چیرۆكی ئه‌و پۆلیسه‌ی قەرزاری ژیانی لێسەندەوە

هەواڵ / ڕاپۆرت :: 16/07/2019‌ :: 14936‌ جار بینراوە

دواڕۆژ، هانا چۆمانی
 
بەهۆی قەیرانی دارایی و دواکەوتن و پاشه‌كه‌وتكردنی مووچە، کێشە کۆمەڵایەتی و ئابورییەکان لەهەرێمی کوردستان زیادیانكردووه‌، یاساناسێک باس له‌وه‌ده‌كات جگە لەوەی دیاریدەی جیابوونه‌وه‌ و کێشەی کۆمەڵایەتی زیادیکردووە، هاوکات بەشێک لە حاڵەتەکانی خۆکووشتن هۆکارەکەی لایەنی داراییە"، کۆمەڵناسێکێش دەڵێت: "هیچ شتێک لە ژیاندا شایەنی ئەوە نییە مرۆڤ لە پێناویدا بمرێت".


رەمەزان محەمەد پۆلیسی رێپیدراو لە رێکاری یاسایی هاتووچۆ كه‌ ماوه‌ی 10 ساڵ له‌ ناوبازاڕی شاری هەولێر ئه‌ركی خۆی جێبه‌جێ ده‌كرد، بەڵام شەوی رابوردوو به‌هۆی قه‌رزارییه‌وه‌ کۆتایی بەژیانی خۆی هێنا، وه‌ك چه‌ند پۆلیسێك ده‌ڵێن بەهۆی دواکەوتنی مووچە و پاشەکەوته‌وه‌ له‌ رابوردوودا، ئیستاش بەسەدان پۆلیسی تر قەزرارن، چونکە رێگە بە پۆلیس نادرێت هیچ کارێکی تر بکات، ئەوەش بۆیان سەخت بووە.

لەبارەی خۆکووشتنی ئه‌و پۆلیسەوە، هۆگر عەزیز وتەبێژی پۆلیسی هاتووچۆی هەولێر بە دواڕۆژی وت: "درەنگانی شه‌وی رابوردوو دووشەممە (رەمەزان محه‌مه‌د)ی تەمەن 30 ساڵ کە هاوکات پۆلیس بوو لە بەشی رێکاری سەربازیی و ماوەی 10 ساڵە لەناو بازاری هەولێر دەوامی دەکرد، شەوی رابوردوو بەگولـلە لە ماڵەکەی خۆیدا کۆتایی بەژیانی خۆی ھێنا".

وتیشی: "رەمەزان خێزاندارە و خاوەن دوو مناڵە و لە گەرەکی قەلای نوێی شاری هەولێر نیشتەجێیە، ئەوەی جێگای داخە هۆکاری خۆکوشتنەکەی بەهۆی قەرزدارییەوە و بووە، چونکە دوێنی و شەوی رابردوو قەرزدارەکان چونەتە سەر ماڵەکەی و داوایان کردوە قەرزەکانیان بداتەوە و چیتر تاخیر نەکات لەکاتێکدا چارەسەری هەبووە کێشەکە هێندە گەورە نەبوو کە خۆی بکوژێت، بەڵام بەرگەی نەگرتووە و خۆی کوشتووە".

پۆلیسێكیش بەناوی (محەمەد هەولیری) وه‌ك خۆی باسی ده‌كات له‌ ئێستادا قه‌رزاره‌، ده‌ڵێت: "منیش حه‌وت ملیۆن دینار قەزرارم، بەڵام هەرگیز ژیانی خۆم ناكه‌م به‌ قوربانی قه‌رزاری، به‌پێی توانام قەرزەکان دەدەمەوە، ئەگەرنا بەقەزرارەکان دەڵێم نیمە و له‌ كاتێكی تردا ده‌تانده‌مه‌وه‌، چۆن ده‌بێت مرۆڤ له‌ جه‌نجاڵی ژیان هه‌ڵبێت، ئه‌بێت به‌ ئیراده‌وه‌ بژین".

ئەو پۆلیسە گلەیی له‌ حكومه‌ت ده‌كات و ده‌ڵێت: "ئەوەی بەسەر ئێمەی پۆلیسدا دێت کە زۆربەمان یان کرێچین و یان قەزرارین یاخود بێ ئۆتۆمبێل و خانووین، خەتای حکومەتە، چونکە ئێمەی پۆلیس ناتوانین کاری دووەم بکەین و رێپێدراو نییه‌ و نزیکەی پێنج ساڵیش قەیران و دواکەوتنی مووچە و پاشکەوت هەبوو، زۆربەمان قەزراربووین و بەم رۆژە گەیشتین، ئه‌فسه‌رێكی پۆلیسی هاوڕێم هەیە كه‌ پلەکەی نەقیبە 22 ملیۆن دینار قەزرارە، چونکە پێش قه‌یرانی دارایی پرۆسه‌ی هاوسه‌رگیری پێكهێنا و كه‌وته‌ ژێر قه‌رزێكی زۆره‌وه‌".

ئه‌و پۆلیسه‌ كه‌ زیاتر لە 30 ملیۆن دینار پاشەکەوتی لای حکومەتە داواده‌كات بیده‌نه‌وه‌ و ئه‌و بابه‌ته‌ پشتگوێ نه‌خات و پاشەکەوتەکەیان بۆ تاهەتاییە لای خۆی نه‌هێڵێتەوە، ده‌ڵێت: "ئێمەش بمرین منداڵەکانمان داوای دەکەن، چونکە ئەوە مافی ئێمەیە لەسەر حکومەت".

بارودۆخی دارایی چه‌ند ساڵی رابوردوو و دواکەوتنی مووچە کاریگەری بەسەر سەرجەم جومگەکانی حکومەت و هاووڵاتیان و کۆمپانیاکانیشه‌وه‌ هەبوو، پارێزەرێکيش دەڵێت: "لەو چەند ساڵەی قەیرانی دارایی لە هەرێمی کوردستان، جگە لەوەی دەیان خێزان هەڵوەشانەوە، خۆکووشتن و کێشە و ناکۆکی کۆمەڵایەتی و تەقەکردن و کێشەی زەویوزار هەبووه‌، بەڵام ناکرێت مرۆڤ پەنا بۆ خۆکوشتن ببات، چونکە ئەوە هیچ شتێک قەرەبووی ناکاته‌وه‌ و زۆر رێگا هەیە بۆ ئەوەی مرۆڤ بتوانێت کێشەکانی چارەسەربکات بەبێ ئەنجامدانی هیچ هەڵەیەک".

کۆمەڵناسێک باس لەوەدەکات، کە ژیانی مرۆڤ گرنگترە له‌ هه‌موو شتێك و دەڵێت: "لەهەموو کۆمەڵگایەکدا چەند دیاردەیه‌ک هەیە، بەڵام لەهەموو وڵاتان تاکەکان وا فێردەکرێن و پەروەردە دەکرێن کە ژیانی مرۆڤ لە هەموو شت گرنگترە و نابێت هیچکات مرۆڤ ژیانی خۆی لەپێناوی پارە و سامان بکاتە قوربانیی، ژیانی مرۆڤ زۆر گەورەترە لەوه‌ی کەسێک به‌هۆی قه‌ره‌زه‌وه‌ كۆتایی به‌ ژیانی خۆی بهێنبێت".

ئارام رەشید، خوێندکاری دکتۆرا لە کۆمەڵناسی لە وڵاتی بەریتانیا بۆ دواڕۆژ ده‌ڵێت: "قەزراری و هەژاری و دەوڵەمەندی و نەخۆشی و ژێردەسته‌یی هەموو ئەوانە کاتین و تێدەپەڕن، بۆیە نابێت مرۆڤ لەژێر کاریگەری هیچ یەکێک لەوانە بیر لەخۆکوشتن بکاتەوە، چونکە خۆکوشتن هەڵەترین بڕیاری مرۆڤە، ژیانی مرۆڤ لەوانە گرنگترە و بەئاسانی دروستنابێتەوە".

دەشڵێت: "کۆمەڵگه‌ی کوردستان زۆر جیاوازی هەیە لەگەڵ وڵاتان، بۆیە بیرکردنەوە لە خۆکوشتن یان هەر شتێک هەڵەیەکی گەورەیه‌، ئیستا ئەگەر ئەو برا پۆلیسە رۆیشتبوایەته‌ لای دوو کەسی دەوڵەمەند، کێشەكه‌ی خۆی بۆ باسکردبان، بەدڵنیاییه‌وه‌ پارەکەیان بۆ دەدایەوە و منداڵەکانیشی بێباوک نەدەبوون".

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure