ئەڤین حسێن: جێهێشتنى هه‌رێم له‌لایه‌ن هونه‌رمه‌ندانه‌وه‌ خه‌تاى حكومه‌ته‌

هەواڵ / که‌لتور :: پێش 4 هەفتە ‌ :: 165‌ جار بینراوە

دواڕۆژ، چاڤپێکەفتن/ رەڤەند گوھەرزی

دماوێ چوارساڵێن دەربازبوویدا، ھەژمارەکا ھۆنەرمەندێن سنوورێ باژێری دھۆکێ، کوردستان بجھێلان و چوونە ژدەرڤەی ھەرێمێ. ئەڤین حسێن حەسەن، سەرۆکا سەندیکا ھۆنەرمەندێن کوردستانێ لقا دھۆک، دچاڤپێکەفتنەکا دواڕۆژدا دبێژیت"ھۆنەرمەندێن پارچێن دی یێن کوردستانێ نابنە ئەندامێن مە و ئێدی ئاھەنگێن ساڵڤەگەرا بۆ وان ھۆنەرمەندێن ژیانا خوە ژدەستدا ناھێنە گێران".


دواڕۆژ: کی دبیتە ئەندامێ سەندیکا ھۆنەرمەندان؟
ئەڤین حسێن: مە وەکو سەندیکا، دوو ئەندامەتی یێت ھەین، ئەندامێ کارا و یێ ھاوکار، کو ل ناڤەندێن شێوەکاری و شانوو و سینەما(دراما) و مۆزیک، دبنە ئەندامێن مە، ھەر ناڤەندەکێ ژی لیژنا تایبەت یا ھۆنەری یاھەی و ئەو بریارێ ل سەر وی دەن و مە پەیرەوەک یێ ھەی ل سەر وی پەیرەوی و وان خالا یێن تێدا ھاتی بریارێ دەن کا دێ بیتە ئەندامێ کارا یان ھاوکار، دەرچوویێن پەیمانەگەھا ھۆنەرێن جوان راستەوخۆ دبنە ئەندام، ئەگەر پشتی دوو ساڵا ل دەرچوونا سێ کارێن دیار(فعلی) کربن دێ بیتە ئەندام، دەرچوویێ کولیژا ھۆنەرێن جوان ل قوناغا سێى دبیتە ئەندامێ مە و ئەوێن نە ئەکادمی داخوازا ئەندامەتیێ دکەن پێدڤیە حەفت کارێن دیار ھەبن و ژیێ وی ل ٢٣ ساڵا کێمتر نەبن. 

دواڕۆژ: ئاریشەیێن ھۆنەرمەندێن دھۆکێ چنە؟
ئەڤین حسێن: دەمێ مە سەندیکا وەرگرتی گەلەک ئاریشە بوومە چێبوون، ژبەرکو قەیران دروست بوون، ئێکەم جھێ کەفتیە دبن باندورا قەیراناندا سەندیکا و رێکخراوێن جەماوەری بوون، بەلێ یا مە نە قەیران بوو چونکە بەشەکێ وێ نەسریێ یان نیڤەک دھاتە سەرفکرن، بەلێ یا مە ب تەمامی ھاتە راوەستاندن، ئەژی دگەل ھندێ مە گەلەک سەنتەر ھاتبنە گرتن چونکی ب سەدان سەنتەر ھاتبوونە ڤەکرن ئەو ب تەنێ بۆ پارە خوارنێ بوون چ خزمەت نەدھاتنە کرن. بەداخەوە ئەم ژی دگەل ھندێ بووین سەنتەر و گەلەک ژوان بھێنە گرتن، بەلێ نە تەروھشک ناڤێکدا بسوژن، نەسرییێن ھەمیا بھێنە راوەستاندن، تایبەت ھندە ناڤەندا چونکی گەلەک دگرنگن دناف خەلکێ و کومەڵگەھێدا وەکو نڤێسەر و رۆژنامەڤان و ھۆنەرمەند کو ئەو خزمەتا خەلکێ دکەن وەکو رەوشەنبیری پێدڤیە زێدەتر خولێ بکەنە خودان، چونکی نوکە من زێدەتر ھەزار ئەندامان ھەنە ل زاخۆ تا بەردەڕەش.

دواڕۆژ: کەنگی ھوون بوونە سەرۆکا سەندیکا ھۆنەرمەندێن کوردستانێ لقا دھۆک؟
ئەڤین حسێن: ل ساڵا ٢٠١٥ ھەلبژادن مەکرن و کونگرە نەھاتنەکرن ژبەر دروستبوونا قەیرانان، ئەز بوومە سەرۆکا سەندیکایێ، ل دیف داخوازا سەرۆکی بەرێ سەندیکایێ کو ئەوی داخوازکر ھەلبژاردنێن حزبایەتی ب تەنێ بھێنەکرن وەکو پارت پۆستێ پارتی ئەگەر وەکو ئێکەتی مابوون و ھەتا نوکە ژی دبەردەوامن، وەکو پارتی تەنێ لقا دھۆک ھەلبژاردن مەکرن، نەل ھەولێرێ و سلێمانیێ و کەرکوکێ ژی نەھاتنە ئەنجامدان.

دواڕۆژ: ھۆنەرمەندێن دھۆکێ گازندا وێ یەکێ دکەن دەمێ ئاھەنگەک دھێتە گێران ھۆنەرمەندێن دەرڤە مێڤان دکەن و گرنگیێ ب یێن نافخۆ نادەن؟
ئەڤین حسێن: ئەز دگەل ھندێ نینم کو ھۆنەرمەندا ژدەرڤە نەئینن، دیسا دگەل ھندێ نینم ھۆنەرمەندێن دھۆکێ بھێنە پشت گوھخستن، بۆ نموونە ئەگەر ئێک ژدەرڤە ئینا پێدڤیە سێ ھۆنەرمەند یێن دھۆکێ تێدا بن ھەمە دوو ژدەرڤە بن دڤێت چوار یێن دھۆکێ بن، مە بخۆ ل دھۆکێ ئاھەنگ نینن، وی دەمێ ئاھەنگ ژی دھێنە کرن، ھۆنەرمەند بھێنە پشت گوھخستن و ژدەرڤە بینن ئەم ژی دگەلدا نینین، لەوما ھندی رەئیا مە بھێتە وەرگرتن ل سەر گێرانا ئاھەنگان ئەم ئەندامێن خو بەشدار دکەین و گرنگیێ پێدەین، بەلێ ئەگەر رێڤەبەریەک بۆخۆ بینیت و پرسیارا مە نەکەت مە چ پەیوەندی دگەلدا نینن. 

دواڕۆژ: بەشەک ژوان ھۆنەرمەندێن بەرھەمێن وان مایینە دەستێن وانادا و نەشیانە بەڵاف بکەن، دبێژن سەندیکایێ خۆ یا ل مە بێدەنگ کری و پشتەڤانیا مە ناکەت، ل دور ڤێ یەکێ پلانا ھەوە چیە؟
ئەڤین حسێن: ئەم وەکو سەندیکا نە جھەکێ ئینتاجینە، ئەم پشتەڤانیا ئەندامێن خۆ دکەین مافێن وان دپارێزین و بەرگریێ ژێ بکەین و دھەماندەمدا جھێ ئینتاجی رێڤەبەرەیا رەوشەنبیریە، پارە یێل بەردەستێ وان و بۆدجەیا خۆ یا ھەی، وان مافێ ھەی پرۆژا پێشکێشی وەزارەتێ بکەن و وی پرۆژەی پشتەڤانیێ لێ بکەت و پارا بۆ سەرف بکەن، ئەڤە بۆ ماوێ پێنج ساڵایە ئەم خۆبەخش ل سەندیکایێ کارێن خۆ ب رێڤە دبەین و مە نەسریە وەرنەگرتیە ژبلی رێخۆشکەر بم بۆ ئەندامێ خۆ، کارێ مە نەوە بچم سیدی بۆ چێکەم، ئەو کاری رەوشەنبیریە.

دواڕۆژ، بەشەک ژوان ھۆنەرمەندێن کور و کچ ئەوێن ڤان دەمێن داویێ دەرکەفتی، دناڤا کافی و جھێن تایبەتدا دھێنە دیتن، رێنمایێن سەندیکا بۆ وان چنە؟
ئەڤین حسێن: نوکە مە پەیوەندی دگەل وان نین، تەنێ مە پەیوەندی یا دگەل ئەندامێن خۆ ھەی، لێ ھندی ئێک ئەندامێ مەبیت و خەلکێ دھۆکێ بیت، ئەم دێ مافێ وی پارێزین و چ ئاریشە بۆ بھێتە پێش ئەم دێ پارێزەری بۆ گرین، نوکە مە دگەل رێڤەبەریا رەوشەنبیری و گەشت و گۆزار و قایمقامیا دھۆکێ مە یاسایەک یا دەرکری ئەو ھۆنەرمەندێن ل کافی و جھێن دی کاردکەن نابیت ئەندامێ سەندیکایێ نەبیت نابیت ئەوێ ژدەرڤە دئینن ل سەر حسابا ئەندامێن مە بھێن سترانا بێژن و کار بۆ ئەندامێن مە نامینیت.

دواڕۆژ: چ گرێدانەک دناڤبەرا ھەوە پارچێن دی یێن کوردستانێ ھەیە وەکو سەندیکا ھۆنەرمەندان؟
ئەڤین حسێن: مە گرێدان یا ھەی تایبەت دگەل باکووری و رۆژاڤایێ کوردستانێ، بەری ھەیڤا رەمەزانێ مە بەشداری د ڤێستەڤاڵا مونۆدرامادا کر ل ھەولێرێ بوومە داخوازێ ل باکوور و رۆژھەڵات ھات کو ئەم وێ مونۆدرامایێ ببینە وان ھەردوو جھان. 

دواڕۆژ: دڤێ داویێدا بەشەک ژھۆنەرمەندان ژبەر ئاریشەیێن دارایی چوونە دەرڤەی ھەرێمێ، ھەوە ھرز نەکریە ئەو ھۆنەرمەندێن ڤەگەرینەڤە؟
ئەڤین حسێن: ھۆنەرمەند زێدەتر ژئاریشەیێن ئابووری و کێمبوونا بەرھەمان دچنە دەرڤەی ھەرێمێ، ھەتا نوکە نزیکی ١٥ ھۆنەرمەند ل سنوورێ دھۆکێ یێن چووینە دەرڤەی ھەرێمێ، ب راستی ئەو گونەھا حکومەتێ یە چونکی دڤێت بزانیت دێ چاوا پشتەڤانیا وی کەت دا بۆ وی داھاتەك پەیدا ببیت. ئەز باوەرناکەم وان هۆنه‌رمه‌ندێن چووینه‌ ده‌رڤه‌ى هه‌رێمێ بزڤرن،  ھندی بارودۆخ ب ڤی رەنگی بیت، چونکی ھۆنەری ب مەخابنی ڤە ل بادینان نابیتە وەسیلە کو خو پێ خودان بکەن، بەروڤاژیا دەولەتێن جیھانێ ئەگەر کەسەک ھۆنەرمەند بیت پیتر ب ھۆنەرێ خۆ دژیت.

دواڕۆژ: پتریا ئەندامێن سەندیکا ھەوە کورن، ھەوە ئەندامێن کچ ھەنە؟
ئەڤین حسێن: مە ئەندامێن کچ ژی یێن ھەی، بەس بۆ نموونە ل پەیمانگەھا ھۆنەرێن جوان مە گەلەک قوتابی یێن ھەین وەکو دەنگبێژ و مۆزیکژەن و دوان بیاڤێن دی ژیدا، نەمە دراما ھەیە دەرچوویا شانوویێ بچیت بەشدارببیت، نەمە ئەو جھـ ھەنە پێشانگەھـ لێ بھێنە ڤەکرن کچ لێ کار بکەن، مە گرۆپێ کچان یێ مۆزیکێ و شێوەکاری ھەبوون کارێن وان ھاتنە راوەستاندن ژبەر نەبوونا پشتەڤانی و کاری بۆ وانا.

دواڕۆژ: رولێ سەندیکا ھۆنەرمەندان ل دھۆکێ دساخکرنا بیرەوەری و ساڵڤەگەرێن ھۆنەرمەنداندا چیە؟
ئەڤین حسێن: وەکو ساڵڤەگەر مە راوەستاندن، پێشیێ دھاتنە کرن، بەس ئێدی ئەم بۆ کەسێ ئەنجام نادین، چونکی ئەم دگەل ھندێ نینین، نوکە مە پرۆژەکێ دی یێ دەست پێکری، ئەو ژی رێزگرتنا ئەندامێن مەیێن دژیانێدا مایی ئانکو یێن ساخ، ئەو بۆچی دێ مریت و ئەز دێ بۆ وی ساڵڤەگەرێ کەم؟ بۆچی دەمێ یێ ساخ رێزگرتنا خۆ نابینیت ئەز وی دلخۆش بکەم؟!

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure