جڤاتا پارێزگه‌هێ: پیڤه‌ر شاشیێن مه‌زن د خواندنا ئاڤێ دا كرینه‌

هەواڵ / کوردستانی :: 16/07/2019‌ :: 190‌ جار بینراوە

دواڕۆژ، بورهان یه‌حیا

جڤاتا پارێزگه‌ها دهۆك راگه‌هاند: راده‌ستكرنا كاروبارێن پیڤه‌رێن ئاڤێ ژ لایێ حوكمه‌تێ بۆ كۆمپانییه‌كا كه‌رتێ تایبه‌ت جهێ گومانێ یه‌ و شاشیێن مه‌زن د خواندنا ئاڤێ دا هاتینه‌كرن.


عه‌بدولسه‌مه‌د تێلى ئه‌ندامێ جڤاتا پارێزگه‌ها دهۆك بۆ دواڕۆژ دیاركر "پشتى نه‌رازیبوونێن مه‌زن ژ لایێ وه‌لاتیێن پارێزگه‌ها دهۆك ل سه‌ر شێوازێ كاركرن و بهایێ كرێیا ئاڤێ ب گۆره‌ى پیڤه‌ران هاتین جڤاتێ داخواز ژ رێڤه‌به‌رێ گشتیێ ئاڤێ ل هه‌رێمێ كرییه‌ ل دهۆك به‌رهه‌ڤ ببیت و روونشتنه‌ك دگه‌ل دا هاتییه‌كرن و تێدا ئه‌ڤ گازنده‌ گه‌هاندینێ و پێرا راگه‌هاندییه‌ كو میکانزما بەلاڤکرنا پیڤەران و شێواز و گرێدانا وان ژلایێ کۆمپانیێ ڤە نەیا باش و شەفاف بوو و دگه‌ل هندێ رادەستکرنا كه‌رتێ ئاڤێ ژ لایێ حوکمەتێ بۆ کۆمپانییەکا کەرتێ تایبەت جهێ شک و گۆمان و پرسیارێ یە چونكو دیاربوو شاشیێن مەزن د خواندن و هه‌ژمارتنا ئاڤێ دا هەنە و ئەڤ پیڤەرە زۆر ب هووری کارێ خۆ ناکەن".

دیاركر "بهایێ یەکا ئاڤێ ل دووڤ داهات و بارێ ئابووری یێ خەلکی نینە و یێ گرانە و پێدڤییە ئەرزان ببت و بهایێ یەکه‌یێن ئەرزان ناهێتە هه‌ژمارتن هەکە وه‌لاتییان گەلەک ئاڤ مەزاخت و هەموو ب بهایێ گران دهێتە هژمارتن و ل شوونا داهاتێ حوکمەتێ زێدە ببیت ب گرێدانا پیڤەران بەرۆڤاژی داهات کێمبوویە".

عه‌بدولسه‌مه‌د تێلى راگه‌هاند "نابیت پیڤەر هەوای ژى ب هه‌ژمێرن چونکی ئاڤا دهۆک 24 دەمژمێران نینە و هەر جارەکا بچیت و بهێت وەلاتی زیان پێدكه‌ڤیت ئەو خەلکێ میزانیێ گرێداین یێ پێگیرە و کێم ئاڤێ د مەزێخن و یێ نەگرێدایی ئەون یێ زۆر ئاڤێ دمەزێخن و ئەو د مفادارن و کار ب سیستەمێ کەڤن بهێتەکرن هەتا هەموو پشکدار پیڤەران گرێدەن و کەس پارەی ل دووڤ پێڤەری نەدەت".

ئه‌ندامێ جڤاتا پارێزگه‌هێ دیاركر "کۆمپانیێن پیڤەر بۆ وەلاتیان گرێداین و پیڤەرێن وان ژ کارکەفتین دڤێت کۆمپانی دووبارە پیڤەرێن نوی دانیت یان هەر وان ژ کیستێ خۆ چاک بکەن و پیڤەرێن ئاڤا مالان و ئاڤێن پیشەسازی وەکو غەسلێن ترومبێلان بهێنە ژێک جوداکرن".

پێداچوونه‌وه‌: ئیحسانی مه‌لا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure