بۆ كەمكردنەوەی فشاری هاتووچۆی سلێمانی پێشنیارێکی نوێ دەكرێت

هەواڵ / ڕاپۆرت :: پێش 1 هەفتە ‌ :: 463‌ جار بینراوە

تاگ :: سلێمانی

دواڕۆژ، پشتیوان جەمال

پارێزگار و قایمقام و بەڕێوەبەری هاتووچۆی سلێمانی سەرقاڵی رێكخستنەوەی هاتووچۆن، شارەزایەكی هاتووچۆش پێشنیاری درووستكردنی سێ زۆنی كردووە بۆ ئەوەی كەمترین ئۆتۆمبێل بێنە نێو سەنتەری شاری سلێمانییەوە.


ئەمڕۆ 10ی تەموزی 2019 لەدیوانی قایمقامیەتی سلێمانی، هەڤاڵ ئەبوبەكر، پارێزگاری سلێمانی و ئاوات محەمەد، قایمقامی شارەكە لەگەڵ بەڕێوەبەرایەتی پۆلیسی هاتووچۆ و شارەزایانی هاتووچۆ كۆبونەوە بەمەبەستی رێكخستنەوەی زیاتری هاتووچۆ.

د.هەڤاڵ ئەبوبەكر، پارێزگاری سلێمانی لەكۆنگرەیەکی رۆژنامەوانیدا رایگەیاند: ئومێد دەكەن لەئایندەیەكی نزیكدا كاری زیاتر بۆ رێكخستنەوەی هاتووچۆ بكەن و هەموو لایەك پشتگیری بەرنامە نوێیەكەی رێكخستنەوەی شار بن بۆ نەهێشتنی قەرەباڵغی، چالاككردنی ئەم بەرنامانەش هەوڵی هەمەلایەنەی دەوێت بە پابەندبوون بە ڕێنماییەكانەوە.

هەفتەی رابردوو بەڕێوەبەرایەتی هاتووچۆی سلێمانی ئاماری شەش مانگی خۆیانی ئاشكراكرد كە داهاتیان زیاتر لە 67 ملیار دینار بووە و خەرجیشیان زیاتر لە 10 ملیار بووە، بەڵام داهاتی شەش مانگی یەكەمی ساڵی رابردوویان زیاتر لە 46 ملیار دینار بووە و خەرجیان زیاتر لە 6 ملیار دینار بووە، واتە بەپێی ئامارەكە داهاتیان زیاد بووە.

د.هەڤاڵ روونیكردەوە: پێویستە بەشێك لەداهاتی سێكتەری هاتووچۆ كە بۆ هاتووچۆ دەگەڕێتەوە، بۆ خزمەتگوزارییەكانی هاتووچۆ سەرفبكرێتەوە تا بتوانرێت چەند غەرامە لەشۆفێر وەردەگیرێت، ئەوەندەش خزمەتگوزاری بۆ دابین بكرێت.

هەر بەپێی ئامارەكانی هاتووچۆ، لەشەش مانگی یەكەمی ئەمساڵدا 540 ڕووداوی هاتووچۆ روویداوە كە زۆربەیان بەهۆی تیژڕەوی ‌و بێئاگایی ‌و مەینۆشییەوە بووە، بەهۆی ئەو رووداوانەوە 75 كەس گیانیان لەدەستداوە ‌و هەزار و 459 كەسیش برینداربوون.

عەمید فەرەیدون عومەر، بەڕێوەبەری پۆلیسی هاتووچۆی پارێزگای سلێمانی بەدواڕۆژی راگەیاند: بەرنامەیان ئەوەیە لەناوشاری سلێمانی هاتووچۆ  زیاتر رێكبخەنەوە و مەبەستیشیان لەو رێكخستنەوەیە، قەدەغەكردنی كۆمەڵێك سەرپێچییە كە لەڕابردوودا هاوڵاتیان دەقیان پێوە گرتووە.

ناوبراو روونیكردەوە: شەقامەكان موڵكی گشتین، بەڵام تێبینی دەكرێت لەهەندێك شوێن ستون و تابلۆی تایبەت بەهەندێك شوێن دانراوە و دەڵێت ئەمە تایبەتە بەو شوێنە، بەڵام ئەگەر ئەو شوێنە بۆ وەستانی ئوتومبیل رێپێدراوە، بۆ هەموو هاوڵاتییەكە ئۆتۆمبیلی تێدا بوەستێت، ئەگەریش قەدەغەیە، بۆ هەموو كەسێك قەدەغەیە، بۆیە ئەو لایەنە رێكدەخەنەوە.

راگرتنی بارهەڵگر لەنێو گەڕەك و كۆڵانەكاندا بەوتەی عەمید فەرەیدون، هاوڵاتیانی بێزار كردووە و رۆژانە گلەیی دەكەن بۆ كەمكردنەوەیان، بۆیە لەمەودوا كار لەسەر قەدەغەكردنی راگرتنی ئەو ئۆتۆمبیلانە لەگەڕەكەكاندا دەكەن، هەروەها قەدەغەی وەستانی ریزی دووەمی ئۆتۆمبیل لەگەڕەكەكانی زەرگەتە و كارێزەوشك و هەندێك گەڕەكی دیكەی دەرەوەی شەقامی بازنەیی مەلیك مەحمود دەكەن.

لەڕۆژی 1ی شوباتی 2019 هاتووچۆی سلێمانی بۆ كەمكردنەوەی فشاری سەر شەقامەكانی (مەولەوی، پیرەمێرد، قەنات، شەقامی قایمقامیەت) ئاڕاستەی هاتووچۆیانی پێچەوانە كردەوە. 

هەڵكەوت عەبدوڵا، شارەزا لەبواری هاتووچۆ بۆ دواڕۆژی روونكردەوە: هەموو پڕۆژەیەك دوای ماوەیەك پێویستی بەپێداچوونەوەیە، بۆیە پێشنیاری كردووە بۆ رێكخستنەوەی ناوشار پێداچوونەوەیەك بەبەرنامەی گۆڕینی ئاڕاستەكاندا بكەن، چونكە ئەوەندەی ئاگادارە گۆڕینی ئاڕاستەكان لەهەندێك شوێندا فشاری دروستكردووە و ئەوەش هاوڵاتیانی بێزار كردووە.

رۆژانە لەنێو سەنتەری شاری سلێمانی لەشەقانی مەولەوی و كاك ئەحمەد شێخ لەنزیك مزگەوتی گەورە، دەستگێڕی زۆر دەوەستن، بەبۆچوونی هەڵكەوت عەبدوڵا، گۆڕینی ئاڕاستەكان سەركەوتوو نابێت ئەگەر كۆنتڕۆڵی دەستگێڕەكانی ناوشار نەكرێت كە دێنە سەر شەقامەكان، بۆیە نابێت ئەو دەستگێڕانە لەو شوێنانە كۆببنەوە كە ئاڕاستەی هاتووچۆ رابگرن.

هەڵكەوت عەبدوڵا پێشنیارێكی دیكەی كردووە بۆ كەمكردنەوەی ئوتومبیل لەنێو سەنتەری شار، ئەویش بەدروستكردنی زۆنی (سوور و سەوز و زەرد) بۆ پاككردن، لەو رووەوە وتی :"مەبەست لەوەیە پارككردن لەناوجەرگەی شاردا گران بكرێت، ئەو پارەیە هەمووی نەڕواتە گیرفانی خاوەن پاركەوە، بەڵكو ئەوان بەشی خۆیان وەربگرن و بەشی دیكەش لەلایەن حكومەتەوە رێكبخرێت لەلایەن پارێزگار یان قایمقامیەت بۆ ئەوەی لەپەرەپێدانی هاتووچۆ سەرف بكرێتەوە تا كەمترین ئۆتۆمبیل بڕواتە نێو شارەوە".

د.هەڤاڵ ئەبوبەكر پشتگیری ئەو پێشنیارەی كرد و وتی :"لەگەڵ ئەوەداین سیستەمی زۆنی زەرد و سەوز و سوور دیاری بكەین بۆ ئەوەی كەمترین ئۆتۆمبیل بێتە سەنتەری سلێمانی، لەگەڵ قایمقامیەت و شارەوانی و مامۆستیانی زانكۆ لەگەڵ ئەوەداین سەنتەری سلێمانی بەشێوەیەكی شارستانیانە نوێبكەینەوە و بایەخ بەگواستنەوەی گشتی بدەین".

دوایین پێشنیاری هەڵكەوت عەبدوڵا بۆ كەمكردنەوەی قوربانییەكانی هاتووچۆ، دانانی پلانێكی پێنج ساڵییە بۆ كەمكردنەوەی زیاتری قوربانییەكان، بۆ ئەوەی ئەگەر هۆكارەكە شۆفێر یان شەقام یان ئۆتۆمبیلە چارەسەریان بۆ بدۆزرێتەوە.

 

پ: ک. س

بڵاوکردنەوە: ئیحسانی مەلا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure