هاتنا ئه‌ره‌بان بۆ گوندێن شنگال به‌رده‌وامه‌

هەواڵ / کوردستان :: 07/07/2019‌ :: 147‌ جار بینراوە

دواڕۆژ، دهۆك

هاتنا ئه‌ره‌بان بۆ گوندێن ده‌وروبه‌رێن شنگال به‌رده‌وامه‌، ئالیێن ئاگه‌هدارژى دبێژن: حكومه‌تا ئیراقێ هاریكاریا ڤه‌گه‌راندنا ئه‌ره‌بان دكه‌ت.


عومه‌ر گه‌معۆ، سه‌رۆكێ ده‌سته‌یا په‌یوه‌ندیێن ئێكه‌تى نشتیمانى كوردستان ل شنگال، بۆ دواڕۆژ گۆت: "ئه‌و ئه‌ره‌بێن ل سالا 2014-ێ، ل شنگال هاریكاریا داعش كربوون، ئه‌ڤ ساله‌ ڤه‌گه‌ریانه‌ گه‌له‌ك گوندێن شنگال".

ناڤبۆرى گۆتژى: " مه‌ گه‌له‌ك جاران ناڤێن وان ئه‌ره‌بان داینه‌ حكومه‌تا ئیراقێ یێن هاریكاریا داعش دژى ئێزدییان كربوون، لێ حكومه‌تا ئیراقێ پشته‌ڤانییا وان ئه‌ره‌بان دكه‌ت".

ناڤبۆرى دازانین: "ئه‌ڤ ساله‌، ئه‌ره‌ب هاتینه‌ گوندێن(ئوم زیبان، ره‌ئس عوبێد، خازۆك، پیر قاسم، حه‌ساویس)پتریا ڤان ئه‌ره‌بان ئه‌و بوون یێن هاریكاریا داعش كرین و فه‌رمان بسه‌ر ئێزدییان هیناى".

لسه‌ر هه‌مان ‌مژار سه‌یدو حسێن، ئه‌ندامێ جڤاتا پارێزگه‌ها مووسل، بۆ دواڕۆژ گۆت: "پشتى حه‌شدا شه‌عبى و له‌شكه‌رێ ئیراقێ هاتینه‌ شنگال، سالا 2017-ێ، هاتنا ئه‌ره‌بان بۆ سه‌ر گوندێن شنگال زێده‌بوو، چنكو له‌شكه‌رێ ئیراقێ ئه‌و پاراستن".

ناڤبۆرى زه‌لالكر: "ئه‌و ئه‌ره‌بێن چو گۆنه‌هـ به‌رامبه‌ر ئێزدییان نه‌كرین ئێزدییان تێبینى لسه‌ر نینن و ئاساییه‌ لسه‌ر گوندێن خوه‌ بژین".

نوكه‌، ل شنگال له‌شكه‌رێ ئیراقێ هێزا سه‌ره‌كییه‌‌،  پتریا گوندێن ئه‌ره‌ب ڤه‌گه‌ر‌یاینێ ل ژێر كۆنترۆلا له‌شكه‌رێ ئیراقێ نه‌.



created by Avesta Group and powered by Microsoft Azure