەڕاندنی پەکەکە لە هەرێمی کوردستان.

وتیشی: "پەکەکە توانای پێکهێنانی چەندین گروپی هەیە بە ناوی جیاواز وەک یەپەگە و یەپەژە و هەڵۆکان و چەندین ناوی دیکە کە بەرپرسیارێتی خۆیان لەسەر رووداوەکان رادەگەیەنن و پەکەکەش خۆی لە بەرپرسیارێتی ئەو رووداوانە بەدوور دەگرێت".

هاوکات ئۆکتای یەڵماز، شارەزای تورک لە کاروباری سیاسی تەئکیدی کردەوە کە پەکەکە پەیوەندی بەو هێرشەی هەولێرەوە هەبووە، چونکە ئۆپراسیۆنەکانی ئەم دواییەی تورکیا پەکەکەی گەیاندووەتە کۆتایی رێگەکە و پاڵی پێوە ناوە ئەم هەنگاوە بنێت.

وتیشی: "باشبوونی پەیوەندییەکانی ئەم دواییەی حکومەتی هەرێمی کوردستان و تورکیا بەتایبەت دوای هەڵبژاردنەکان و سەردانی شاندی هەردوولا وای لە پەکەکە کردووە کە هێرشێکی لەمشێوەیە ئەنجامبدات بۆ تێکەڵکردنی دۆسییەکان".

ئەگەرچی هێشتا هیچ لایەنێک بەرپرسیارێتی خۆی لە هێرشەکە رانەگەیاندووە، بەڵام میدیاکانی تورکیا پەکەکە و گروپی سەر بە فەتحوڵا گولەن تۆمەتبار دەکەن لەگەڵ گروپە ئیسلامییە توندڕەوەکان کە ئەنقەرە دەڵێت "بەشدارن لە دژایەتیکردنی تورکیا لە باکوری سوریا".

ئا: چ. ع

بڵاوكردنه‌وه‌: هـ. ق



created by Avesta Group and powered by Microsoft Azure