كەلێنەكانی پڕۆگرامی خوێندن لەنێوان پەروەردە و خوێندنی باڵا دیاری دەكرێن

هەواڵ / ڕاپۆرت :: پێش 1 هەفتە ‌ :: 228‌ جار بینراوە

تاگ :: پەروەردە

دواڕۆژ، پشتیوان جەمال

وەزارەتەكانی پەروەردە و خوێندنی باڵا لەڕێگەی سازكردنی وۆركشۆپەوە لەهەوڵی بەهێزكردنی خوێندنی قۆناغی بنەڕەتیدان، کە لەو وۆرکشۆپەدا كەلێنەكانی پڕۆگرامی خوێندن لەنێوان هەردوو وەزارەت دیاری دەكرێن. 


ئەمڕۆ 7ی تەمموزی 2019 لەهۆڵی ئیسماعیل بێشكچی لەكۆلێجی پەروەردەی بنەڕەت لەزانكۆی سلێمانی، بەبەشداری ژمارەیەكی زۆر لەمامۆستایانی بەڕێوەبەرایەتی گشتی پەروەردەی سلێمانی و كۆلێجی پەروەردەی بنەڕەت، وۆركشۆپی (سیستمی پڕۆگرامەكانی خوێندن لە كۆلێجی پەروەردەی بنەڕەتی و قۆناغی بنەڕەتی لەبەڕێوەبەرایەتی پەروەردە) بەڕێوەده‌چێت كە ماوەی دوو رۆژ دەخایەنێت.

كۆلێجی پەروەردەی بنەڕەت ساڵی 2003 – 2004 بەناوی كۆلێجی مامۆستایان دامەزراوە و ساڵی 2012 – 2013 دەرگای خوێندنی ئێوارانی بۆ مامۆستایانی سەر بەوەزارەتی پەروەردە كردووه‌تەوە، لەئێستاشدا هەشت بەشی لەخۆگرتووە.
 
د.محەمەد تاتانی، مامۆستا لەكۆلێجی پەروەردەی بنەڕەت و ئەندامی لیژنەی ئامادەكاری ۆروكشۆپه‌كه‌، بەدواڕۆژی راگەیاند: ئەم ۆوركشۆپە ماوەیەكی زۆرە ئامادەكاری بۆ دەكرێت و تیایدا كەلێنەكانی پڕۆگرامی خوێندن لەنێوان وەزارەتی پەروەردە و خوێندنی باڵا دیاری دەكرێن و چارەسەریان بۆ دەدۆزرێتەوە، بۆ ئەو مەبەستەش هەشت لیژنە پێكده‌هێنرێت.

ناوبراو روونیكردەوە: لەماوەی ئەم دوو رۆژەدا لەلایەن پسپۆرانی پەروەردە و خوێندنی باڵا تاووتوێی كەلێنەكان دەكرێن، واتە كەلێنەكانی قۆناغی بنەڕەتی كە دەبێت پەروەردە پڕی بكاته‌وە، كەلێنەكانی كۆلێجی پەروەردەی بنەڕەتیش چارەسەر بكرێن، دواتر راسپاردەكان ئاڕاستەی وەزارەتەكانی پەروەردە و خوێندنی باڵا دەكرێن.

لەسنووری بەڕێوەبەرایەتی گشتی پەروەردەی سلێمانی 469 هەزار و 765 خوێندكار و 39 هەزار و سێ مامۆستا و هەزار و 736 خوێندنگە و نۆ هەزار و 741 كارمەند هەیە.

خۆگر خالید، بەڕێوەبەری بەشی پلان لەبەڕێوەبەرایەتی گشتی پەروەردە و بڕیاردەری وۆركشۆپەكە بۆ دواڕۆژی روونكردەوە: ئەم وۆركشۆپە بۆ نزیككردنەوەی پڕۆگرامەكانی خوێندنی هەردوولایە، واتە ئەو مامۆستایەی لەزانكۆ دەردەچێت و دەبێتە مامۆستا لەپەروەردە دەبێت ئاشنایەتی لەگەڵ پڕۆگرامەكانی پەروەردە هەبێت، ئەوەش بەئامانجی ئەوەی توانست و نمرەی خوێندكار بەرزبكرێتەوە، چونكە نزیكبوونەوە لەنێوان زانكۆكان و پەروەردە هەیە.

بەوتەی ناوبراو "لەڕێگەی ئەم وۆركشۆپەوە پڕۆگرامەكانی قۆناغی بنەڕەتی زۆر باش دەبن، لەبەرئەوەی ئەو مامۆستایەی لەم كۆلێجە دەردەچێت ئاشنایەتی كەمی لەگەڵ پڕۆگرامەكانی پەروەردە هەیە، بۆیە هەردوولا گلەیی لەكەمی توانستی مامۆستا و خوێندكاران دەكەن كە هەردوولا تەواوكەری یەكدین، بۆیە دەبێت مامۆستایان ئاشنایەتیان لەگەڵ پڕۆگرامەكانی پەروەردە هەبێت".

سازكردنی ئەم وۆركشۆپە لەشاری سلێمانی لەكاتێكدایە، ساڵی 2016 هەماهەنگی نێوان وەزارەتەكانی پەروەردە و خوێندنی باڵا هەبووە، بۆ باشتركردنی پڕۆگرامەكانی قۆناغی بنەڕەتی و پێشنیاركراوە پڕۆگرامەكانی خوێندنی وەزارەتی پەروەردە هاوتەریب بكرێت لەگەڵ كۆلێجی پەروەردەی بنەڕەت.

هاوكات كاوە عومەر، بەڕێوەبەری گشتی پڕۆگرام و چاپەمەنییەكان لەوەزارەتی پەروەردەی حكومەتی هەرێمی كوردستان كە ئامادەی وۆركشۆپەكە بوو بەدواڕۆژی راگەیاند: دوای ئەو هەمانگییەی لەساڵانی پێشتر لەنێوان وەزارەتەكانی پەروەردە و خوێندنی باڵا هەبووە، وەزارەتەكان بڕیاریانداوە لەبەڕێوەبەرایەتییە گشتییەكانەوە ئەو هەماهەنگییە زیاتر بكرێت، لەداهاتوویەكی نزیكدا هەمان ۆوركشۆپ لەشاری هەولێریش ساز دەكرێت.

كاوە عومەر روونیكردەوە: كەسێك كە دەبێتە مامۆستا ئەگەر شارەزایی لەپڕۆگرامەكاندا نەبێت، ناتوانێت پڕۆگرامەكان وەك خۆی بگەیەنێت، لەبەرئەوە گەورەترین سوودی ئەو هەماهەنگییە لەڕێگەی زانكۆكانەوە دەتوانرێت كادیرێك پێبگەیەندرێت كە شارەزایی لەگەڵ پڕۆگرامەكان هەبێت، بۆ ئەوەی كە دێتە ناوەندەكانی خوێندن خوێندكاران سوودی لێوەربگرن.

پێداچوونه‌وه‌: ئیحسانی مه‌لا فوئاد

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure