وەزیری پێشووتری دارایی عێراق بۆ چوونە بەردەم دادگا دەگاتە هەولێر

هەواڵ / عێراق :: 14/07/2019‌ :: 14781‌ جار بینراوە

دواڕۆژ


چەند سەرچاوەیەكی سیاسی ئاماژە بەوەدەكەن، وەزیری پێشووتری دارایی عێراق بەمەبەستی چوونە بەردەم دادگا لەبەغدا، گەیشتووەتە شاری هەولێر، میدیا عێراقییەكانیش دەڵێن: "ناوبراو هەموو ئەو تۆمەتانەی ئاڕاستەی كراون، بەتاڵ دەبنەوە".

رافع عیساوی وەزیری پێشووتری دارایی عێراق لەڕێی سەرچاوەیەكەوە بە سایتی مسەلـلەی وتووە: "بەڵگەی دروستی لایە كە هەموو ئەو تۆمەتانە رەتدەكاتەوە كە ئاڕاستەی كراون".

عیساوی لەلایەن دەستەی نەزاهەی عێراقەوە بەبێتاوان لەقەڵەم دراوە و چوونە بەردەم دادگاشی بۆ ئەوەیە بەڕەسمی تۆمەتەكانی سەری لاببرێن و دواتر بەشێوەیەكی كاتی بە كەفالەت ئازاد دەكرێت.

عیساوی كە وەزیری دارایی و جێگری سەرۆك وەزیران بووە، پێشتر بەتۆمەتی دزین و بەتاڵانبردنی پارە و سامانی دەوڵەت بە شێوەیەكی غیابی بۆ ماوەی 7 ساڵ زیندانی بۆ بڕدراوەتەوە.

ساڵی 2015 بڕیارەكەی دادگای نەزاهە دەرچووە و ژمارەیەك لەهاوەڵەكانیشی لەو تۆمەتانەوە گلاون كە خراونەتە پاڵ رافع عیساوی وەزیری پێشووتری دارایی عێراق.

عیساوی بەوەش تۆمەتبار دەكرێت كە هانی خەڵكی ناوچەكانی ئەنباری داوە بێنە سەر شەقام و تا وای لێهات داعش دروست بوو، بووەهۆی ماڵوێرانی بۆ خەڵكی عێراق.

لەمانگی ئازاری ساڵی 2013دا رافع عیساوی لەبەردەم خۆپیشاندەراندا دەستلەكاركێشانەوەی خۆی راگەیاند لە حكومەتی عێراق لەشاری رومادی سەر بە پارێزگای ئەنباری خۆرئاوای عێراق.

ئا: ئارام غەفور 

بڵاوکردنەوە: ئیحسانی مەلا فوئاد



created by Avesta Group and powered by Microsoft Azure