دامەزراندنی مامۆستایانی گرێبەست دەکرێتە هەمیشەیی

هەواڵ / کوردستان :: 16/07/2019‌ :: 19685‌ جار بینراوە

تاگ :: پەروەردە

دواڕۆژ، ئاراس عەزیز

لیژنەی پەروەردەی پەرلەمانی کوردستان هەوڵ بۆ دامەزراندنی ئەو شەش هەزار مامۆستایە دەدات کە لەئێستادا بە گرێبەست لە وەزارەتی پەروەردە کاردەکەن.


د. گەلاوێژ عوبێد، بڕیاردەری لیژنەی پەروەردە و خوێندنی باڵا لە پەرلەمانی كوردستان بۆ دواڕۆژ رایگەیاند: "سەردانی وەزارەتی پەروەردەیان كردووە و داواكاری مامۆستایانیان گەیاندۆتە وەزارەتی پەروەردە بۆ ئەوەی لەكابینەی نوێی حكومەت ئەو مامۆستایانە بكرێنە هەمیشەیی".

وتيشى: "وەزارەتی پەروەردە بەڵێنی ئەوەیان داوە لەگەڵ ئەنجومەنی وەزیران تاوتوێی ئەو بابەتە بكەن و بۆ ئەو مەبەستە جددی بن".

لەئێستادا شەش هەزار مامۆستای گرێبەست و نزیكەی 11 هەزار مامۆستای وانەبێژ لە هەرێمی كوردستاندا هەن.

سه‌رچاوه‌یه‌ك له‌ وەزارەتی پەروەردەی حكومەتی هەرێم بە دواڕۆژی راگەیاند: لە ماوەكانی رابوردوودا زۆر هەوڵدراوە مامۆستایانی گرێبەست بكرێنە هەمیشەیی، بەڵام بەهۆی قەیرانی دارایی نەتوانراوە ئەوە بكرێت.

وتیشى: "ئومێد دەكەین گرفتی وەزارەتی پەروەردە بەتایبەت كەمی مامۆستا لەگەڵ ئەنجومەنی وەزیران چارەسەربكرێن و مامۆستایانی گرێبەستیش بكرێنە هەمیشەیی". 

پێداچوونەوە: رێباز
بڵاوکردنەوە: ئارام غەفور



  • ڕۆژ
  • هەفتە
  • مانگ
created by Avesta Group and powered by Microsoft Azure