خه‌نده‌یه‌كى ژنانى كورد له‌ كۆڵن-ى ئه‌ڵمانیاوه‌

هەواڵ / که‌لتور :: 19/06/2019‌ :: 2015‌ جار بینراوە

دواڕۆژ

خه‌نده‌، وه‌ك رێكخراوێكى تایبه‌ت كه‌ هه‌موو ئه‌ندامه‌كانى ژنن، ساڵانێكه‌ له‌ ئه‌ڵمانیا پێكهێنراوه‌ و چه‌ندین چالاكیى جیاجیاى له‌ بواره‌كانى كۆمه‌ڵایه‌تى و رۆشنبیرى و كه‌لتوورى ئه‌نجامداوه‌. به‌شى هه‌ره‌ زۆرى چالاكییه‌كانیان له‌ڕێى په‌یجى تایبه‌ت به‌ خۆیان به‌ناوى   Rekxrawi Xandبڵاوده‌كه‌نه‌وه‌ و ده‌یانه‌وێت به‌شداربن له‌ پرۆژه‌ى درێژخایه‌ن و به‌رده‌وامى ناساندنى كه‌لتوورى كوردى به‌ گه‌لى ئه‌ڵمان و گه‌لانى دیكه‌ى ئه‌وروپا و به‌ پێچه‌وانه‌یشه‌وه‌. بۆ زانیاریى زیاتر ده‌رباره‌ى رێكخراوه‌كه‌، دواڕۆژ ئه‌م دیداره‌ى له‌گه‌ڵ خاتوو (ڕێزان عومه‌ر مسته‌فا) ئه‌ندامى ده‌سته‌ى به‌ڕێوه‌به‌رایه‌تیى رێكخراوى خه‌نده‌ ئه‌نجامدا.


دواڕۆژ: رێكخراوى خه‌نده‌ چییه‌؟
ڕێزان عومه‌ر
: ڕێکخراوی خەندە، ڕێکخراوێکی کۆمەڵایەتی-ڕۆشنبیریی- کلتورییە، هەوڵدەدات بۆ هێنانەدەرەوەی هەرچی زیاتری ژنانی کورد لە چوارچێوەی ماڵ و ڕێکخستنیان لە ڕێکخراوێکدا، بەمەبەستی دروستکردنی نەوایەکی هێمن و دروستکردنی پەیوەندییەکی دۆستانە کە ژنی کورد هەستی غەریبی و تەنهایی و گۆشەگیریی کەمتر ژیانی لێبکات بەدۆزەخ. 

دواڕۆژ: كه‌ى دامه‌زراوه‌؟ مۆڵه‌تى كاركردنتان له‌ كوێ وه‌رگرتووه‌؟
ڕێزان عومه‌ر
: بیرۆکەی دامه‌زراندنى ڕێکخراوه‌كه‌مان لە بنچینەدا لە پەیوەندیی کۆمەڵایەتی و هاوخەمییەوە سەریهەڵداوە و دروستبووە، لە ساڵی ۲۰۱٥ دا لە شاری کۆڵن دامه‌زراوه‌ و ساڵی ۲۰۱۷یش مۆڵەتی یاسایی لە دادگای کۆڵن وەرگرتووە.

دواڕۆژ: ئامانجتان چییه‌؟
ڕێزان عومه‌ر
: کۆنسێپتی سەرەکیمان بریتیە لە بەرزکردنەوەی ئاستی ڕۆشنبیریی ژنان لە ڕێگای سیمینارە دەورى-یەکان کە بۆ هەندێ کەسایەتی رێكیده‌خه‌ین لە ناو ئەڵمانیا و ئەوروپادا، هەروەها تێکەڵاوکردنی خێزانەکان، بەتایبەتى گەنجانی خێزانەکان بە یەکتری لە ڕێگەی ئەو ئاهەنگە خێزانییانەی کە سازیان دەکەین. جگەلەوەی لە هەوڵی تێکەڵاوکردنی ئەندامەکانداین لەگەڵ کۆمەڵگه‌ی ئەڵمانی لە ڕێگەی ئەو چالاکییانەی کە لەگەڵ ڕێکخراوە ئەڵمانەکاندا دەیکەین.
هەروەها بەشداریکردن لە هەر یاد و بۆنەیەکی نەتەوەیی و نیشتمانی کە لە ناوشاری کۆڵن دەکرێت. کۆمەڵێ چالاکیی ترمان کردنەوەی کۆرسێکی زمانی ئەڵمانی بووە، جگە لە کردنەوەی کۆرسی دروومان بۆ کۆمەڵێ ئەندام. هەروەها چه‌ند گه‌شتێكمان ڕێکخستووە بۆ وڵاتانی دەوروبەر بە مەبەستی دروستکردنی کەشوهەوایەکی خۆش کە قەرەبووی دووری و غەریبی و تەنهاییمان بۆ بکاتەوە. یەکێ لە دەستکەوتەکان کە دەتوانین شانازیی پێوەبکەین، دروستکردنی کتێبخانەیەکی خنجیلانەیە کە بۆ یەکەمینجارە بە هەوڵی خۆمان و هاوکاریی کوردەکانی دەوروبەرمان بتوانین ژمارەیەکی بەرچاو کتێب کۆبکەینەوە و لێى سوودمەند بین. 

دواڕۆژ: كێ به‌ ئه‌ندام وه‌رده‌گرن؟ مه‌رجى ئه‌ندامێتیتان چییه‌؟
ڕێزان عومه‌ر:
تەواوی ئەندامەکانمان ژنانن، تەنها مەرجێکمان بۆ بوونەئەندام تەمەنی یاسایی ئەو ژنەیە لەگەڵ پابەندبوونى بە ئامانج و خواستەکان و پەیڕەو و پڕۆگرامی ڕێکخراوەکەوه‌. 

دواڕۆژ: پشتگیریى داراییتان له‌ كوێوه‌یه‌؟
ڕێزان عومه‌ر
: سەرچاوەی دارایی ڕێکخراو، بەشانازییەوە دەڵێین، بە هەوڵی ئەندامەکانمان و کارامەیی و هاوکاریی بەڕێزیانه‌ و تەنها سەرچاوەمان ئابوونەی ئەندامەکانمانە، هەروەها داهاتێکی کەمیشمان لە هەندێ ئاهەنگی خێزان-ی دەستدەکەوێت. هەرگیز چاوەڕوانی هیچ حیزب و کەسایەتیەکمان نەکردووە و ناشیکەین، چونکە دڵنیاین کە سەربەخۆیی خۆمان تەنها بەو ڕێگایە دەپارێزین. سەرەڕای ئەوەی لە کارەساتەکانی بوومەلەرزە و ماڵوێرانییەکانی دوای ڕیفراندۆم توانیومانە کۆمەکی خەڵکی لێقەوماوی دوزخورماتوو و دەربەندیخان بکەین بە کۆکردنەوەی بڕێکی باش جل و بەرگ و پێویستی مناڵان و... و بۆیان پۆست بکەین. جگەلەوەی بەشداریی کۆمەڵێ کەمپینمان کردووە دژ بە یاسای جەعفەری و کوشتن و سووتاندنی ژنان و منداڵان.

دواڕۆژ: ده‌نگدانه‌وه‌ى چالاكییه‌كانتان له‌ هه‌نده‌ران چۆنه‌؟ ئایا كورده‌كان (وه‌ك رێكخراو) ده‌تانناسن؟
ڕێزان عومه‌ر
: هەمیشە سوپاسگوزار و قەدرزانین کە کوردەکانی شاری کۆڵن و دەوروبەرمان هاوکار و دۆستمانن، لە ئاهەنگ و سیمینارەکاندا هاوکاریی مەعنەویمان دەکەن و پێزانن بەرامبەر ماندووبوونمان، پەیجەکەمان بەسەردەکەنەوە و هانماندەدەن بۆ بەرەوپێشەوەچوون، هەمیشە پێزانین بەرامبەر خانەوادەی ئەندامەکانمان کە بەشانازییەوە دێن بۆ بۆنە و یاد و سیمینار و ئاهەنگەکانمان، هیواخوازین نموونەیان زیاد بێت.

پ: چ.ع



created by Avesta Group and powered by Microsoft Azure