په‌یامی وه‌فدی پارتی بۆ یه‌كێتی ئاشكراده‌كرێت

هەواڵ / کوردستان :: 26/06/2019‌ :: 16529‌ جار بینراوە

دواڕۆژ، هۆگر کەمال

ئه‌مڕۆ چوارشه‌ممه‌، وه‌فدی پارتی په‌یامێكی مه‌سعود بارزانی له‌باره‌ى پرسی پارێزگارى كه‌ركوك ده‌داته‌ وه‌فدی یه‌كێتی، كه‌ بڕیاروایه‌ له‌ هه‌ولێر كۆببنه‌وه‌.

به‌پێی زانیارییه‌كانی دواڕۆژ له‌سه‌رچاوه‌یه‌كی باڵای حیزبییه‌وه‌ ده‌ستیكه‌وتووه‌، ئه‌مڕۆ  وه‌فدی پارتی ته‌نیا په‌یامێكی مه‌سعود بارزانی سه‌رۆكی حیزبه‌كه‌یان پێیه‌ بۆ وه‌فدی یه‌كێتی، په‌یامه‌كه‌ش ئه‌وه‌یه‌ كه‌ ئه‌وان ته‌نیا دوو كه‌سیان پێباشه‌ بۆ پارێزگاری كه‌ركوك، (یان عه‌بدولڕه‌حمان مسته‌فا پارێزگارى پێشووتری كه‌ركوك یاخود فه‌ره‌یدون عه‌بدولقادر).

سه‌رچاوه‌یه‌كی باڵای یه‌كێتیش بۆ دواڕۆژ باسی له‌وه‌كرد كه‌ ئه‌وانیش پێشنیاری خۆیان هه‌یه‌ بۆ پارتی و پێیانباشه‌ له‌ سێ ناو یه‌كێكیان بكرێنه‌ پارێزگاری كه‌ركوك، ئه‌وانیش (رزگار عه‌لی، خالید شوانى، دكتۆر عومه‌ر ئینجه‌ جێگری سه‌رۆكی زانكۆی كه‌ركوك). 

له‌ لایه‌كی تره‌وه‌ عیماد ئه‌حمه‌د ئه‌ندامی مه‌كته‌بی سیاسی یه‌كێتی تایبه‌ت بۆ دواڕۆژ گه‌شبینی خۆی له‌ دانوستانه‌كانی ئه‌مڕۆی هه‌ردوولا ده‌ربڕی و وتی: "هه‌موو ئاماژه‌كان بۆ ئه‌وه‌ن كه‌ ئه‌مڕۆ له‌گه‌ڵ پارتی له‌سه‌ر كه‌سێك بۆ پۆستی پارێزگارى كه‌ركوك رێكبكه‌ون، بۆیه‌ تاوه‌كوو رۆژی شه‌ممه‌ی داهاتوو كاندیده‌كانمان بۆ پۆسته‌ حكومییه‌كان راده‌ستی مه‌سرور بارزانی ده‌كه‌ین".

هاوكات سه‌رچاوه‌یه‌كی به‌رپرسیش باسی له‌وه‌كرد: كه‌ ئێستا پارتی و یه‌كێتی له‌سه‌ر بوونی دكتۆر عومه‌ر ئینجه‌ بۆ پۆستی پارێزگارى كه‌ركوك بۆچوونیان یه‌كه‌.

وه‌فده‌كه‌ی یه‌كێتیی نیشتمانیی كوردستان پێكهاتوون له‌ (عیماد ئه‌حمه‌د ئه‌ندامانی مه‌كته‌بی سیاسی و ده‌رباز كۆسره‌ت ره‌سوڵ ئه‌ندامی سەرکردایەتی، له‌تیف شێخ عومه‌ر ئه‌ندامی سه‌ركردایه‌تی). 

وه‌فدی پارتی دیموكراتی كوردستانیش پێكهاتوون له‌ (مه‌سرور بارزانی ئه‌ندامی مه‌كته‌بی سیاسی و دڵشاد شه‌عبان ئه‌ندامی سه‌ركردایه‌تی)

داڕشتنه‌وه‌: ئارام غه‌فور
پێداچوونه‌وه‌و بڵاوكردنه‌وه‌: ئیحسانی مه‌لا فوئاد



created by Avesta Group and powered by Microsoft Azure