به‌رهه‌مێن نیسكان و نوكان 70% كێمبووینه

هەواڵ / ئابوری :: 08/07/2019‌ :: 219‌ جار بینراوە

دواڕۆژ، دهۆك

ل سنوورێ پارێزگه‌ها دهۆك 70% به‌رهه‌مێ نیسكان  نوكان كێمبووینه،‌ شاره‌زایه‌كێ چاندنێ ژى دبێژیت:" ژبه‌ر پلانێن لاواز یێن حكو‌مه‌تێ به‌رهه‌مێ نیسكان و نوكان ل دهۆك كێمبووینه"‌.


سالم جه‌عفه‌ر، ئه‌ندازیارێ چاندنێ و رێڤه‌به‌رێ چاندنا مانگێشك بۆ دواڕۆژ گۆت:"حكومه‌تا هه‌رێما كوردستانێ، بتنێ پلانا وه‌رگرتنا گه‌نمى هه‌یه‌، له‌ورا هه‌موو جۆتیارێن ده‌ڤه‌رێ زه‌ڤیێن خوه‌ دكه‌ن گه‌نم و ده‌ست ژ چاندنا نیسكان و نوكان به‌ردایه‌".

گۆتژى:"ل ده‌ڤه‌را مانگێشك سالێن ده‌ر‌بازبووى نێزیكى 4000 دوونه‌مێن ئه‌ردى بۆ چاندنا نوكان دهاتن بكارهینان، نیسك ژى ب هه‌مان ره‌نگ، لێ ئه‌ڤ ساله‌ كێمتر ژ 1000 دونه‌مان بۆ چاندنا نوكان هاتینه‌ بكارهینان".

ناڤبۆرى دازانین:"بگشتى ل سنوورێ پارێزگه‌ها دهۆك، به‌رهه‌مێن نیسكان و نوكان 70% كێمبوویه‌، ئه‌و نیسك و نوكێن دهێن چاندن ژى نه‌ك بۆ بازرگانیێ نه‌، ژماره‌كا جۆتیاران بۆ خوارنا خوه‌ یا سالانه‌ وان به‌رهه‌مان دچینن".

زه‌لالكر:"ئه‌گه‌ر حكومه‌تا هه‌رێما كوردستانێ، سالێن بهێت، پلانه‌كا باش بۆ وه‌رگرتنا به‌رهه‌مێن نیسكان و نوكان نه‌بیت، ئه‌ڤ به‌رهه‌مه‌ دێ گه‌له‌ك كێمتر لێهێن، چنكو بتنێ نوكه‌ ل چه‌ند گوندێن كێم یێن ده‌ڤه‌را دوسكییان دهێنه‌ چاندن".

لدۆر هه‌مان مژار، سه‌لام مزوورى، خۆدانێ قه‌پانا سه‌لام بۆ دواڕۆژ گۆت:"به‌رهه‌مێن نوكان و نیسكان ناچنه‌ ژ ده‌رڤه‌ى دهۆك، هه‌مان ده‌م گه‌له‌ك به‌رهه‌مێن نیسكان و نوكان یێن بیانى دهێنه‌ بازارێن دهۆك، له‌ورا به‌رهه‌مێن نیسك و نوكێن دهۆك گه‌له‌ك كێمبووینه‌".

ئێك ژ ئه‌گه‌رێن دى یێن ئه‌ڤ ساله،‌ جۆتیارێن ده‌ڤه‌رێ بۆ كێمبوونا به‌رهه‌مێن نیسكان و نوكان دیاكرى، نه‌بوونا بارانێن گۆنجایی بوو، بتایبه‌ت ل مه‌ها نیسانێ.

بڵاوکردنەوە: ک. س



created by Avesta Group and powered by Microsoft Azure