نه‌خۆشخانه‌یێن به‌رمایكێن خۆ نه‌سۆژیت دێ ب 8 ملیۆن دیناران هێته‌ سزدان

هەواڵ / کوردستان :: 11/07/2019‌ :: 148‌ جار بینراوە

دواڕۆژ، بورهان یه‌حیا

فه‌رمانگه‌ها ژینگه‌ها دهۆك ب مه‌ره‌ما چاره‌سه‌ركرنا به‌رمایكان بڕیار دایه‌ هه‌ر نه‌خۆشخانه‌یه‌كا كه‌رتێ تایبه‌ت كو به‌رمایكێن خۆ نه‌سۆژیت ب كۆژمه‌یێ 8 ملیۆنان دیناران بهێته‌ سزادان.


محه‌مه‌د تاهر بریفكانی رێڤه‌به‌رێ‌ فه‌رمانگه‌ها ژینگه‌ها دهۆك بۆ دواڕۆژ دیاكر: "هه‌ر نه‌خۆشخانه‌یه‌كا ب دروستی سه‌ره‌ده‌ریێ‌ دگه‌ل چاره‌سه‌ركرنا به‌رمایكان نه‌كه‌ت و ل دووڤ رێنومایێن ژینگه‌هێ‌ نه‌بیت، هه‌تا هه‌شت ملیۆن دیناران دێ‌ هێنه‌ سزادان و جارا دووێ‌ مه‌ ماف هه‌یه‌ بگرین".

ناڤبۆرى دیاركر: "بۆ ڤێ‌ چه‌ندێ‌ دێ‌ رینومایێن تایبه‌ت ب ساخله‌می و ژینگه‌هێ‌ ئاراسته‌ی هه‌موو نه‌خوشخانه‌یان هێته‌كرن و پێدڤییه‌ پێگیریێ پێ‌ بكه‌ن".

حه‌مزه‌ محه‌مه‌د عه‌لى به‌رپرسێ راگه‌هاندنا رێڤه‌به‌رییا گشتییا ساخله‌مییا پارێزگه‌ها دهۆك بۆ دواڕۆژ دیاركر: "ل دۆر چاره‌سه‌ری و سۆتنا به‌رمایكێن نۆژداری ل نه‌خۆشخانه‌یێن تایبه‌ت هه‌موو نوونه‌رێن نه‌خۆشخانه‌یێن تایبه‌ت هاتینه‌ ئاگه‌هداركرن كو ب مه‌ره‌ما پاراستنا ژینگه‌هێ و به‌لاڤ نه‌بوونا ڤایرۆسێن مه‌ترسیدار هه‌موو به‌رمایكێن خۆ بسۆژن و ئه‌گه‌ر ب ڤى كارى رانه‌بن دێ ب كۆژمه‌یێ 8 ملیۆن دیناران هێنه‌ سزادان".

دیاركر: "ب گۆره‌ى دووڤچۆنێن لژنه‌یێن تایبه‌تمه‌ند وه‌سا یاربوویه‌ به‌رمایكێن نه‌خۆشخانه‌یێن تایبه‌ت ب شێوه‌یه‌كێ‌ زانستی ناهێنه‌ چاره‌سه‌ركرن و سۆتن و چونكو ئه‌و به‌رمایك پێكهاتینه‌ ژ كه‌رسته‌یێن كیمیاوی و بایولۆجی كو دناڤ دا ( ده‌رمانێن ب كارهاتی و ئێكسپایر، ده‌رزیك و كه‌رسته‌یێن تاقیگه‌هان و نشته‌رگه‌ریان) هه‌نه‌، پێدڤیه‌ ژێك بهێنه‌ ڤارڤارتن و د زه‌رفێن تایبه‌ت دا بهێنه‌ هه‌لگرتن".

حه‌مزه‌ محه‌مه‌د عه‌لى راگه‌هاند: "نابیت گلێشێ نه‌خۆشخانه‌یان دگه‌ل یێن گشتى بهێنه‌ تێكه‌ل كرن چونكو كارتێكرنه‌كا راسته‌وخو ل سه‌ر ژینگه‌هێ‌ و ساخله‌یمیا مرۆڤان هه‌یه‌ و بۆ ڤێ‌ چه‌ندێ‌ پێدڤییه‌ رۆژانه‌ بهێته‌ كۆم كرن و ل سۆتنگه‌هان بهێنه‌ سۆتن و ژناڤبرن و بۆ ڤێ‌ چه‌ندێ‌ دێ‌ هه‌موو ئاسانكاری ژلایێ‌ ساخله‌میێ ڤه‌‌ هێنه‌كرن".

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە