مەڵبەندی یەكێتی لەكەركوك مەترسیی لەسەرە

هەواڵ / کوردستان :: 7 رۆژ پێش ئێستا‌ :: 7953‌ جار بینراوە
وێنەکە لەتۆڕە کۆمەڵایەتیەکان بڵاو بۆتەوە

دواڕۆژ، عیماد جەباری

ترس هەیە ئاڕاستەی خۆپیشاندانەکانی عەرەبی کەرکوک لەدژی دانانی پارێزگارێکی کورد، بگۆڕێت بۆ پەلاماردانی بارەگای مەڵبەندی کەرکوکی یەکێتی، لێپرسراوانی ئەو حزبەش دەڵێن: "ئەگەر پەلامار بدرێین، بەرگری دەکەین و بارەگاکەش دەپارێزین".


غەفور ساڵح جێگری لێپرسراوی مەڵبەندی کەرکوکی یەکێتی نیشتمانی کوردستان ئەمڕۆ هەینی ١٢ ی تەمموز بەدواڕۆژی راگەیاند "هیچ زانیارییەکی ورد لەبەردەستمان نییە کە خۆپیشاندەران بەنیازی پەلاماردانمان بن، بەڵام بەهۆی خۆپیشاندانەکەوە کەنزیک بارەگای مەڵبەندە، هیچ رووداوێک بەدوور نازانین، بۆیە ئێمە ئامادەکاری خۆمان کردووە".

وتیشی: "هەر کەسێک بیەوێت پەلاماری بارەگاکەمان بدات، ئێمە بەرگری دەکەین و بارەگاکەشمان دەپارێزین وەکو مافێکی رەوای خۆمان".

بڕیارە کاتژمێر 5ی ئێوارەی ئەمڕۆ هەینی لەبەردەم بینای پارێزگا خۆپیشاندانی عەرەبی کەرکوک ئەنجامبدرێت دژی دانانی پارێزگارێکی کورد و پشتیوانیکردن دەبێت لەراکان جبوری، کە شوێنی خۆپیشاندانەکە نزیک دەبێت لەبارەگای مەڵبەندی یەکێتییەوە.

جەنگی عیزەدین لێپرسراوی پەیوەندییەکانی مەڵبەندی کەرکوکی یەکێتی بەدواڕۆژی وت: "بارەگای مەڵبەند تەنها پاسەوانەکانی خۆی دەیپارێزن و هیچ هێزێکی زیاتری بۆ نەهاتووە".

وتیشی: "هێزێکی زۆری عێراق لەناوچەکەدا دەبن بۆ پارێزگاریکردن، بۆیە پێشبینی دەکەین هیچ روداوێکی نەخوازراو روو نەدات، ئەگەر هەر لایەک دەستپێشخەری بکات لەدژی بارەگاکەمان ئەوە بەدڵنیایەوە بێ دەنگ نابین".

پێداچوونەوە و بڵاوکردنەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure