کونسڵخانەی ئێران: پاسداران تۆڵەی کردەوە تیرۆریستییەکەی پیرانشار دەکاتەوە

هەواڵ / کوردستان :: 11/07/2019‌ :: 15199‌ جار بینراوە

دواڕۆژ، هانا چۆمانی

کونسڵخانەی ئێران لەشاری هەولێر رایدەگەیەنێت: سوپای پاسدارانی ئێران‌ تۆڵەی کرده‌وه‌ تیرۆریستییه‌که‌ی پیرانشار دەکاتەوە و دەبێت بکەرانی چاوه‌ڕوانی وه‌ڵامێکی توند و کاریگه‌ر بن.


لە بەیاننامەیەکدا کەبەناوی فه‌رمانده‌ی بڕیارگه‌ی حه‌مزه‌ سه‌ید شوهەدا، سوپای پاسدارانی  ئێران بڵاوکراوەتەوە، باس لەوەدەکات: "بە دڵنیایی وه‌ڵامێکی توند بۆ ئه‌نجامده‌رانی کرده‌وه‌ تیرۆریستییه‌که‌ی پیرانشار ده‌بێت، ته‌نانه‌ت ئه‌گه‌ر له‌ ژێر زه‌ویشدا خۆیان حه‌شار بده‌ن تۆڵه‌ی خوێنی شه‌هیده‌کانمان ده‌که‌ینه‌وه‌".

لە راگەیاندراوەکەدا هاتووە: له‌ چل ساڵی رابوردوودا دانیشتووانی ناوچه‌ سنورییه‌کانی پارێزگای ئازه‌ربایجانی ڕۆژئاوا به‌رده‌وام له‌ به‌رامبه‌ر دوژمنان خۆڕاگرییان کردووه‌ و له‌م ڕێگەیه‌دا به‌ به‌خشینی خوێنی شه‌هیده‌کان بوونه‌ته‌ هۆی شانازی و به‌هێزبوونی ئێرانی ئیسلامی، تیرۆرکردنی نامرۆڤانه‌ی سێ ئه‌ندامی سوپای پاسدارانی شۆڕشی ئیسلامی ئه‌نجامی خۆڕاگری دانیشتووانی ناوچه‌ سنوورنشینه‌کانی ئێرانه‌.

هەروەها ئەوەش هاتووە: له‌ ساڵانی ڕابوردوودا هێزه‌کانی سوپا به‌ توندی به‌ره‌نگاری دژبه‌رانی شۆڕشی ئیسلامی بوونه‌ته‌وه‌ و ده‌بێت ئێستاش ئه‌وه‌ بزانن که‌ دۆخێکیان به‌ سه‌ردا ده‌خوڵقێنین که‌ وه‌ک وانه‌یه‌ک هه‌موو کات له‌ بیریان بمێنێته‌وه‌.

وتیشی: "به‌رپرسانی حکومه‌تی هه‌رێمی کوردستان پێویسته‌ له‌ به‌رامبه‌ر کرده‌وه‌ی تیرۆریستان وه‌ڵامیان هه‌بێت و پێشتر ئاگادارمان کردوونه‌ته‌وه‌".

ئەوەش خراوەتەڕوو: وەک سوپای پاسداران ئێمە ئه‌و مافه‌ به‌ خۆمان ده‌ده‌ین که‌ وه‌ڵامی توندی ئه‌و تیرۆریستانه‌ بده‌ینه‌وه‌ و حکومه‌تی هه‌رێمی کوردستانیش ده‌بێت ڕێگری له‌و کرده‌وه‌ تیرۆریستییانه‌ بکات.

رۆژی 9ی تەمموزی 2019 لە چالاکیەکەدا ژمارەیەک چەکداری نەناسراو تەقەیان لە دوو ئۆتۆمبێلی سوپای پاسداران کرد و بەهۆیەوە سێ ئەندامی سوپای پاسداران کە کورد بوون کوژران، دوێنێش ئێران بۆردومانی ناوچەی سیدەکانی هەرێمی کوردستانی کرد و لە ئەنجامدا کچێکی 18 ساڵ گیانی لەدەستدا و دوو کوڕی دیکەش کە لەگەڵ کچەکەدا ئەندامی خێزانێک بوون برینداربوون.

پ: چ.ع

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure