شارێکی هەرێم هۆتێل و میوانخانه‌ی تێدانیه‌

هەواڵ / ئابوری :: پێش 4 هەفتە ‌ :: 4044‌ جار بینراوە

دواڕۆژ، راپۆرتی به‌ختیار شه‌ریف

له‌ دروستبوونیه‌وه‌ تائێستا خه‌ڵکێکی تێدا نیشته‌جێ بووه‌، له‌ ئاستی رێبواراندا خاوه‌ن ماڵ نه‌بوون، ئه‌وه‌ی بۆ رۆژێک رێی که‌وتبێته‌ ئه‌و شاره‌وه‌ ئه‌و راستییه‌ی بۆ ده‌رکه‌وتووه‌، ئه‌و شارەش شاری چه‌مچه‌ماڵه‌.


چه‌مچه‌ماڵ مێژووییه‌کی دێرینی هه‌یه‌ و به‌هۆی بوونی شوێنه‌وارێکی زۆر و گوندی چه‌رموو له‌م قه‌زایه‌دا که‌سانێکیش به‌ دایکی شارستانیه‌ت ناوی ده‌به‌ن، به‌پێی سه‌رچاوه‌کان مێژووی ئه‌م شاره‌ ده‌گه‌ڕێته‌وه‌ بۆ چاخه‌ دێرینه‌کانی شارستانیه‌ت.
 
له‌ساڵی 1851 و له‌سه‌رده‌می عوسمانییه‌کاندا کراوه‌ به‌ قه‌زا و دواتریش کراوه‌ته‌وه‌ به‌ گوندێک و خراوه‌ته‌ سه‌ر بازیان، له‌ساڵی 1922 تائێستا قه‌زایه‌، چه‌ند ناحیه‌یەک له‌خۆده‌گرێت و ژماره‌ی دانیشتوانه‌که‌ی نزیکه‌ی 200 هه‌زار که‌س ده‌بێت، به‌ڵام تائیستا نه‌ هۆتێلی هه‌یه‌ نه‌ میوانخانه‌.

مێژووی هۆتێل له‌ چه‌مچه‌ماڵ

له‌باره‌ی بوونی هۆتێل له‌چه‌مچه‌ماڵی کۆندا، به‌ ته‌مه‌نترین مامۆستای سنوره‌که‌ (سابیر محه‌مه‌د عه‌لی) بۆ‌ دواڕۆژ وتی: "له‌ساڵی (1960)ەکان هۆتێلێک له‌سه‌ر بانکی ‌چه‌مچه‌ماڵ، له‌ڕێگه‌ی که‌رکوک - سلێمانی کرایه‌وه‌، نزیکه‌ی 2 مانگێک هیچ که‌سێک نه‌چووه‌ ئه‌و هۆتێله‌وە، بۆیه‌ سه‌رکه‌وتوو نه‌بوو داخرا".

ئه‌و له‌باره‌ی نه‌بوونی هۆتێل و مانه‌وه‌ی خه‌ڵک له‌قه‌زاکه‌ وتی: "دانیشتوانی چه‌مچه‌ماڵ خاوه‌ن ماڵ نین له‌ئاستی هیچ که‌سێکدا، چه‌ندین رووداو بووه‌ و رێگە گیراوه‌، هیچ خه‌ڵکێک بێ شوێن نه‌بووه‌، له‌ماڵه‌کانی چه‌مچه‌ماڵدا ماونه‌ته‌وه‌".

ئاماژه‌ به‌چه‌ند رووداوێک ده‌کات و ده‌ڵێت: "شه‌ڕ له‌نێوان پێشمه‌رگه‌ و به‌عس روویداوه‌ به‌هۆیه‌وه‌ خه‌ڵک گیری خواردوه‌، یاخود به‌فر باریوه‌، کاتی خۆی له‌سه‌رده‌می حکومه‌تی به‌عسدا کاتێک ئامار کراوه‌ و جوڵه‌ی هاتوچۆ وه‌ستاوه‌ (منع تجول) بووە، هیچ که‌سێک نه‌بووه‌ نه‌چێته‌ ماڵێکی چه‌مچه‌ماڵ و خزمه‌ت نه‌کرێت".

هاووڵاتییه‌کی دیکه‌ی چه‌مچه‌ماڵ به‌ناوی ئه‌نوه‌ر محه‌مه‌د باسی رووداوێکی سروشتی ده‌کات و به‌دواڕۆژ ده‌ڵێت: "ساڵی هه‌شتاکان بوو، به‌فرێکی زۆر باری رێگه‌ی نێوان سلێمانی-چه‌مچه‌ماڵ به‌و هۆیه‌وه‌ گیرا، خوێندکارێکی زۆر که‌ له‌شاره‌کانی به‌غدا و که‌رکوکه‌وه‌ گه‌ڕابوونه‌وه‌ بۆ سلێمانی نه‌یانتوانی بگه‌ڕێنه‌وه‌ زێدی خۆیان، خه‌ڵکی چه‌مچه‌ماڵ له‌پێشوازی ئه‌و خوێندکارانه‌ و ئه‌و که‌سانه‌دا بوون".

ئاماژه‌ به‌وه‌ش ده‌کات: "هه‌ر چه‌مچه‌ماڵییه‌ک به‌پێی توانای خۆی و شوێنی خۆی چه‌ند خوێندکارێکی ده‌برده‌وه‌ بۆ ماڵه‌وه‌ و خزمه‌تی ده‌کردن تاڕێگه‌که‌ کرایه‌وه‌، به‌ڕاستی چه‌مچه‌ماڵییه‌کان خه‌ڵکێکی به‌خه‌من و به‌حوکمی که‌می ته‌مه‌نه‌که‌م که‌ گه‌نجێکی تازه‌ پێگەیشتوو بووم لام سه‌یر بوو، چۆن خزمه‌تیان ده‌که‌ن".

هیچ سه‌رمایه‌دارێک یاخود به‌ڵێنده‌رێک ده‌یه‌وێت له‌چه‌مچه‌ماڵ هۆتێل دروست بکات؟

ئارام نه‌جات، سه‌رۆکی شاره‌وانی چه‌مچه‌ماڵ وه‌ڵامی ئه‌و پرسیاره‌مان ده‌داته‌وه‌ و به‌دواڕۆژ ده‌ڵێت: "تائێستا هیچ که‌سێک داوای مۆڵه‌تی دروستکردنی هۆتێل یان میوانخانه‌ی لێ نه‌کردووین".

سه‌باره‌ت به‌هۆکاری نه‌کردنه‌وه‌ی هۆتێل و میوانخانه‌ش ده‌ڵێت: "یه‌کێک له‌هۆکاره‌کان ئه‌وه‌یه‌، خه‌ڵکی چه‌مچه‌ماڵ خه‌ڵکانی میواندۆست و قه‌درگرانن، هۆکارێکی دیکه‌ش چەمچەماڵ ئەکەوێتە نێوان دوو پارێزگای گه‌وره‌وه‌، ئەو کەسانەی لە شوێنە دوورەکانەوە دێن بەئاسانی ‌ئەتوانن بگەنە سەنتەری پارێزگاکان بۆ مانەوه‌".

سه‌رۆکی شاره‌وانی چه‌مچه‌ماڵ ئاماژه‌ به‌نه‌بوونی شوێنی گه‌شتیاری ده‌دات له‌نزیک سه‌نته‌ری قه‌زاکه‌ و ئه‌وه‌ش به‌هۆکارێک ده‌زانێت بۆ ئه‌وه‌ی که تائێستا هۆتێلێک له‌ قه‌زاکه‌ نیه‌.

داڕشتنەوە: چ.ع

بڵاوکردنەوە: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure