مووچەی خانەنشینی هێزەکانی ناوخۆی هەرێم زیاد دەکرێت

هەواڵ / کوردستان :: 17/07/2019‌ :: 14282‌ جار بینراوە

تاگ :: پەرلەمان

دواڕۆژ

(ئەمڕۆ 17ی تەمموزی 2019) پەرلەمانتارێکی هەرێمی کوردستان رایگەیاند "کار دەکەن بۆ داڕشتنەوەی یاسایەکی تایبەت بە مووچەی خانەنشینی پێشمەرگە و هێزەکانی ناوخۆ".

سەلمە فاتیح، پەرلەمانتاری یەکێتیی نیشتمانیی کوردستان لە پەرلەمانی کوردستان بە دواڕۆژی راگەیاند "بڕی پارەی خانەنشین کردنی هێزەکانی ناوخۆ دوای 25 بۆ 30 ساڵ زۆر کەمە و تەنیا 200 بۆ 250 هەزار دینار وەردەگرن، چونکە مووچەی بنەڕەتییان کەمە و زۆربەی مووچەکەیان دەرماڵەیە کە خانەنشین دەبن مووچەکەیان زۆر کەمدەبێت".

وتیشی: "دوێنێ لەگەڵ ئارام سەعید، عەقید لە دادگای سەربازی گفتوگۆم کرد کە ماوەیەکی زۆرە لەسەر ئەو دۆسیەیە کاری کردووە و ئێستا هاوکاری داڕشتنەوەی یاساکە دەکات لەگەڵمان".

ئەوەشی وت: "دەمانەوێت یاساکە بەجۆرێک بێت ژیان و گوزەرانی هێزە ئەمنییەکان لەبەرچاو بگیرێت و مووچەی خانەنشینیان لەو بڕەی ئێستا زیاتر بێت کە هەیانە و پاڵنەرێکیش بێت کە ئەندامانی ئەو هێزانە بیانەوێت خانەنشین بن و چانسێکیش دەبێت کەسانی دیکە دابمەزرێن لە شوێنیان دوای خانەنشینبوونی ئەمان".

باسی لەوەشکرد: لە ئێستادا هێزە ئەمنییەکان بە پێی یاسای ژمارە 18ی ساڵی 2011ی عێراق خانەنشین دەکرێن، ئێمە دەمانەوێت لەڕێگەی ئەم یاسا نوێیەوە ئەو کەسانە خانەنشین بکرێن.

ئاماژەی بەوەشکرد: کە پرۆژەیاساکە لە خولی یاساداناندا کە مانگی ئەیلول دەکات پێشکەش دەکرێت.

ئا: چ.ع

بڵاوکردنەوە: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure