پەکین پێش بەستنی لوتکەی G20 دەیەوێت گورزێكی ئابووری لەواشنتن بدات

هەواڵ / جیهان :: پێش 4 هەفتە ‌ :: 137‌ جار بینراوە

دواڕۆژ

حکومەتی چین پێش دەستپێکردنی لوتکەی G20 كە رۆژانی 28 و 29 ی حوزەیران لە شاری ئۆساکا لە ژاپۆن دەبەسترێت، هەوڵدەدات چەکی (کانزا دەگمەنەکان) رووبەڕووی دۆناڵد ترامپ سەرۆکی ئەمریکا بکاتەوە.

 
ترامپ-یش هەوڵدەدات لەڕێگەی ئەو لوتکەیەوە هەلێک بڕەخسێنێت، تاکو چاوی بە (شی جینگ بینگ) سەرۆکی چین بکەوێت بۆ تاوتوێکردنی ئەو قەیرانە بازرگانییەی لەنێوان هەردوو وڵاتدا هاتۆتە ئاراوە، بەڵام سەرچاوە چینییەکان پێیانوایە ئەگەر ترامپ بیەوێت چاوی بە سەرۆکی چین بکەوێت، پێویستە سەرەتا سازشی زیاتر بکات لە بڕیارە بازرگانییەکانی.
 
پێشتر ترامپ ئاشکرایکردبوو، ئەگەر چین داواکارییەکانی جێبەجێ نەکات، وەک هەڕەشەیەک دوای بەستنی لوتکەی G20باجە گوومرگییەکانی لەسەر کاڵا چینییەکان لە 10% بۆ 25% بە بەهای 300 ملیار دۆلار زیاد دەکات، لەبەرامبەردا چین-یش هەڕەشەی ئەوە دەکات کە چیتر (کانزا دەگمەنەکان) هەناردەی ئەمریکا ناکات کە سێ یەکی یەدەگی جیهانی بەڕێژەی 80% لە وڵاتەکەی بەرهەمدەهێندرێت.
 
 
کانزا دەگمەنەکانیش، یەکێکە لەو پێکهاتانەی ئامێرە ئەلیکترۆنییەکانی لێ دروستدەکرێت، وەک گەیاندنەکان و موگناتیزە بەهێزەکان و سماریۆم و کوباڵت و نیودیمیۆم و ئاسن و بۆڕۆن و بریقە ئەلیکترۆنییەکان و چەندین کەرەستە کە لە پاڵاوتنی وزەی ئەتۆمی بەکاردەهێندرێت.
 
پێشتر-یش چین ئەو بژاردەیەی لە ساڵی 2010 دژی ژاپۆن بەکارهێنابوو، کاتێک لەسەر دورگەکانی سینکاکۆ ناکۆکی کەوتبووە نێوانیان.
 
وە: ئاکۆ زەنگەنە
بڵاوكردنەوە: ئارام غەفور 



  • ڕۆژ
  • هەفتە
  • مانگ
created by Avesta Group and powered by Microsoft Azure