لەبارەی کەرکوک پارتی پێشنیارێک دەداتە یەکێتی

هەواڵ / کوردستان :: 16/06/2019‌ :: 611‌ جار بینراوە

دواڕۆژ، عیماد جەباری

لەبەرامبەر یەکلاییکردنەوەی پۆستی پارێزگاری کەرکوک بۆ یەکێتی، پارتی پێشنیارێکی ئامادەکردووە بۆ ئەوەی بیخاتە بەردەم یەکێتی.


سەرچاوەیەکی باڵا لەسەرکردایەتی پارتی دیموکراتی کوردستان بەدواڕۆژی راگەیاند: مەسرور بارزانی راسپێردراو بۆ پێکهێنانی حکومەتی هەرێم لەدرێژەی سەردانەکەی بۆ لای حیزبە سیاسیەکان بڕیارە پرسی ئاساییکردنەوەی دۆخی کەرکوک لەگەڵ یەکێتی تاوتوێبکات.

وتیشی: "لەبەرامبەر یەکلاییکردنەوەی پۆستی پارێزگاری کەرکوک، پارتی دیموکراتی کوردستانیش پێشنیارێکی ئامادەکردووە بۆ ئەوەی بیخاتە بەردەم یەکێتی و تێیدا داوا دەکات پۆستی فەرماندەی پۆلیس و قایمقامی ناوەند و پۆستەکانی پێشوو وەربگرنەوە و راو بۆچونیشیان وەربگیرێت لەیەکلاییکردنەوەی پۆستی سەرۆکی ئەنجومەن کە شایستەی تورکمانە".

ئەو سەرچاوەیەی پارتی ئاماژەی بۆ ئەوەشکرد: دوای ئەوەی پارتی ناوی کاندیدەکانی پێشووی رەتکردوەتەوە کە یەکێتی خستوێتێ ڕوو بۆ وەرگرتنی پۆستی پارێزگار، لەئێستادا دوو ناو خراونەتە بەردەست کە عومەر ئینجە جەباری و جەماڵ تاهیرە و زیاتر چانس و دەنگیش لەگەڵ ناوی دووەمدایە بۆ وەرگرتنی ئەو پۆستە هەرچەندە نازانرێت لەنێو ماڵی یەکێتیدا لەسەری کۆکن یاخود نا.

پ: ن.ر

بڵاوکردنەوە: ک. س



created by Avesta Group and powered by Microsoft Azure