دھۆک: ئەو خانیێن پشتی ٢٠١٨ ب زێدەگاڤی ھاتیە ئاڤاکرن ناھێنە تاپۆکرن

هەواڵ / ئابوری :: 7 رۆژ پێش ئێستا‌ :: 136‌ جار بینراوە

دواڕۆژ، رەڤەند گوھەرزی

بەرپرسێ مولک و زەڤیان ل رێڤەبەریا گشتیا باژێرڤانیان ل پارێزگەھا دھۆکێ دیارکر، ئەو خانیێن پشتی ٢٠١٨ ب زێدەگاڤی ھاتیە ئاڤاکرن ناھێنە تاپۆکرن و ھژمارەکا خانیێن زێدەگاڤی کو نێزیکی چوار ھەزار خانیانە ل گۆرەی یاسایەکێ بەری نوکە ھاتینە چارەسەرکرن.


مافپەروەر سەرکار سبغەتۆللا، بەرپرسێ مولک و زەڤیان ل رێڤەبەریا گشتیا باژێرڤانیان ل پارێزگەھا دھۆکێ بۆ دواڕۆژ راگەھاند: ل گۆرەی پرۆژەیاسایا پەرلەمانێ کوردستانێ ئەوا گرێدای تاپۆکرنا خانیێن زێدەگاڤی ل ھەرێما کوردستانێ ئەو خانیێن ھەتا سالا ٢٠١٨ ب زێدەگاڤی ھاتینە چێکرن دێ ھێنە تاپۆکرن.

گۆتژی: "ھژمارەکا خانیێن زێدەگاڤی کو نێزیکی چوار ھەزار خانیانە ل گۆرەی یاسایەکێ بەری نوکە ھاتینە چارەسەرکرن، بەلێ نێزیکی ٢١ ھەزار خانیێن زێدەگاڤی چو یاسا ژێ نەگرتینە و ھەتا نوکە نەھاتینە تاپۆکرن".

سبغەتۆللا دیارکر، ل سالا ٢٠١٨ یاسایا ژمارە ٣ ژ پەرلەمانێ کوردستانێ دەرچوویە و ل گۆرەی وێ یاسایێ ب تنێ ئەو خانیێن ھەتا سالا ٢٠١٨ ھاتینە چێکرن دێ ھێنە تاپۆکرن.

بەرپرسێ مولک و زەڤیان ل رێڤەبەریا گشتیا باژێرڤانیان ل پارێزگەھا دھۆکێ راگەھاند ژی: "پشتی سالا ٢٠١٨ یاسایەکا نوو ژ پەرلەمانێ کوردستانێ دەرچوویە و رێگریێ ل چێکرنا خانیێن زێدەگاڤی دکەت و ناھێلێت خانیێن زێدەگاڤی بھێنە چێکرن".



  • ڕۆژ
  • هەفتە
  • مانگ
created by Avesta Group and powered by Microsoft Azure