وەزارەتى پێشمەرگە باس له‌ مه‌ترسی بۆردومانه‌كانی توركیا ده‌كات

هەواڵ / جیهان :: 09/07/2019‌ :: 281‌ جار بینراوە

دواڕۆژ

هێرش و بۆردومانى فڕۆکەکانى تورکیا چڕتردەبنەوە بۆ سەر بارەگاکانى پەکەکە لە باکورى عێراق و ئەمیندارى گشتى وەزارەتى پێشمەرگەش لە لێدوانەکانیدا ئاماژە بە مەترسییەکانى ئەو بۆردومانانە دەکات. 


جەبار یاوەر، ئەمینداری گشتی وەزارەتی پێشمەرگە ئاشکرایدەکات: کە بەوهۆیەوە 450 گوند لە ناوچە سنوورییەکانى نێوان تورکیا و هەرێمى کوردستان چۆڵیان کردووە و چیتر ناتوانن بگەڕێنەوە ناوچەکانیان.

وتیشى: "بەهۆى بۆردومانى فڕۆکە جەنگییەکانى تورکیا بۆ سەر ناوچە سنوورییەکان بە دەیان هاووڵاتى مەدەنى گیانیان لەدەستداوە و نزیکەى 450 گوند-یش زیانیان پێگەیشتووە و ناوچەکانى خۆیان جێهێشتووە و لەترسى هێرشى ئەو فڕۆکە جەنگییانە ناتوانن بگەڕێنەوە ناوچەکانیان".

ئەوەشی وت: "ئەو هێرشە ئاسمانییانەى تورکیا بۆ سەر خاکى هەرێمى کوردستان پێشێلکردنى سەروەرییەکانى عێراق و هەرێمى کوردستانە و مافى خۆمانە لەکاتى گونجاودا وەڵامى بدەینەوە".

لەلایەکى دیکەوە چالاکانى کورد سوپاى تورکیایان بەوە تاوانبار کرد: کە هەوڵیانداوە دیموگرافیاى ناوچەکە بگۆڕن بە تایبەتى ئەو ناوچە سێگۆشەییەى دەکەوێتە نێوان تورکیا و ئێران و هەرێمى کوردستان کە بە ناوچەیەکى مەترسیدار ناوى دەبەن و بەدرێژایی مێژوو هیچ دەسەڵاتێک تەنانەت ئیمپراتۆریەتى عوسمانیش نەیتوانیوە کونترۆڵى بکات و هەمیشە شۆڕشگێڕەکانى کورد پەنایان بۆى بردووە و وەک حەشارگەیەک لەوێوەوە هێرشیان کردووەتە سەر دوژمنەکانیان.

وە: ئاکۆ زەنگەنە
پ: چ.ع

بڵاوکردنەوە: ئیحسانی مەلا فوئاد



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە